Isaías 3
3
Judá runakunawan Jerusalén runakuna castigashqa kayänanpaq ninqan
1¡Kay niyanqaqta llapayki cäsukuyay!
Llapanta mandaq Dios Yayam Judá nacionta dëjaskinqa.
Jerusalén markatapis mananam yanapanqanatsu.
Tsaymi tsaychö täkuqkuna mikuyänanpaq mikuypis ni upyayänanpaq yakupis kanqanatsu.
2Tsaynöllam kayanqanatsu valienti runakunawan soldädukuna,
juezkunawan profëtakuna,
adivïnukunawan mayor runakuna,
3mandakuq capitankunawan reqishqa runakuna,
yätsikuqkuna, alli yachayyuqkuna ni brüjukunapis.
4Mandaqninkuna kayänanpaqmi tsayraq yachakuq jövinkunallata y wamrakunallata churayanqa.
5Kikinkunapuram alläpa chikinakur kawayanqa.
Vecïnunkunawanmi juknin jukninwan maqanakuyanqa.
Jövinkunam awkinkunata mana respitar chikiyanqa.
Despreciashqa runakunam yachaq runakunapa contran shäriyanqa.
6Tsaymi taytanpa wajinchö kaykaq wawqinta ninqa:
<<Qampam shukukunaykipaq llatapaykipis kaykanraq.
Mana alli kawaypita jipiykayällämänaykipaq mandaqnïkuna kaykullay>>.
7Peru wawqinnam jurarnin ninqa:
<<¿Imapaqtan änishaykipis?
Noqapapis manam mikuynï ni llatapäpis kantsu.
Kay markachö mandakuq kanäpaq ama churayämaytsu>>.
8Jerusalén markam ushakätsishqa kanqa.
Judá nación runakunam alläpa mana alli kawayman chäyanqa.
Tsaynömi ñakayanqa manakaqkunata parlayanqanpita y llutankunata rurayanqanpita.
Tsaynöpam paykuna Dios Yayapa contran tikrayashqa.
9Jutsata rurayanqantam qaqllan musyatsikun.
Jutsata rurarpis manam penqakuyantsu.
Sodoma runakunapa jutsankunanömi jutsankuna maytsayman musyakan.
¡Allaw, kikinkunam achäquita ashiyashqa!
10Peru alli ruraq runaqa allita ruranqanpitam kushishqa kawanqa.
11Jutsa ruraqkunaqa ¡imanöraq kayanqa!
Paykunaqa alläpam ñakayanqa.
Mana allita rurayanqanmanmi castigashqa kayanqa.
12Kuyanqä runakuna, mandaqnikikunam pantatsiyäshurniki llutanta ruratsiyäshunki.
Ñakatsiyäshuqnikikunam wamranölla kaykäyan.
Autoridänikikunapis warmikunallam kaykäyan.
13Kuyanqan runankunata juzgananpaqmi Dios Yaya kaykan.#Ose. 4.1; Miq. 6.2.
14Tsaymi mayor runakunata y mandakuqkunata Dios Yaya qayaskatsir ninqa:
<<Qamkunam üva chakräta#3.14 Dios Yayapa üva chakranqa kuyanqan Israel runankunam kayan (Isa. 5.1-7). jankat ushaykäyanki.
Waktsakunata suwapurmi wajikikunaman qoriykäyanki.
15Kuyanqä runakunata ¿imanirtan tsaynö ñakatsiyanki?
Waktsakunata ¿imanirtan tsaynö allqutsäkuyanki?
Llapanta mandaq Dios Yaya karmi nï>>.
Jerusalén warmikunata castigananpaq ninqan
16Mastam Dios Yaya nin:
<<Sión warmikunam alläpa allish tukur nikachaykacharraq puriyan.
Qeptsiparmi rikapäyäshunki.
Chakinkunaman watäyanqan adornunkuna wiyakänanpaqmi tushuykacharraq puriyan.
17Tsaynö kayanqanpita qaracha qeshyaywan castigaptïmi qara putuyashqa penqakuypaq puriyanqa>>.
18Jerusalén warmikunata Dios Yaya castigarmi ushakätsinqa chakinkunachö shukuräyanqan adornunkunata,
ganchunkunata y coröna rikuq adornunkunata,
19wallqankunata y pulcërankunata,
reducïllankunata 20y umankuna tsapäkuyänankunata,
chakinkunaman watäkuyänan pulcërankunata y shumaq awashqa wachukunkunata,
perfüminkunata y suertipaq katsiyanqan wayrurunkunata,
21sortïjankunata y senqankunaman churayänan arëtinkunata,
22kuyakuypaq shumaq llatapankunata y pañulunninkunata,
vëlunkunata y cartërankunata,
23espëjunkunata y fïnu tëlankunata,
umankuna watäkuyänan tëlakunata y tikpi jakunkunatapis.
24Tsay witsaymi perfümiwan mushküyanqanpa rantin alläpa asyäyanqa.
Wachukupa rantinmi waskallana kanqa.
Shumaq piltakushqa kayanqanpa rantinmi aqtsannaq qara putu kayanqa.
Alli llatapakunata shukukuyanqanpa rantinmi lütu llatapatana shukukuyanqa.
Qaqllankunapis kuyakuypaq kanqanpa rantinmi melanaypaq qeri ushashqa kayanqa.
25Jerusalénchö täkuq ollqukunatam espädawan wañutsiyanqa.
Pelyay yachaqkunapis guërrachömi ushakäyanqa.
26Markaman yaykuna punkukunam waqakuypaq y llakikuypaq kanqa.#Jer. 14.2; Lam. 1.4.
Jerusalén markapis ollqun dëjashqa warminömi kanqa.
Currently Selected:
Isaías 3: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
