SAN JUAN 18
18
Chiknik runakuna Jesusta apirkansapa wañuchinankunapa.
(Mt 26.47-56; Mr 14.43-50; Lk 22.47-53)
1Tukuy chaykunata rimashkanwasha Jesuska chay wasimanta ñukaykunawan llukshirkan. Rirkanisapa Sedron yaku chimbaman. Chay chimbapi tiyarkan suk aypa olivoyuk werta. Chay wertapi Jesuska ñukaykunawan tantalla yaykurkan.
2Jesuska chay wertapi amañak ñukaykunawan tantanakuyta. Chayrayku chay rantikuk disipulun Judaska riksirkan maypimi Jesuska tantanakun nishpa. 3Chay wertapi kaptinikuna Judaska chayarkan aypa soldadukunata Tata Diospa wasinta kuydakkunata pushashpa. Fariseokunawan awtoridar saserdotekuna paykunata kacharkansapa. Judas pushaptinkuna machetinkunata uchinankunata alkusankunata apashpa rirkansapa. 4Jesuska allita yachashpa imapami shamunsapa nishpa rirkan paykunata tinkuk. Chaypina tapurkansapa:
—¿Pitatí maskaykankichi?
5Chay runakunaka aynirkansapa:
—Nasaret llaktamanta Jesustami maskaykanisapa.
Chashna willaptinkuna Jesuska willarkansapa:
—Ñukami kani.
Jesusta rantikuk Judaspish chay runakunawan tantalla karkan. 6Jesus willaptinkuna: “Ñukami kani” nishpa paykunaka ankallimanta allpapi urmarkansapa. 7Chaypina Jesuska kashkan tapurkansapa:
—¿Pitatí maskaykankichi?
Paykunaka kashkan willarkansapa:
—Nasaret llaktamanta Jesustami maskaykanisapa.
8Chaypina Jesuska kashkan willarkansapa:
—Ñami willashkaykichina ñuka Jesus kanaynita. Ñukata maskawashpaykichika ama michaychichu kay disipuluynikunata rinankunamanta.
9Chashna Jesus rimashpa ñukaykunata kuydawaykarkansapa. Paymi ñawpalla Tatanta willarkan: “Tatayni, kuwashkayki runakunata kuydashkanisapa ama sakiwanankunapa.” Chashna Jesus Tatanta roygashka kashpa kuydawarkansapa.
10Chaypina Jesusta apinayaptinkuna disipulun Simon Pedru machetinta apishpa suk runa Malkopa alli ladu rinrinta tipipurkan. Chay runa Malko sinchi kamachikuk saserdotepa wiwachun karkan. 11Chashna rinrinta tipipuptin Jesuska Pedruta willarkan:
—Chay machetikita kashkan macheti churanaykipi churay. Tatayni wañunaynipa munaptin wañusha. ¿Yuyankichu manchakushpayni Tataynita mana kasunaynita?
Soldadukuna awtoridar saserdote Anasman Jesusta pusharkansapa.
(Mt 26.57-58; Mr 14.53-54; Lk 22.54)
12Chaypina soldadukuna kamachikukninkunawan Tata Diospa wasinta kuydak runakuna Jesusta apishpa watarkansapa. 13Jesusta watashpana pusharkansapa awtoridar saserdote Anaspa wasinman. Anaska Kayfaspa suedrun karkan. Chay tiempu Kayfaska tukuy saserdotekunapa ashwan sinchi awtoridarninkuna karkan. Chayrayku Kayfaspa suedrun Anasman Jesusta pusharkansapa. 14Ñawpana Kayfaska tukuy ñukaykuna judiyu runakunapa awtoridarninikunata willarkansapa: “Ashwan alli kanman suk runalla wañunanpa ama tukuy ñukanchikuna israel runakuna wañunanchikunapa.”
Simon Pedru rimarkan Jesusta mana riksinanta.
(Mt 26.69-70; Mr 14.66-68; Lk 22.55-57)
15Chashna chay awtoridar Anaspa wasinman Jesusta pushaptinkunana Simon Pedruwan ñuka Juan washanta katirkanisapa. Chay saserdotekunapa awtoridarninka ñukata riksiwarkan. Chayrayku chay manllayba wasi pampapi ñukapish Jesusta katishpa yaykurkani. 16Ñuka yaykuptini washallapi Pedruka kiparirkan. Chaypina rirkani punku kuydak warmita willak Pedrutapish yaykuchinanpa. 17Pedruta yaykuchishpana chay warmika tapurkan:
—¿Kanpish Jesuspa disipulunchu kanki?
Chashna tapuptinna Pedruka willarkan:
—Manami disipulunchu kani.
18Chaypina sukaman chirishpankuna Anaspa wiwachunkunawan Tata Diospa wasinta kuydakkuna ninakushpankuna mashakuykarkansapa. Pedrupish paykunawan tantalla mashakuykarkan.
Saserdotekunapa awtoridarninkuna Anas Jesusta tapurkan imatami rurashka nishpa.
(Mt 26.59-66; Mr 14.55-64; Lk 22.66-71)
19Chaypina wasin ukupi saserdotekunapa awtoridarninkuna Anaska Jesustaka kallarirkan tapuyta:
—¿Pikunati disipuluykikunaka? ¿Imatati paykunata yachachinkisapa?
20Chashna tapuptin Jesuska willarkan:
—Ñuka tukuy runakuna uyariwaptin yachachikushkani. Tantanakunankuna wasikunapi Tata Diospa wasinpipish allita yachachikushkani. Mana nimata pakallallachu yachachikushkani. 21¿Imapati ñukataka tapuwanki? Yachachikuptini aypa runakuna uyariwarkansapa. Paykunata tapuy imatami yachachishkanisapa nishpa. Paykunami allita yachansapa.
22Chashna Jesus chay saserdotekunapa awtoridarninkunata ayniptin Tata Diospa wasin kuydak runa uyanpi lapyashpa willarkan:
—Ariya ¿chashnachu ayninki sinchi awtoridar saserdotetaka?
23Chaypina Jesuska willarkan:
—Ariya mana allita willaptinika willaway ima mana allitatí willashkani. Kuskata willaykaptinika ¿imapatí lapyawashkanki?
24Chaypina Anaska makin wataduta Jesustaka pushachirkan yernon Kayfasman. Paymi saserdotekunapa ashwan sinchi awtoridarninkuna karkan.
Pedru kashkan rimarkan Jesusta mana riksinanta.
(Mt 26.71-75; Mr 14.69-72; Lk 22.58-62)
25Chashna Jesusta tapunankunakaman Pedruka washapi mashakuykarkan. Chaypina paywan mashakuykak runakuna tapurkansapa:
—¿Manachu kanpish chay runapa disipulun kanki?
Chashna tapuptinkunana Pedruka willarkansapa:
—Manami disipulunchu kani.
26Chaymanta chaypi karkan awtoridar saserdotepa suk wiwachun. Payka chay rinrin tipidu Malkopa familyan karkan. Payna Pedrutaka tapurkan:
—¿Manachu kantaka kawashkayki Jesuswan tantalla chay wertapi?
27Chashna tapuptin Pedruka paytapish willarkan mana Jesusta riksinanta. Chayta rimaykaptinlla suk gallo kantarkan.
Pilatoman Jesusta pusharkansapa.
(Mt 27.1-2, 11-14; Mr 15.1-5; Lk 23.1-5)
28Chaymanta Kayfaspa wasinmanta Jesusta pusharkansapa romano awtoridar Pilatopa kamachikunan wasiman. Manara allita pakariptinra chay wasipi Jesusta chatakuk runakunaka chayarkansapa. Mana niman suk yaykunayarkansapachu. Paykunaka yuyarkansapa romanokunapa wasinpi yaykushpa Tata Diospa ñawpakninpi chuya chuya kanankunamanta chapunakunankunata. Chashna chapunakushpa Paskua fiestata rurashpa manana atipanmansapanachu mikuyta. 29Chayrayku Pilatoka llukshimurkan paykunata tapuk:
—¿Ima mana allitatí kay runaka rurashka?
30Chaypina chay chatakuk runakunaka Pilatota willarkansapa:
—Kay runaka alli rurak runa kaptinka manami pushamuymansapachu karkan kanpi chatakuk.
31Chashna ayniptinkunana Pilatoka willarkansapa:
—Kankunapa ñawpa killkaduykichipi riman imashnami kastigankichi nishpa. Chayta kasushpa kikikichilla kay runataka kastigaychi.
Chaypina chay runakunaka Pilatota willarkansapa:
—Kan mana willawaptikisapa ñukaykuna judiyu runakuna kashpaynikuna mana ni pita atipanisapachu wañuchiyta.
32Ñawpata Jesus yachachiwashpankuna ñukaykunata willawarkansapa suk kruspi wañunanta. Jesus rimashkanshina chay chiknik runakuna munarkansapa Pilato suk kruspi chakatashpa Jesusta wañuchinanpa.
33Chaypina Pilato kamachikunan wasipi kashkan yaykushpa Jesustaka ladunman kayashpa tapurkan:
—¿Kanchu kanki judiyukunapa ashwan sinchi kamachikukninkuna?
34Chaypina Jesuska willarkan:
—¿Imapati judiyukunapa kamachikukninkuna kanaynita tapuwanki? ¿Chaytaka kikikipa yuyaynikimantachu tapuwanki? Ichará maykan willashushka chashna tapuwanaykipa.
35Chashna willaptinna Pilatoka Jesusta willarkan:
—Ñuka manami judiyuchu kani chaykunata yachanaynipa. Kanpa judiyumasikikunapa awtoridarninkunami pushamushushkasapa ñukapi chatashuk. ¿Ima mana allitatí rurashkanki?
36Chaypina Jesuska Pilatota willarkan:
—Ñuka manami kay allpapi kamachikuk runachu kani. Kay allpapi kamachikuk kaptinika tukuy kasuwak runakuna amachawanmansapa karkan. Paykunaka judiyu awtoridarkunawan makanakunmansapa karkan ama apiwanankunapa. Ñukaka mana allpapi kamachikuk runachu kani.
37Chaypina Pilatoka tapurkan:
—¿Deveraschu tukuy layapi alli kamachikuk kanki?
Jesuska aynirkan:
—Ariya rimashkaykishina sinchi kamachikuk runami kani. Shamushkani kay allpapi nasik mana llullakushpa kuskata yachachikunaynipa. Tukuy alli yachachikunata kasuk runakuna ñukapa yachachikunaynita kasunsapa.
38Chashna Jesus willaptinna Pilatoka tapurkan:
—¿Imatí alli yachachikunaka?
Pilato willarkansapa Jesusta wañuchinankunapa.
(Mt 27.15-31; Mr 15.6-20; Lk 23.13-25)
Chaymanta Pilatoka chayta tapushpalla Jesusta sakirkan. Chaypina wasimanta kashkan llukshishpa Jesusta chatak runakunata willarkansapa:
—Manami kay runapika tarinichu nima laya mana alli rurashkanta kastiganaynipa. 39Kunan uyariychi. Kada Paskua fiesta ukun kankuna mañawankichi suk karselpi wichkadu runata kacharinaynipa. Kay wata ¿munankichichu kay sinchi kamachishuknikichita kacharinaynipa?
40Chashna Pilato tapuptinkunana chay runakunaka kashkan sinchita rimashpa willarkansapa:
—¡Ama Jesustaka kachariychu! ¡Barrabasta kachariy!
Chay wata Barrabas karselpi karkan wañuchikuk suwa runa kashpa.
Currently Selected:
SAN JUAN 18: qvs
Highlight
Share
Copy
Want to have your highlights saved across all your devices? Sign up or sign in
© 1992, 2008, Wycliffe Bible Translators, Inc. All rights reserved.