1 Timoteo 6

Servikuqkuna patronninta respitayänanpaq ninqan

1Servikuqkuna patronninkunata shumaq respitayätsun. Tsaymi Dios Yayapaq y willakuyninpaq pipis mana allita parlanqatsu. 2Patronnin creyikuq majin kaptinpis ama yarpäyätsuntsu mana respitayänanpaq kanqanta, masbien creyikuq majin kaptin masraq respitayätsun. Servikuqkuna tsaynö kayänanpaq shumaq yachatsiy.

Imantsikpis kanqallanwan kushishqa kawakunapaq ninqan

3Pipis Señornintsik Jesucristupa alli willakuyninta yachatsinqanpa rantin y Dios Yaya munanqannö kawakunapaq yachatsinqanpa rantin llutanta yachatsikurqa 4yachayyuq tukunmi. Tsay runakunaqa mana ima musyaq karmi llutan yachatsikuykunapaq piñanakuyan. Tsaykunata chaskirmi runakuna chikinakur, piñanakur, qayapänakur y jaqayätsinakur kawayan. 5Mana alli yachatsikuqkunaqa kikinkunapuram manakaqkunallapaq piñanakuyan. Mana alli yarpaykunaman umankuna churashqa karmi Jesucristupa willakuynin ima kanqantapis tantiyayantsu. Tsaymi Diosta servir rïcuyäyänanpaq kanqanta yarpäyan. [Tsaynö runakunawanqa ama qorikäyaytsu.]

6Imantsikpis kanqallanwan contentakur y Dios Yaya munanqannö kawakurmi rïcu runapitapis mas alli kawakuntsik. 7Jinallantsikmi kay patsachö yurishkantsik. Tsaynöllam wañurpis jinallantsik aywakushun.#Job 1.21; Sal. 49.17; Ecl. 5.15. 8Tsaymi mikunapaq y shukukunapaq kanqallanwan kushishqa kawakushun.

9Peru rïcuyayta munaqkunam sïqa trampaman jeqaqnö imayka llutan ruraykunaman jatikar yarquyta puëdiyantsu. Tsaymi alläpa sufriyan. 10Qellaypaq ayrajashqa kaqkunaqa imaykaläya jutsatam rurayan.#Heb. 13.5. Wakin kaq wawqikuna y panikunapis rïcuyayllapaq yarpachakurmi Jesucristuman creyikuyannatsu. Tsaypitam imayka tuksikushqanöraq alläpa ñakaykäyan.

Dios Yaya munanqannö kawakunanpaq yätsinqan

11Timoteo, Dios Yayata serviq kaykarqa ama qellaypaq ayrajashqa kaytsu. Masbien Dios Yaya munanqannö imaypis kawakuy, payman creyikuy, runa majikita llakipay, pacienciakuy y pitapis alli shimillaykipa parlapay.

12Guërrachö soldädukuna mana ajayaypa pelyayanqannö qampis mana ajayaypa Jesucristuman creyikuy. Mana ushakaq kawayta chaskinaykipaq Dios Yaya qayaykäshuptikiqa imaykanöpapis pay munanqannö kawakuy. Tsayta musyarmi Jesucristuman creyikunqaykita wawqikunapa y panikunapa puntanchö willakushkanki.

13Musyankim Poncio Pilatupa puntanchö Jesucristo mana mantsakur willakunqanta.#Juan 18.37. Tsaymi Jesucristupa y llapan imaykatapis kamaq Dios Yayapa shutinchö niq: 14Señornintsik Jesucristo kutimunqanyaq kay cartachö ninqaqkunata llapantapis mana qonqar cumpliy. 15Tiempu chämuptinmi Jesucristuta kay patsaman Dios Yaya kachamunqa. Dios Yayaqa Reykunapa Reynin y señorkunapa Señornin kaykan. 16Pay japallanmi imayyaqpis kawaq kaykan y alläpa chipakyaychö kaykan.#Sal. 104.2. Paytaqa manam ni pipis rikashqatsu ni rikaytapis puëdiyantsu. ¡Llapan runakuna imayyaqpis payta alabaykuyällätsun! ¡Paypa poderninchö imayyaqpis kaykuyällätsun! Amén.

17Rïcu wawqikunata y panikunata niy mana orgullösu kayänanpaq y riquëzankunaman mana confiakuyänanpaq. Riquëzakunaqa ushakaqllam. Riquëzankunaman confiakuyanqanpa rantin [imayyaqpis kawaq] Dios Yayallaman confiakuyätsun. Paymi kushishqa kawakunapaq imaykatapis alistapämantsik.

18Tsaynölla rïcukunata yachatsiy imaypis allikunallata rurayänanpaq y wakin runakunata riquëzankunawan yanapayänanpaq. 19Dios Yayaman creyikur allikunata rurarqa mana ushakaq kawaytam tariyanqa. Tsaychöraqmi rasunpa alli kawayta tariyanqa.

Cartapa ushanan

20Timoteo, Dios Yaya willakuyninta willakunaykipaq churaykäshuptikiqa llapan ninqaqkunata shumaq cumpliy. Mana alli yachatsikuqkunataqa ama cäsuytsu. Tsay runakunaqa yachayyuq kayanqanta yarparmi manakaqkunallata yachatsikuyan. 21Wakinmi llutan yachatsikuqkunata chaskir Dios Yayaman creyikuyanqanpita witikuyashqa.

Qamta y qamwan kaykaqkunata Dios Yaya imaypis yanapaykuyälläshuy. [Amén.]

Currently Selected:

1 Timoteo 6: qxn

Highlight

Copy

Compare