Isaías 14
14
Juklä nacionman prësu apayanqankuna kutiyämunanpaq ninqan
1Jacobpita miraqkuna, Dios Yayam llakipämäshun.
Israel runakuna, yapay akramarnintsikmi nacionnintsikman qorimäshun.
Juklä nación runakunapis noqantsikwan paqtam täkuyanqa.
2Nacionnintsikman kutimunapaqmi maytsay runakuna yanapamäshun.
Prësu apamaqnintsik runakunatapis kikinkunatam prësu achkuskir podernintsikchö katsishun.
Babilonia nacionpa mandakuqnin reypa contran niyanqan
3Babilonia nacionpa mandakuqnin ñakatsimanqantsikpita, llakikatsimanqantsikpita mana jamatsiypa arutsimanqantsikpitam Dios Yaya jamaykatsimäshun. 4Tsay junaqmi Babilonia nacionpa mandakuqnin reypa contran shärir nishun:
<<¡Poderyuq runata maski rikäyay! ¡Allish tukuyninpis mayparaq aywashqa!
5Mana alli runakuna poderyuq kayanqantam Dios Yaya manakaqman churashqa.
Mandakuq kayanqantam qechushqa.
6Paykunam mana llakipar maytsay markakunatapis atacarnin ushakätsiyaq.
May naciontapis poderninkunachö katsirmi mana llakipaypa sufritsiyaq.
7<<Paykuna ushakäyaptinmi maytsaychö kushishqana kawakur cantayan.
8Babiloniapa mandakuqnin rey ushakanqanpitam cipreswan Líbanuchö kaykaq cedrupis kushikur niyan:
<Kananqa walluyämänanpaq mananam ni pitapis kachamunkinatsu>.
9<<Babilonia nacionpa mandakuqnin rey, wañuqkunapa almankuna rikaq rikaqllam shuyaraykäyäshunki.
Puñuyanqanpita sharkurmi chaskiyäshunaykipaq alistakuykäyan.
Maytsaychö wañuq reykunapa almankunapis jamayanqanpitam chaskiyäshunaykipaq shäriykäyan.
10Paykunam llapan niyäshunki:
<Qampaqpis wañuy kashqam ¿aw?
Qampis noqakunanöllam wañushkanki.
11Pampaskiyäshuptikim poderyuq kaynikipis ushakashqa.
Fiestata ruraptiki arpayki waqanqanpis ushakashqanam.
Kaychömi qopiki y qataykipis kurullana kanqa>.
12<<Waraq lucëru, ¡imanöpatan ciëlupita shikwaskamushkanki!#Apoc. 8.10; 9.1.
Qammi atska nacionkunata vencishkanki.
Tsaymi kananqa kikikita patsaman jitarpayämushushkanki.
13Allish tukurmi shonqullaykichö niq kanki:
<Ciëluyaqmi chäshaq.
Diospa qoyllurninkunapita mas jananchömi trönü kanqa.
Dioskuna qorikäyänan norti kaqlä jirkachö jamaykurmi mandakushaq.
14Pukutay jananmanmi witsäshaq.
Poderösu Dios Yayanömi kashaq>.
15<<Tsaynö yarpaykarmi wañushqakuna kanqanman chashkanki.
Patsa rurinpitapis mas rurimanmi chashkanki.#Mat. 11.23; Luc. 10.15.
16Wañushqa jitaraqta rikarmi mantsakashqa niyanqa:
<¿Kay runach pïmaytapis tsuktsukyätsiq karqan?
¿Kay runach llapan nacionkunatapis ushakätsiq karqan?
17¿Kaychi maymanpis char tsunyata dëjaq, markakunatapis ushakätsiq y prësukunatapis mana dëjaq karqan?>
18<<Nacionkunapa mandakuqnin reykunam llapanpis kuyakuypaq sepultürachö pamparäyan.
19Peru qamtam sïqa tsaymantsu pampayäshunki, sinöqa basüratanömi jitaskiyäshunki.
Guërrachö wañutsishqa y soldädukuna jarutakuyashqa ayatanömi lluta runakunapa ayantawan uchkullaman jitarpuyäshunki.
20Nacionkunata ushakätsinqaykipita y marka majikikunata wañutsinqaykipitam wakin kaq reykunatanötsu pampayäshunki.
Mana alli runa kanqaykipitam tsurikikunata allqu wajakuqllapaqpis churayanqatsu.
21¡Qampa tsurikikunata llapanta wañutsiyätsun!
¡Ama mandakuq rey katsuntsu!
Rey kayänanpaq yaykuykurmi maytsaychö markakunata duëñu tukuyanqa>>.
22Llapanta mandaq Dios Yayam nin:
<<Babilonia markapa contran shärirmi kikï jankat ushakätsishaq.
Tsaymi poderninpis kanqanatsu.
Babilonia runakunapa wamrankunata y willkankunatam jankat ushakätsishaq.
23Tsay partitam erïzukuna#14.23 Erïzuqa añas tamäñum waqtanchö kashayuq. pärananpaq pätsi pätsiman tikratsishaq.
Pitsapakuqnöraqmi Babiloniata ushakätsishaq>>.
Llapanta mandaq Dios Yayam tsaynö nin.
Asiria nación ushakänanpaq ninqan
24Llapanta mandaq Dios Yayam jurar nin:
<<Ninqämi ninqä kanqa.
Yarpanqänöllam llapan kanqa.
25Israel nacionman yaykamuq Asiria runakunatam jankat ushakätsishaq.#Isa. 10.5-34; Nah. 1.1—3.19; Sof. 2.13-15.
Jirkakunachömi jarur ushashaq.
Kuyanqä runakunapa matankanman yügu churayanqantam jipishaq.
Lasaq qepita aparitsiyanqantam jorqushaq.#14.25 Yügu churayanqanta y qepi aparitsiyanqanta nirqa alläpa ñakatsiyanqantam nirqan.
26Maytsay nacionkunapaqmi tsaynö yarpaykä.
Llapan nación runakunata castiganäpaqmi listu kaykä.
27Poderösu kaykaptï ¿pitan amatsamanman?
Ushakätsiq aywaptï ¿piraq tsapämanman?>>
Filistea nación imanö kananpaq ninqan
28Rey Acaz wañunqan watam Isaíasta revelar Dios Yaya nirqan:
29<<Filistea nación runakuna, atacayäshuqniki Asiria nacionpa mandakuqnin rey wañunqanpita ama kushikuyaytsu.#Jer. 47.1-7; Eze. 25.15-17; Joel 3.4-8; Amós 1.6-8; Sof. 2.4-7; Zac. 9.5-7.
Paypa tsurinkunapitam juk rey kanqa.
Tsay reymi alläpa venënuyuq culebrapita mas peor kanqa.
30<<Tsaymi alli qewachö üshata mitsiqnö waktsakunata rikäshaq.
Mana imannaq runakunapis kushishqam kawakuyanqa.
Peru filisteo runakunatam sïqa muchuywan wañutsishaq.
Kawaykar quëdaqkunatapis llapantam ushakätsishaq.
31<<Filistea markakunapa punkunkuna, ¡waqayay!
Filistea markakuna, ¡mantsakar qayaraykachäyay!
Llapayki filisteo runakuna, ¡mantsakar tsuktsukyäyay!
Qoshni shäriqnömi norti kaqläpita soldädukuna shamuykäyan.
Fïlanpita mana juk yaqaypam shamuykäyan>>.
32Filisteapita mandayämunqan runakunatam nishun:
<<Sión lömatam Dios Yaya rikaykan.
Tsaymi imaypis ñakaq kuyanqan runankuna tsayman tsinkakuyanqa>>.
Currently Selected:
Isaías 14: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
