Oseas 4
4
Israel runakuna jutsa rurayanqanpita Dios Yaya piñakunqan
1Israel runakuna, Dios Yaya niyäshunqaykita shumaq wiyayay.
Paymi jutsata rurayanqaykipita acusayäshunki.
Tsaymi niyäshunki: <<Qamkunam äniyämanqaykita cumpliyankitsu, kuyanakuyankitsu ni reqiyämankitsu.
2Shutïchö jurarpis manam cumpliyankitsu.
Tsaynöllam llullakuyanki, runa majikikunata wañutsiyanki, suwakuyanki y jukpa warminwanpis puñukuyanki.
Wañutsinakurpis manam ajayäyankitsu.
3Tsaymi Israelchö täkuqkuna alläpa llakikuywan ni imanakaytapis puëdiyantsu.
Chucaru wätakuna, pishqukuna y pescädukunapis wañurmi ushakaykäyan>>.
Sacerdötikuna jutsata rurayanqan
4Sacerdötikunatam Dios Yaya nin:
<<Qamkunam jutsayuq kayanki Israel runakuna mana alli ruraykunaman umankuna churashqa kayänanpaq.
Tsaynö kaykarqa ama pitapis piñaparnin culpatsayaytsu.
5Jutsayuq kayanqaykipitam imay hörapis illaqpita castigayäshayki.
Qamkunatanöllam llulla profëtakunatapis castigar nacionnikikunata ushakätsishaq.
6Yachatsikuq kaykar mandamientükunata mana yachatsiyanqaykipitam#Lev. 10.11; Mal. 2.7. kuyanqä runakuna ushakäyanqa.
Kikikikunapis manam yachatsikuynïkunata chaskiyankitsu.
Mana chaskiyanqaykipitam sacerdöti kayanqaykipita qarquyäshayki.
Leynïkunata mana cumpliyanqaykipitam qamkunapita miraqkunatapis yanapashaqnatsu.
7<<Qamkuna maytsikaqman mirayaptikipis runakunaqa masmi jutsata ruraykäyan.
Respitashqa kayänaykipaq churashqa kaykarpis alläpa penqakuymanmi churayäshayki.
8Jutsa rurayanqanpita wätata sacrificiupaq apayämuptinmi kushikuyanki.
Sacrificiu aytsata chaskiyänayki raykum runakuna mas jutsata rurayänanta munaykäyanki.#Lev. 6.26.
9Wakin kaq runakuna jutsata rurayanqannöllam qamkunapis jutsata ruraykäyanki.
Tsaymi qamkunata wakin runakunatanölla castigayäshayki.
10Mana cäsuyämanqaykipitam mikuyänaykipaq tarirpis pacha juntaqa mikuyankitsu.
Juk dioskunaman creyikurpis manam ima bendicionta chaskiyankitsu>>.
Israel runakuna ïdulukunata adorayanqan
11<<Prostitüta warmiwan kakur y upyaman churakashqa karmi juiciunkunatapis runakuna oqrayan.
12¡Tsaymi qerupita rurashqa ïdulukunata tapukuyan!
¡Taksha qeruwanmi suertita qatiyan!
Ïdulukunapaq yarpararmi mana allikunata rurar kaykäyan.
Juk ollqu warminta dëjaskir juk warmiwan täkunqannömi noqatapis mana cäsuyämar juk dioskunaman creyikuykäyan.
13Lömachö kaykaq altarkunachö sacrificiukunata waykarmi juk dioskunaman inciensiuta qoshniykätsiyan.
Roble, álamo y encina jachakunapa chakinchö llantu alli kaptinmi tsay jachakuna kaqchö tsaynö ruraykäyan.
<<Israel runakuna, ïdulukunata adorayänanpaq warmi tsurikikuna y llumtsuynikikuna qamkunapitam yachakuykäyan.
Ïdulukunata adorarmi altarkuna kanqanchö ollqunta mana respitar jutsata ruraykäyan.#4.13 Tsay witsaymi Baal diosta adorar payta adorayänan altarkunachö warmikunawan runakuna kakuyarqan.
14Qamkunapis tsaynöllam juk dioskunapaq sacrificiuta waykar altarkunachö jukwan jukwan kakuq warmikunawan kakuykäyanki.
Warmi tsurikikunata y llumtsuynikikunata tsaynö kayänanpaq churayanqaykipita paykunata castiganqäpa rantinmi kikikikunata castigayäshayki.
Mana tantiyakuq kayanqaykipitam llapayki ushakäyanki.#Jer. 2.23-27; 3.1-2; Ose. 2.5.
15<<Judá runakuna, cuidädutaq qamkunapis Israel runakunanö ïdulukunata adorayankiman.
Ama aywayaytsu Gilgalman ni Bet-avénmanpis.#4.15 Bet-avén ninanqa jutsa waji ninanmi. Bet-avénpaq parlarqa Bet-el markapaqmi parlan. Bet-elpaqqa parlan Dios Yayata adorayanqanpa rantin Baal diosta tsaychö adorayaptinmi.
Ïdulukunaman creyikurqa shutïtapis amana parlayaynatsu.#Amós 4.4; 5.5.
16<<Israel runakuna chucaru wäkanö mana cäsukuqmi kayan.
Tsaynö kaykäyaptinqa ¿imanöraq washki üshata alli qewachö mitsiqnö bendicionnïta paykunaman churäman?
17Efraín runakunam#4.17 Efraín runakunapaq parlarqa Israel nación runakunapaqmi parlan. ïdulukunata adorayan.
Tsaynölla karqa ¡waqranöpis kayätsun!
18Paykunaqa upyallamanmi churakashqa kayan.
Altarkunachö prostitüta warmikunamanmi imaypis aywayan.
Autoridäninkunapis jutsata rurarmi penqakuypaq kaykäyan.
19Tsaynö kayanqanpitam päjata shukukuy apanqannö castigar maytsaymanpis qarqushaq.
Tsaymi juk dioskunaman creyikuyanqanpis mana ni ima serviq kanqa>>.
Currently Selected:
Oseas 4: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
