1 Corintios 2
2
Jesucristo cruzchö wañunqanta Pablo willakunqan
1Wawqikuna y panikuna, qamkuna kaqman shamur manam yachayyuq runakuna parlayanqannötsu ni paykuna yarpäyanqannötsu Dios Yayapa willakuyninta yachatsikushkä. 2Tsaynö yachatsikunqäpa rantinmi Jesucristo noqantsik rayku cruzchö wañunqanta yachatsiyashkaq.
3Qamkunaman shamurmi mana tantiyatsiyänaqpaq kanqanta yarpar alläpa yarpachakushkä. 4Yachayyuq runakuna parlayanqannö y yarpäyanqannö yachatsinqäpa rantin Espíritu Santupa poderninwanmi yachatsiyashkaq. 5Dios Yayapa poderninwan yachatsiyaptiq manam runakuna yachayyuq kayanqanmantsu confiakuykäyanki, sinöqa Dios Yayamanmi.
Dios Yaya yarpanqankunata Espíritu Santu tantiyatsinqan
6Yachayyuq runakuna yarpäyanqannö mana yachatsikurpis Dios Yayapa willakuyninta shumaq tantiyarmi payman creyikuqkunata yachatsï. Dios Yayapa willakuyninqa manam yachayyuq runakuna ni poderyuq runakuna yarpäyanqannötsu. Tsay runakunaqa ushakaqllam kayan. 7Diospa yachayninta yachatsikuyanqäqa runakuna mana musyayanqanmi. Tsay yachaynintam imapis manaraq kaptin Dios Yaya churarqan gloriachö kushishqa kawanapaq. 8Kay patsachö mandakuqkunaqa manam ni mayqanpis tsayta tantiyayarqantsu. Tantiyarqa manam poderösu Señor Jesucristuta cruzchö wañutsiyanmantsu karqan. 9Mana tantiyayanqantam Dios Yayapa palabranpis nin:
<<Pipis mana rikanqanta,
mana wiyanqanta
y mana yarpanqantam
kuyaqninkunapaq Dios Yaya alistashqa>>.#Isa. 64.4.
10Tsay alistanqantaqa Espíritu Santuwanmi Dios Yaya musyatsimashkantsik. Espíritu Santu llapanta musyarmi Dios Yaya yarpanqankunata musyan. 11Runa imata yarpanqantapis shonqun musyanqannömi Espíritu Santupis Dios Yaya imata yarpanqantapis musyan. 12Noqantsikqa manam kay mundupa espïrituntatsu chaskishkantsik#2.12 Tsaynö nirmi Pablo nirqan: Manam Diosman mana creyikuq runakuna yarpäyanqannötsu yarpantsik ni paykuna kawayanqannötsu kawantsik., sinöqa Dios Yaya kachamunqan Espíritu Santutam. Tsaynöpam Dios Yaya salvamanqantsikta musyantsik.
13Qamkunataqa manam runakunapita yachakunqätatsu willaykäyaq, sinöqa Espíritu Santu tantiyatsimanqantam. Tsaymi Espíritu Santuta chaskikushqa kayaptiki paypa yarpayninkunata tantiyaykätsiyaq. 14Espíritu Santuta mana chaskiqkunaqa paypa yarpayninkunata manam chaskiyantsu. Paykunapaqqa upa yarpayllam kaykan. Espíritu Santu mana tantiyatsiptinmi tantiyayantsu. 15Peru Espíritu Santuta chaskiqkunam sïqa yachatsikunqankuna alli kanqanta tantiyar chaskiyan. Imanir chaskiyanqantapis wakinkunaqa manam tantiyayantsu. 16Dios Yayapa palabranmi nin:#2.16 Kay textuta yarpätsirmi Pablo nirqan: Dios Yayata runakuna juzgayta mana puëdiyanqannömi pay munanqannö kawaq runakunatapis juzgayta puëdiyantsu. Tsaynöllam Jesucristupa willakuyninta willakunqäpita noqatapis juzgayämanmantsu.
<<Dios Yaya yarpanqanta ¿pillaqa musyantsuraq?
Yachayyuq kananpaq ¿pillaqa yachatsintsuraq?>>#Isa. 40.13; Rom. 11.34.
Peru noqantsikmi sïqa Jesucristo yarpanqannö yarpantsik.
Currently Selected:
1 Corintios 2: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.