Hechos 3
3
Puriyta mana puëdiq runata kutikätsinqan
1Juk tardim las tres kaykaptin Dios Yayata mañakuyänanpaq Pedruwan Juan templuman aywayarqan. 2Templu punkuchömi yurinqanpita mana puriq runa jamaykarqan. Tsay runatam Kuyakuypaq niyanqan punkuman waran waran apayaq. Tsaychömi templupa patiunman yaykuqkunata limushnata mañakuq. 3Pedruwan Juan yaykuykaqta rikarmi paykunatapis limushnata mañakurqan. 4Mañakuptinmi tsay runata rikaykur Pedro nirqan: <<¡Rikäyämay!>>
5Tsaymi imallatapis qarananpaq kanqanta yarpar paykunata kushishqa rikararqan. 6Pedrunam nirqan: <<Manam qellaynï ni qorïpis kantsu. Peru tsaynö kaptinpis yanapashaykim. ¡Nazaretpita Jesucristupa shutinchö sas sharkur puriy!>>
7Tsaynö nirmi Pedro derëcha kaq makinpita aptarkur shäritsiptin jina höra chaki moqunkuna kutikaskirqan. 8Tsaymi sas sharkur purir qallaykurqan. Tsaypitam saltaykachar Dios Yayata alabarnin paykunawan templupa patiunman yaykurqan. 9Dios Yayata alabar puriqta rikarmi llapan runakuna 10mantsakashqa niyarqan: <<¡Payqa Kuyakuypaq niyanqan punkuchö limushna mañakuq runam!>>
11Tsay kutikaq runam Pedrutawan Juanta dëjarqantsu. Salomónpa Coredornin niyanqanchö paykuna kaykäyanqanta musyaskirmi runakuna mantsakashqa tsayman cörrilla rikaq aywayarqan.
Pedro willakunqan
12Chaykuyaptinnam Pedro nirqan: <<Israel runakuna, ¿imanirtan noqakunata rikäpäyämanki? ¿Imanirtan yarpäyanki kikïkunapa podernïkunawan o jutsannaq kaynïkunawan kay runata kutikätsiyanqäta?
13<<Abrahampa, Isaacpa, Jacobpa y unay castantsikkunapa Diosninmi#Éxo. 3.15. poderyuq kananpaq serviqnin Jesústa churashqa.#Isa. 52.13; Fil. 2.7-9. Tsaynö kaykaptinmi autoridäkuna wañutsiyänanpaq entregayashkanki. Pilato dëjayta munaptinpis manam munayashkankitsu. 14Jutsannaq santu runata dëjananpaq mañayanqaykipa rantinmi wañutsikuq runata dëjananpaq mañayarqayki.#Mat. 27.15-23; Mar. 15.6-14; Luc. 23.13-23. 15Tsaynöpam mana ushakaq kawayta qaramaqnintsikta wañutsiyarqayki. Paytam Dios Yaya kawatsimushqa. Kawaskir yuripayämanqantam noqakuna rikäyashkä. 16Paymi kay reqiyanqayki runata kutikätsishqa. Jesucristuman creyikuyaptïmi rikäyanqaykinö sänuna kaykan.
17<<Wawqikuna, Jesús salvamaqnintsik Cristo kanqanta mana musyarmi qamkuna y autoridänintsikkunapis wañutsiyarqayki. 18Tsaynö kaykaptinpis profëtankunawanmi Dios Yaya musyatsimarqantsik Cristuta wañutsiyänanpaq kanqanta. Tsaytam Dios Yaya cumplishqa.
19<<Tsaymi perdonayäshunaykipaq jutsaykikunapita arrepentikur Dios Yayata cäsuyay. 20Tsaynöpam Jesucristuta Dios Yaya yapay kachamunqa. Paytam salvamaqnintsik Cristo kananpaq unaypita akrarqan. 21Kutimunan junaq chämunqanyaqmi Jesucristo ciëluchö kanqa. Kutimurmi llapanta churanqa Dios Yaya munanqannöna kananpaq. Tsaynö kananpaq kanqantam Dios Yayapa santu profëtankuna unaypita willakuyarqan.
22<<Moiséspis [unay castantsikkunatam] nirqan: <Dios Yayam qamkunapita juk runata churanqa noqanö profëta kananpaq. Pay niyäshunqaykita cäsuyanki. 23Pipis payta mana cäsuq kaqmi qarqushqa kanqa>.#Deut. 18.15-19; 34.10.
24<<Samuel willakunqanpitam Dios Yayapa llapan profëtankunapis kanan witsay päsanqankunata willakuyarqan. 25Profëtakuna willakuyanqan promësakunam noqantsik chaskikunapaq kaykan. Tsaynöllam unay castantsikkunawan Dios Yaya pactu ruranqanpis noqantsikpaq kaykan. Tsay pactuta rurarmi Abrahamta Dios Yaya nirqan: <Qampita miraq aylluykipitam kay patsachö pïmay runakuna bendicionta chaskiyanqa>.#Gén. 12.3; 22.18. 26Abrahamta prometinqanta cumplirmi serviqnin#3.26 Tsay palabraqa griëguchö serviqnin o wamran ninanmi. Jesústa kawaskatsimur noqantsikman Dios Yaya kachamurqan. Tsaynö kachamurqan jutsantsikpita arrepentikur noqantsik puntata tsay bendicionta chaskinapaqmi>>.
Currently Selected:
Hechos 3: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.