Efesios 4

Juk shonqulla kawakunapaq ninqan

1Tsaynö kaykaptinqa Jesucristupa alli willakuyninta willakunqäpita prësu qaykurarpis qamkunatam rugayaq Dios Yaya munanqannö imaypis alli kawakuyänaykipaq. Tsaynö kawayänaykipaqmi Dios Yaya qayayäshushkanki.

2Mana yachaq tukur kawakuyay, pïmaypaqpis alli shonqu kayay y kuyanakur pacienciakuyay.#Col. 3.12-13. 3Espíritu Santu yanapayäshunqaykinölla creyikuq majikikunawan juk shonqulla alli kawakuyay.

4Jesucristuman creyikurmi llapantsik juk cuerpulla kantsik.

Jukllayllam Espíritu Santupis.

Juk salvacionllata chaskinapaqmi Dios Yaya qayamashkantsik.

5Jukllayllam Señornintsikpis.

Jukllayllam creyikuynintsikpis.

Jukllayllam bautismupis.

6Jukllayllam Dios Yayapis.

Paymi llapantsikpa Taytantsik,

llapantsiktam poderninchö katsimantsik,

llapantsiktam yanapamantsik

y llapantsikwanmi kaykan.

7Peru juk cuerpulla kashqapis cada ünutam Jesucristo kuyakuq kar payta servinapaq churamashkantsik. 8Tsaymi Dios Yayapa palabranchö nin:

<<Contrankunata venciskirmi altupa witsarqan.

Tsaypitam runakunata yanapamurqan#Efe. 4.11.>>.#Sal. 68.18.

9Altupa witsashqa niptinmi tantiyantsik Jesucristo kay patsaman urämunqanta. 10Kay patsaman urämunqanpitam ciëluman kutikushqa. Imaykapaqpis poderösu karmi poderninchö llapanta katsin.

11Paymi wakinta churashqa apóstol kayänanpaq, wakinta profëta kayänanpaq, wakinta alli willakuyninta willakuyänanpaq y wakintana mitsikuqnö cuidar yachatsikuq kayänanpaq. 12Paykunatam Jesucristo churashqa creyikuq majinkunata animatsirnin yachatsiyänanpaq. Tsaynö yachatsiyaptinmi alistakushqa kaykäyanqa Dios Yaya munanqanta rurar Jesucristupa cuerpun iglesiata#4.12 Jesucristupa cuerpunpaq parlarqa payman confiakuqkunapaqmi parlan (1Cor. 12.13; Efe. 1.23; 4.16; 5.23, 30; Col. 1.18). llapanchöpis yanapayänanpaq. 13Tsaynö kaptinqa llapantsikpis juk shonqulla kar Dios Yayapa Tsurinman creyikurnin Jesucristo kawanqannö noqantsikpis kawashun.

14Tsaynö kawakurqa manam pishi wamranönatsu kashun pipis mana allikunata yachatsikur creyitsimänapaq. Tsaynöllam päjata wayra wakman kayman apanqannönatsu kashun. 15Tsaypa rantinqa juknin juknintsikpis kuyanakurnin rasun kaqllata imaypis parlashun. Tsaynöpam Jesucristo kawanqannö noqantsikpis kawakushun.

Jesucristo umantsik kaptin 16y noqantsik cuerpun kashqam juknin jukninwan yanapanakunapaq churamantsik. Tsaymi moquntsikkuna tsaränakunqannö yanapanakur#Col. 2.19. kuyanakunapaq tantiyakushun.

Mushuq kawayta chaskinqantsik

17Tsaynö kaptinmi Señor Jesucristupa apostolnin kar yätsiyaq Dios Yayata mana chaskiq runakunanö mana kayänaykipaq. Paykunaqa yarpayninkunapis imayka upayashqanö kaptinmi 18manakaqkunapaq yarpachakur kaykäyan. Juiciunnaq chukru shonqu karmi Dios Yaya munanqannötsu kawakuyan. 19Paykunaqa shonqunkunapa munayllanta rurarmi penqakuyantsu. Juknin jukninwan kakurmi tukuyläya melanaypaq jutsakunata rurayan.#Rom. 1.21-25.

20Peru qamkunaqa manam tsaynö kawayänaykipaqtsu Jesucristupa willakuyninta yachakuyashkanki. 21Jesucristupa alli willakuyninta rasunpa chaskikushqa kaykarqa y pay munanqannö kawakuyänaykipaq yachakuykarqa 22ñawpata kawayanqaykinö amana kawayaynatsu, sinöqa makwa llatapata dëjaqnö unay kawayanqaykita dëjayay.#Col. 3.9. Ñawpataqa allita rurayanqaykita yarparmi shonquykikuna munanqannö mana allikunata rurar kawayashkanki. 23Peru kananqa Espíritu Santu tantiyatsiyäshunqaykinölla kawakuyay. 24Dios Yaya kanqannö qamkunapis kayänaykipaqmi mushuq kamanqan runana kayanki. Tsaynö kaykarqa Dios Yaya munanqannö jutsannaq kawayänaykipaq mushuq kawaytana kawakuyay.#Col. 3.10.

25Ama llullatsinakuyaytsu.#Zac. 8.16. Llapaykipis juk ayllunölla kaykarqa#Rom. 12.5. rasun kaqllata parlayay.

26Rabyakurpis jutsata ama rurayaytsu.#Sal. 4.4; Stg. 1.19-20. Ama qoyat rabyashqallaqa kayaytsu. 27Rabyashqalla qoyarqa shonquykikunatam diabluta kichapuykäyanki.

28Ñawpata suwakushqa kar amana suwakuyaynatsu. Suwakuyanqaykipa rantin arukuyay. Tsaynöpam waktsakunata yanapayänaykipaq imallaykikunapis kanqa.

29Ama mana allikunata parlayaytsu. Tsaypa rantinqa runa majikita animatsiyänaykipaq alli kaqkunallata parlayay.

30Mana allikunata rurar Espíritu Santuta ama llakikatsiyaytsu. Paymi shonquykikunata sëllayäshushkanki#2Cor. 1.22; Efe. 1.13. Jesucristo kutimunqan junaq salvashqa kayänaykipaq.

31Ama pitapis chikiyaytsu, rabyapäyaytsu ni qayapäyaytsu. Ama pipa contranpis rimayaytsu ni manakaqkunata parlayaytsu. 32Tsaynö kawayanqaykipa rantin jukniki juknikipis llakipänakur kawakuyay. Jesucristo wañunqanpita Dios Yaya perdonayäshunqaykinölla perdonanakuyay.#Col. 3.13.

Currently Selected:

Efesios 4: qxn

Highlight

Copy

Compare