Isaías 30
30
Egiptuman manakaqllapaq confiakuyanqan
1 Dios Yayam kuyanqan runakunata nin:
<<Allaw mana wiyakuqkuna, ¡imanöraq kayanki!
Tapukayämanqaykipa rantinmi kikikikunapa yarpayllaykikunata ruraykäyanki.
Mana nikäyaptiqmi juklä runakuna yanapayäshunaykipaq willanakuykäyanki.#30.1 Asiria runakuna atacayänanta mantsakurmi Judá runakuna Egipto runakunata contratayarqan imapis kaptinqa soldädunkunawan shamur yanapayänanpaq. Kay capïtuluchömi nin Asiria runakunapita salvananpaq Egipto runakunaman confiakuyanqanpa rantin Dios Yayallaman confiakuyänanpaq.
Tsaynö karmi jutsasapa kayanqaykipitapis mas peor jutsasapa kaykäyanki.
2Mana tapukayämarmi saslla Egiptupa aywaykäyanki.
Faraón yanapayäshunaykipaq rugakuq aywarmi Egipto runakunaman confiakuykäyanki.#Isa. 31.1-3; Jer. 2.18, 36.
3Peru tsaynö Faraónman confiakuyanqaykipis manakaqllapaqmi kanqa.
Egiptuman confiakurpis penqakushqam umpuräyanki.
4<<Zoán markaman autoridänikikuna chäyaptin y Hanes#30.4 Zoán y Hanes markakunaqa Egiptuchömi karqan. markaman mandayanqaykikuna chäyaptin 5llapayki tsay mana väliq nacionman confiakuyanqaykipitam penqakuychö kayanki. Wanayanqayki höra manam ni imachö yanapayäshunkitsu. Tsaymi ni imanakayta mana puëdir penqakur umpuykachäyanki>>.
6Kaychömi qellqashqa kaykan Dios Yaya revelanqan. Kay revelacionmi kaykan Neguevchö kaq wätakunapaq.
<<Egiptuman aywaqkunam mantsakuypaq desiertupa alläpa sufrir aywaykäyan.
Tsaychömi leonkuna y venenösu culebrakuna kayan.
Ashnunkunawan riquëzankuna chaqnashqa y camëllunkunawan alhäjankuna chaqnashqam aywaykäyan.
Egipto runakunapaq qarayta apayaptinpis manam ni ichikllapis yanapayanqatsu.
7Yanapayänanpaq änirpis manam cumpliyanqatsu.
Tsaymi Egipto nacionta nirqä: <Mana väliq awkis allqu> >>.
8Isaíastam Dios Yaya nirqan:
<<Tsay revelanqaqta kanan aywar runakunapa puntanchö taksha tablaman qellqay.
Shamuq watakunachö ima päsananpaq ninqaqta musyayänanpaq röllumanpis qellqay.
Tsayta rikarmi ninqaqta imaypis yarpäyanqa>>.
9Kay nación runakunam mana cäsukur llullakuykäyan.
Dios Yayapa willakuynintapis manam wiyayta munayantsu.
10Profëtakunatam niyan: <<Revelación rikäyanqaykita ama willayämaytsu>>.
Tsaynöllam niyan: <<Rasun kaqta ama musyatsiyämaytsu.
Llullakuyllapapis shonqükunapaqnö kaqllata willayämay.
11Dios Yaya ninqankunata amana willayämaynatsu.
Paypa willakuyninta amana niyämaynatsu.
Israel runakunapa santu Diosninpaq manam musyaytapis munayänatsu>>.
12Tsaynö niyaptikim Israel runakunapa santu Diosnin nin:
<<Willakatsinqäta mana cäsurmi mana alli ruraykunallachö y llullakuykunallachö kaykäyanki.
13Tsaynö kayanqaykipitam illaqpita altu perqa juchuqnö ushakäyanki.
14Tsaynöllam jankat ñutushqa puyñunö#30.14 Wakin runakunaqa uyllunö niyan. kayanki.
Ñutushqa puyñuqa manam ninata apanallanpaqpis ni yakuta chaqanallanpaqpis välintsu.
Tsaynöllam qamkunaqa ni imapaq väliyankinatsu>>.
15Israel runakunapa santu Diosninmi niyäshunki:
<<Mantsakur kayanqaykipa rantin noqaman confiakayämuy.
Tsaynö kayaptikim alli kawakuyänaykipaq yanapayäshayki>>.
Peru tsaynö Dios Yaya nikäyäshuptikipis manam cäsuyashkankitsu. 16Tsaypa rantinmi niyashkanki: <<Manam Dios Yayallamantsu confiakuyäshaq, sinöqa Egipto runakunamanmi. Egipto runakuna mana yanapayämaptinqa bestiata montarkurmi qeshpiyäshaq>>.
Niyanqaykinöllam contraykikuna atacayäshuptiki rasunpa qeshpiyanki.
Tsaynöllam niyashkanki: <<Alli cörriq carrëtakunaman lätarkurmi qeshpiyäshaq>>.
Tsaynö nikaqtam suwa allqutanöraq qatikachäyäshunki.#Isa. 31.1. 17Juk runallam waranqa (1,000) runakunata qatikachäyäshunki. Pitsqa runakunallam llapaykita qatikachäyäshunki. Tsaymi jirkachö juk ishkay qeru jawiraqnö quëdayanki.
Akranqan runakunata llakipänanpaq ninqan
18 Dios Yayaman mana confiakuyta munayaptikipis llakipäkuq allillata ruraq kayninwanmi payman confiakuyänaykipaq shuyaraykäyäshunki. Payman confiakuyaptikim llakipäyäshurniki yanapayäshunki. Payman confiakuqkunam alli kawayta tariyan.
19 Sión runakuna, mananam waqayankinatsu. Jerusalén runakuna, mañakuyaptikim Dios Yaya yanapayäshunki. Rugakuyanqaykita wiyarmi llakipäyäshunki.
20Alläpa ñakayman y llakikuyman churayäshurnikipis tantiyatsiyäshuqniki Dios Yayaqa manam dëjayäshunkitsu, sinöqa imaypis yanapayäshunkim. Yanapaykäshunqaykitam tantiyayanki. 21Pay munanqannö kawarmi alli nänipa aywaqnö kaykäyanki. Tsay nänipita itsuq kaqläpa o derëcha kaqläpa yaqaqnö kayaptikim qepaykikunapita niyäshunki: <<Kaypam näni. Kay alli nänipa aywayay>>.
22Tsay höram yuraq qellaywan y qoriwan enchapashqa ïduluykikunatapis pitsakuyanqayki papeltanö jitariyanki.
23Murukuyänaykipaqpis tiempullanchömi tamyatsimunqa. Mikuynikikunapis allish wayurmi mikukuy munay kanqa. Wätaykikunapaqpis maytsikam qewa kanqa. 24Aruq yuntaykikuna y chaqnakuna ashnuykikunam alli qewata mikuyanqa. 25Entëru jirkakunapita y altu lömakunapitam mayunöraq yaku shamunqa. Tsay witsaymi llapan chikiyäshuqnikikunata wañuskatsir tsinkakuyänan törrinkunatapis Dios Yaya jankat juchutsinqa. 26Tsay witsaymi kuyanqan runankunata castigar däñanqanta Dios Yaya jampinqa. Killapis rupaynöraqmi atsikyanqa. Rupaypis qanchis rupaynöraqmi atsikyanqa.#30.26 Rupaypis qanchis rupaynöraqmi atsikyanqa ninanqa jutsa ruraypis y llakikuypis manam kanqanatsu ninanmi.
Asiria runakunata castigananpaq ninqan
27¡Maski rikäyay! Kikin Dios Yayam karupita shamuykan.
Paypa rabyayninqa yanarraq qoshni shäriqnöraqmi kaykan.
Alläpa rabyashqa parlanqanmi imaykata ushaq ninanöraq.
28Jamayninpis mayu alläpa jeqar runata apaqnöraqmi.
Paymi shamuykan juklä nación runakunata jarnëruwan zarandaqnö ushakätsinanpaq.
Bozalta churarkur mana munanqanpa bestiata apaqnömi tsay runakunata desgraciaman apanqa.
29Peru Sión runakuna, qamkunam sïqa Diosta alabana fiestachö paqaspa kushishqa cantayanqannöraq cantayanki.
Dios Yayata adorayänan lömaman lawtata töcaraykar witsaqnömi kushikuyanki.
Paymi imaykapita tsapämaqnintsik Dios.
30Contrankunata ushakätsinanpaq shamurmi alläpa mantsakaypaq parlanqanta Dios Yaya wiyakätsimunqa.
Lunyaq ninawan, illaquwan, mangädawan y runtu tamyawanmi alläpa rabyar castiganqa.
31Pay parlanqanta wiyarllam Asiria nación runakuna ushakäyanqa.
Asiria runakunatam Dios Yaya tukrunwan alli garutinqa.
32Yapay yapay garutiykarmi Asiria runakunata ushakätsinqa.
Tsaynö castigaptinmi panderëtakunata, arpakunata töcar kuyanqan runankuna kushikuyanqa.
33Asiria runakunapa mandakuqnin rey ñakananpaq sitiu unaypitanam previnishqa kaykan.
Tsay previnishqa sitium jatunkaray.
Tsaychö rupananpaqmi yantapis alistashqana kaykan.
Dios Yaya pükaptinmi shiminpita atska azufri yarqamunqa.
Tsay azufriwan ninata tsarirkatsirmi tsay reyta ushakätsinqa.
Currently Selected:
Isaías 30: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
