Daniel 3

Qoripita rurashqa monumentuta adorayanqan

1Tsaypitanam rey Nabucodonosor qoripita juk monumentuta ruratsirqan kimsa chunka (30) metru altuta y kimsa metru anchuta. Tsay monumentutam Babilonia provinciachö Dura niyanqan pampaman ichïtsirqan. 2Tsaypitanam qayatsimurqan nacionta mandäsiqninkunata, prefectukunata, gobernadorkunata, yätsikuqkunata, tesorërukunata, juezkunata, marka autoridäkunata y provinciakunachö wakin autoridäkunatapis. Paykunatam qayatsimurqan monumentuta ichïtsinqanpita kushikur fiestata rurayänanpaq. 3Tsaynö qayatsiptinmi nacionta mandäsiqninkuna, prefectukuna, gobernadorkuna, yätsikuqkuna, tesorërukuna, juezkuna, marka autoridäkuna y provinciakunachö wakin autoridäkunapis monumentu kaqman llapan qorikäyarqan.

4Tsaychömi willakuq runa jinchi nirqan: <<Entëru markakunapita y nacionkunapita shamuqkuna, tukuyläya idiömata parlaq karpis, shumaq wiyayämay. 5Imay hörapis cornëta, lauta, taksha arpa, guitärra, jatun arpa, zampöña y mas wakin instrumentukunata töcayämuqta wiyaskir juk yarpaylla llapayki rey Nabucodonosor ichïtsinqan monumentuta adorayänaykipaq qonqurikuyanki. 6Mayqaykipis tsay monumentuta qonqurikur mana adorayaptikiqa jina höram alläpa warishqa jornuman jitaykuyäshunki>>.

7Órden mantsakaypaq kaptinmi instrumentukunata töcayämunqanta wiyaskir entëru markakunapita y nacionkunapita shamuq runakuna ima idiömata parlaq karpis qonqurikuykur rey Nabucodonosor ruratsinqan qori monumentuta adorayarqan.

8Tsaypitanam juk ishkay Babilonia#3.8 Hebreo idiömachömi Caldea nin. Caldeaqa Babiloniapa jukaq shutinmi. runakuna rey kaqman aywayarqan. Chaykurnam Israel runakunapa contran 9Nabucodonosorta niyarqan: <<¡Qamllam imayyaqpis rey kanki! 10Qammi ordenashkanki cornëtata, lautata, taksha arpata, guitärrata, arpata, zampöñata y wakin instrumentukunatapis töcamuqta wiyarnin qoripita ruratsinqayki monumentupa puntanman qonqurikur llapanpis adorayänanpaq. 11Tsaynöllam ordenashkanki qonqurikuykur monumentuta mana adoraq kaqta warishqa jornuman jitarpuyänaykipaq. 12Tsaynö ordenaykaptikipis Babilonia provinciaman mandäsiyäshunaykipaq churanqayki juk ishkay Israel runakunam ninqaykita cäsuyashqatsu. Taytay rey, qam adoranqayki dioskunata paykuna manam adorayantsu. Tsay runakunam ruratsinqayki qori monumentuta adorayänanpaq ordenaykaptikipis adorayantsu. Tsay runakunam Sadrac, Mesac y Abed-nego>>.

13Tsaynö niyaptinmi Nabucodonosor alläpa rabyashqa qayatsimurqan Sadracta, Mesacta y Abed-neguta. Tsay jövinkuna reypa puntanman chaykuyaptinmi 14Nabucodonosor nirqan: <<¿Rasunpaku qamkuna diosnïkunata y qoripita ruratsinqä monumentutapis adorayankitsu? 15Kanan cornëtata, lautata, taksha arpata, guitärrata, arpata, zampöñata y wakin instrumentukunatapis töcamuqta wiyar sas qonqurikur ruratsinqä monumentuta adorayay. Mana adorayaptikiqa alläpa rawraykaq jornumanmi jitarpuyäshayki. Tsaynö rurayaptiq ¿ima diosraq salvayäshunki?>>

16Tsaynö niptinnam Sadrac, Mesac y Abed-nego Nabucodonosorta niyarqan: <<Taytay rey, tsaypaqqa imatapis ama parlashuntsu. 17Rawraykaq jornuman jitayämaptikipis serviyanqä Diosnïmi tsay jornupita y podernikipitapis salvayämanqa. 18Peru mana salvayämaptinpis noqakunaqa manam diosnikikunata serviyäshaqtsu ni tsay ruratsinqayki monumentutapis adorayäshaqtsu>>.

Rawraykaq jornupita Dios Yaya salvanqan

19Sadrac, Mesac y Abed-nego tsaynö niyaptinmi Nabucodonosor pukayayparaq rabyarnin jornu waritsiqkunata qanchis kuti mas waritsiyänanpaq ordenarqan. 20Tsaypitam valienti soldädukunata mandarqan Sadracta, Mesacta y Abed-neguta pankiskir warishqa jornuman qaykuyänanpaq. 21Tsaynö ruraskirmi tsay jornuman cäpantinta, llanqintinta, uma watäkunantinta y shukuräyanqan llatapantinta qaykuyarqan. 22-23Qaykuyaptinmi jövinkunaqa makin chakin pankishqa jornu rurinman ishkiyarqan. Sas qaykuyänanpaq rey ordenaptin alläpa warishqa jornu karmi qaykuq soldädukunata rupaskirqan. Tsaymi Sadracta, Mesacta y Abed-neguta qaykuq soldädukuna jina höra wañuskiyarqan.

24Tsayta rikaykurmi jamaykanqanpita sharkurnin Nabucodonosor alläpa mantsakashqa yätsiqninkunata nirqan: <<¿Manaku kimsan jövinkunata pankiskir jornuman qaykatsishkantsik?>>

Paykunanam niyarqan: <<Awmi, taytay rey>>.

25Tsaymi nirqan: <<¡Jornu rurinchömi chusku runakuna kachaylla y mana rupakuypa puriykaqta rikaykä! ¡Paqtankuna kaykaq runam juk diosnö kaykan!>>

26Tsaypitam Nabucodonosor jornu kaqman aywaykur qayakurqan: <<¡Poderösu Diosta adoraq Sadrac, Mesac y Abed-nego! ¡Yarquskir shayämuy!>>

Tsaymi kimsan jövinkuna jornupita yarqaskayämurqan. 27Yarqaskayämuptinmi paykuna kaqman nación mandäsiqninkuna, prefectukuna, gobernadorkuna y yätsikuqkuna rikäyänanpaq qorikäyarqan. Tsaychömi rikäyarqan tsay jövinkunata ichikllapis nina mana rupanqanta. Aqtsankunallapis ni llatapankunapis mana rupashqa kaptinmi ni rupashqanö asyäyarqantsu.

28Tsaymi Nabucodonosor nirqan: <<Sadrac, Mesac y Abed-nego adorayanqan Dios alabashqa kaykullätsun. Paymi salvananpaq angelninta kachamushqa. Diosninman confiakurmi noqa ordenanqätapis cäsuyashqatsu. Paykunaqa juk Dioskunata adorayanqanpa rantinmi wañuyänanpaqpis listu kayashqa. 29Manam ni ima diospis tsaynöqa salvantsu. Pï runatapis Sadrac, Mesac y Abed-nego adorayanqan Diospa contran parlaq kaqtaqa ichik ichiklla roquyätsun. Wajinkunatapis waykayätsun. Tsaynö katsun may nacionpita kaptinpis y ima idiömata parlaptinpis>>.

30Tsaypitanam Sadracta, Mesacta y Abed-neguta Nabucodonosor Babilonia provinciachö mandakuq autoridä kayänanpaq churarqan.

Currently Selected:

Daniel 3: qxn

Highlight

Copy

Compare