1 Corintios 16
16
Ofrendata qoriyänanpaq ninqan
1Jerusalénchö wawqikuna y panikunapaq ofrendata qorirqa#Rom. 15.25-26; 2Cor. 8—9. Galacia provinciachö wawqikunata y panikunata yätsinqänölla qamkunapis qoriyay. 2Semäna arur gänayanqaykipita cada domingu cada ünu aykallatapis churayanki. Ama noqa chämuptïraqqa qoriyankitsu. 3Qoriyanqayki ofrendata Jerusalénman apayänanpaq wawqikunata akrayay. Chaykamurnam paykunapaq cartata rurashaq Jerusalénman apayaptin wawqikuna y panikuna chaskiyänanpaq. 4Noqapis aywayta puëdirqa paykunawanmi aywashaq.
Maypapis aywananpaq kaqta Pablo willakunqan
5Qamkuna kaqman kutimurmi Macedonia provinciaparaq tumamushaq.#Hech. 19.21. 6Chaykamurqa talvezchi tamya killa päsanqanyaq qamkunawan quëdashaq. Tsaypita wakin markakunaman aywanäpaqmi yanapayämanki. 7Manam juk rätullaqa watukayaynikita munätsu. Dios Yaya munaptinqa qamkunawan pärashaqraqmi.
8Peru Éfesuchömi sïqa Pentecostés fiesta chämunqanyaq pärashaq. 9Atskaq runakuna conträ shäriyaptinpis Dios Yayam yanapaman kay markakunachö alli willakuyninta willakunäpaq. Tsaynö willakuptïmi Jesucristuman creyikuykäyan.#Hech. 19.8-10.
10Wawqintsik Timoteo chämuptin kushishqa chaskiykuyay. Paypis noqanömi Jesucristupa willakuyninta willakur puriykan.#1Cor. 4.17. 11Payta manakaqman ama churayaytsu. Alli kutimunanpaq yanapaykuyällay. Noqakunapis kaychö wawqikunawan y panikunawanmi payta shuyaykäyä.
12Qamkuna kaqman wakin wawqikuna shayämuptinmi Apolustapis rugakurqä qamkuna kaqman shamunanpaq. Tsaynö rugaykaptïpis manam shamuyta puëdintsu. Tsaypitaraqchi maypis shamunqa.
Cartapa ushanan
13Imapitapis alcäbu kayay. Imaykata ñakarpis Dios Yayaman confiakuyay. Mana mantsakur Dios Yaya munanqannö kawakuyay. 14Pïmaywanpis kuyanakur shumaq kawakuyay.
15Wawqikuna y panikuna, musyayankim Acaya provinciachö wawqintsik Estéfanas ayllunkunawan#1Cor. 1.16. Jesucristuman puntata creyikuyanqanta. Paykunam wawqikunata y panikunata imaykachöpis yanapaykäyan. 16Tsaymi qamkunata rugayaq paykunata cäsuyänaykipaq. Tsaynölla llapantapis paykunanö yanapayäshuqnikikunata y yachatsiyäshuqnikikunata cäsuyay.
17Estéfanas, Fortunato y Acaico qamkuna kaqpita watukamaqnï chäyämuptinmi llapaykita rikaqnöraq kushikushkä. 18Qamkunata animatsiyäshunqaykinöllam noqakunatapis animatsiyämashqa. Paykunata y paykunanö kaqkunata shumaq respitayanki.
19Asia provinciachö wawqikuna y panikunapis saludayämushunkim. Tsaynöllam Aquila y Priscila#Hech. 18.2. y wajinchö qorikaq wawqikuna y panikunapis saludayämushunki. 20Llapan wawqikuna y panikunam saludayämushunki. Llapayki respëtuykikunawan qaqllaykikunachö mutsanakur saludanakuyay.
21Noqa Pablum kikï kay salüdüta qellqamü.
22Jesucristuta pipis mana kuyaq kaqtam Dios Yaya castiganqa. ¡Señor Jesucristo, shamuykullay!
23Imaypis alli kawakuyänaykipaq Señor Jesucristo yanapaykuyälläshuy. 24Jesucristuman creyikuq majï kayaptikim llapaykita kuyayaq. [Amén.]
Currently Selected:
1 Corintios 16: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.