Hechos 16

Pablutawan Silasta Timoteo compañanqan

1Tsaypitanam Pabluwan Silas Derbe y Listra markakunaman chäyarqan. Listra markachömi juk discïpulu Timoteo shutiyuq täkurqan. Timoteupa taytan mana Israel runa kaptinpis mamanqa Jesucristuman creyikuq Israel warmim karqan. 2Timoteo alli jöven kanqantam Listra y Iconio markakunachö täkuq wawqikuna y panikuna parlayarqan.

3Timoteupa taytan mana Israel runa kaptinmi pïmaypis musyayarqan Timoteo señalakunni kanqanta. Tsaymi Pablo pushayta munar tsay partikunachö täkuq Israel runakuna mana imatapis niyänanpaq Timoteuta señalatsirqan. 4Tsaypita markan markan purirmi wawqikunata y panikunata willayarqan apostolkuna y mayor wawqikuna Jerusalénchö willanakur niyanqanta cumpliyänanpaq.#Hech. 15.23-29. 5Tsaynöpam Jesucristuman creyikur wawqikuna y panikuna waran waran mas atskayäyarqan.

Macedonia runa qayakamuqta Pablo revelacionchö rikanqan

6Asia provinciaman willakuq aywayta munayaptinmi Espíritu Santu permïtirqantsu. Tsaynam Galaciapa y Frigiapa päsayarqan. 7Misia partiman chaykur Bitinia provinciapa aywayta yarpäyaptinmi Jesúspa Espïritun tsaypa aywayänanta permïtirqantsu. 8Tsaymi Misia partipa päsar Troas markaman chäyarqan. 9Juk paqasnam revelacionchö Pablo rikarqan Macedonia provinciapita juk runa ichirkur qayakamuqta: <<Taytay, Macedoniaman yanapayämänaykipaq shamuykullay>>.

10Revelación rikanqanta willayämaptinmi tantiyayarqä#16.10 Troaspitam kay libruta qellqaq Lucaspis Pabluwan purir qallaykurqan. tsay markakunamanpis alli willakuyninta chätsiyänäpaq Dios Yaya munanqanta. Tsaymi Macedoniaman aywayänäpaq saslla alistakuyarqä.

Filipos markachö willakuyanqan

11Troaspita büquiwan aywarmi Samotracia islaman chäyarqä. Waränin junaqnam Neápolis markaman chäyarqä. 12Tsaypitanam Filipos markaman chäyarqä. Filipos markaqa Macedonia provinciachö wakin markakunapita mas jatunmi kaykan. Tsaychöqa Roma runakunam täkuyan. Juk ishkay junaqmi tsaychö quëdayarqä.

13Dios Yayata mañakuyänanpaq imaypis mayu kuchunman qorikäyanqanta musyarmi jamay junaqchö markapita yarqur tsayman aywayarqä. Tsaychö warmikuna qorikashqa kaykaqtam Dios Yayapa willakuyninta willayarqä. 14Tsaychömi Tiatira markapita Lidiapis kaykarqan. Paymi granäti tëlakunata rantikuq. Mana Israel warmi karpis Dios Yayata cäsuqmi karqan. Lidiata Dios Yaya tantiyatsiptinmi Pablo willakunqanman creyikurqan. 15Paypis y wajinchö täkuqkunapis bautizakuskirmi rugakayämar niyämarqan: <<Señor Jesucristuman creyikuq majikikuna kaykaptïqa wajïman patsakuq shayämuy>>.

Tsaynö niyämaptinmi wajinman aywayarqä.

Pablutawan Silasta carcelman qaykatsiyanqan

16Juk kutim Dios Yayata mañakuq aywaykäyanqächö supaypa poderninwan suerti qatiq jipashwan tinkuyarqä. Tsay jipashmi patronninkunata atska qellayta gänatsirqan. 17Paymi Pablupa y noqakunapa qepäkunata shamur jinchi nirqan: <<¡Kay runakunam poderösu Dios Yayata serviyan! ¡Paykunam tantiyatsiyäshunki imanö salvakuyänaykipaq kanqanta!>>

18Tsaynö waran waran qatiräyämaptinmi Pablo piñakur jipashchö kaykaq supayta nirqan: <<¡Kay jipashpita yarqunaykipaqmi Jesucristupa shutinchö qamta niq!>>

Tsaynö niptinmi jina höra supay yarquskirqan.

19Tsaymi jipashpa patronninkuna qellayta manana gänayänanpaq kanqanta tantiyaskir Pablutawan Silasta prësu achkuskir autoridäkuna juzgayänanpaq pläzaman apayarqan. 20Autoridäkunaman chaykatsirmi niyarqan: <<Kay Israel runakunam marka majintsikkunata rabyatsiyan. 21Israel runakunapa costumbrinkunata rurayänanpaqmi markantsikchö yachatsikuyan. Noqantsikqa Roma runa kaykarqa manam tsay costumbrinkunata rurashwantsu>>.

22Tsaynö niyaptinmi llapan runakuna Pablupa y Silaspa contran shäriyarqan. Tsaymi autoridäkuna mandayarqan Pablupa y Silaspa llatapankunata llushtiskatsir garutiyänanpaq. 23Tsaypitam carcelman qaykaskatsir shumaq täpananpaq prësukuna cuidaq wardiata niyarqan. 24Tsaymi mas ruri kaq calabösuman qaykuskir chakinkunata cëpuman#16.24 Cëpuqa rakta tablapita rurashqam karqan. Tsaychömi runata chakipita, makipita y kunkapita karpis prësurätsiyarqan. Cëpuchömi prësukuna alläpa ñakayarqan. ullutsirqan.

25Pullan paqasnö kaykaptinmi Pabluwan Silas Dios Yayata mañakur alabayarqan. Tsaytam wakin prësukunapis wiyayarqan. 26Tsay höra illaqpita patsa alläpa kuyur carceltapis kuyutsiptinmi llapan punkunkunapis sas kichakaskirqan y prësukuna wataräyanqan cadenakunapis paskakaskirqan. 27Prësukuna cuidaq wardianam rikcharkamur punkukuna kicharaykaqta tarirqan. Tsaymi prësukuna qeshpiyanqanta yarpar espädanwan wañutsikuyta munarqan. 28Peru Pablunam jinchi nirqan: <<¡Ama wañutsikuytsu! ¡Llapämi kaykäyä!>>

29Tsaynö niptinmi aktsita mañakuskir Pabluwan Silas kaykäyanqanman cörrilla yaykuskir puntankunaman tsuktsukyarraq qonqurikuykurqan. 30Carcelpita jipiskamurmi tapurqan: <<Taytakuna, salvakänäpaq ¿imatatan ruräman?>>

31Paykunanam niyarqan: <<Señor Jesucristuman creyikuy. Payman creyikurmi qampis y wajikichö täkuqkunapis salvakäyanki>>.

32Tsaypitanam tsay wardiata y wajinchö täkuqkunatapis Señor Jesucristupa willakuyninta willayarqan. 33Tsay paqasmi wardiaqa Pablupa y Silaspa herïdankunata mayllaskir jampirqan. Tsaypitam paywan wajinchö täkuqkunapis bautizakuskir 34wajinman pushaykur mikuyta qararqan. Dios Yayaman creyikuyänanpaq tantiyanqanpitam wajinchö täkuqkunawan alläpa kushikuyarqan.

35Waränin alliqnam Pablutawan Silasta dëjayänanpaq autoridäkuna wardiakunata kachayarqan. 36Tsaymi prësukuna cuidaq wardia Pabluta nirqan: <<Autoridäkunam willakatsiyämushqa qamkunata dëjayänaqpaq. Kananqa tranquïluna aywakuyay>>.

37Pablunam wardiakunata nirqan: <<Roma runa kaykäyaptïmi manaraq juzgayämar llapanpa puntanchö garutiyämashqa y kay carcelman qaykatsiyämashqa. Kananqa ¿pakayllapa dëjayämaytaku munaykäyan? ¡Jipiyämänanpaq kikinkunaraq shayämutsun!>>

38Tsaynö ninqantam wardiakuna autoridäkunata willayarqan. Roma runa kayanqanta musyaskirmi autoridäkuna mantsakuyarqan. 39Tsaymi Pablo y Silas kaqman aywaykur perdonta mañakuyarqan. Tsaypitanam carcelpita jipiskir tsay markapita aywakuyänanpaq rugayarqan. 40Carcelpita yarquskirmi Lidiapa wajinman aywayarqan. Tsaychö wawqikunata y panikunata animaskatsirmi Filipos markapita aywakuyarqan.

Currently Selected:

Hechos 16: qxn

Highlight

Compare

Copy