Juan 8
8
Runan jarukuq warmita Jesús perdonashqan
1Jesúsnami Olivos jirkanman aywakurqan. 2Tsaypita jukaqnin tuta templu patiuman kutiptinmi lapan runakuna juntaparqan. Tsaycho Jesús jamaykur yachaykätsiptinmi 3ley yachatsiqkunawan fariseukuna juk warmita payman aparqan. Tsay warmitami runanta jarukur juk runawan kaykaqta taripäkurqan. Runakunapa nawpanman ichiykatsirmi 4Jesústa tapupäkurqan kayno nir: <<Rabí, kay warmitami tarishqä runanta jarukur juk runawan kaykaqta. 5Moisés qelqashqancho nimantsi kayno warmikunataqa saqmaypa wanutsinantsipaqmi.#Lev. 20.10; Deut. 22.22-24. Qamqa ¿ima ninkitaq?>>
6Jesústa tsayno tapupäkurqan lutanta parlatsir acusapäkunanpaqmi.#8.6 Roma autoridäkunaqa manami munarqantsu Israel runakuna pitapis wanutsinanta. Tsaymi: <<Moisés qelqashqancho nishqanno saqmashun>> niptinqa Jesústa prësu tsaripäkunman karqan. <<Ama saqmashuntsu>> niptinpis ley yachatsiqkunawan fariseukuna: <<¿Imanirtaq Moisés qelqashqanta mana cäsunkitsu?>> nipäkunman karqan. Tsayta musyarmi Jesúsqa unchukuykur dëdunwan alpacho qelqarqan. 7Yaparir yaparir tapuptinnami ichirkur Jesús kayno nirqan: <<Mayqanikipis jutsaynaq karqa kay warmita saqmayta qalaykuy>>.
8Tsayno nirkurmi yapay unchuykur alpacho qelqarqan.
9Tsayno nishqanta mayaykurmi#8.9 Wakin qepa kaq griego copiakunachöqa jutsayuq kashqanta tantiyakärishpan nirmi yapashqa. awkinkunapita qalaykur lapanpis juk juklayla aywakärirqan. Aywakuptinnami tsay warmilana Jesúspa nawpancho quëdarqan. 10Tsaymi ichirkur warmita Jesús kayno nirqan: <<¿Maytaq apamushuqniki runakuna? ¿Manaku ni juklaylapis saqmashushqanki?>>
11Warminami kayno nirqan: <<Manami mayqanpis saqmamashqatsu, tayta>>.
Tsawraqa Jesús kayno nirqan: <<Noqapis manami munätsu saqmashunaykita. Kananqa wayikipana aywakuy. Itsanqa jutsata ama rurankinatsu>>.]
Pïmaypaqpis Jesús atski kashqan
12Tsaypitanami runakunata Jesús kayno nirqan: <<Noqami kay patsacho atski kaykä.#8.12 Atski kashqanta nirqa runakunata salvaq kashqanta y Dios munashqanno kawananpaq tantiyatsiq kashqantami Jesús nirqan.#Sal. 27.1; 119.105; Prov. 6.23; Isa. 49.6; Juan 9.5. Tsaymi nishqäta cäsukamaqkuna tsakaycho kawananpa trukanqa kawatsikuq atskichöna kawapäkunqa>>.
13Tsawraqa fariseukuna kayno nipäkurqan: <<Tsayno nirqa kikikipa jamuylaykipitami niykanki. Tsaymi nishqaykitaqa mana criyipäkütsu>>.#Juan 5.31.
14Jesúsnami kayno nirqan: <<Kikiläpita niptïpis nishqäkunaqa rasun kaqmi kaykan. Noqa musyämi maypita shamushqäta y mayman aywanäpaq kashqantapis. Qamkunaqa tsayta manami musyapäkunkitsu. 15Qamkunaqa yarpaynilaykipitami mana ali runa kashqäta nirkaykanki. Noqaqa manami qamkunanötsu pipaqpis parlä. 16Kachamaqnï Taytä noqawan imaypis kaptinmi pipis ali o mana ali kashqanta nirqa rasun kaqlata niykä. 17Leynikikunachöpis kaynömi niykan: <Ishkay testïgukuna tsay yarpayla niptinraqmi rasun kaq kashqanta musyantsi>.#Deut. 19.15. 18Tsay nishqannölami kachamaqnï Taytä juk testïgu y jukaq testïgunami noqa kaykä>>.
19Tsayno niptinmi kayno tapupäkurqan: <<¿Maychötaq taytayki kaykan?>>
Tsawraqa Jesús kayno nirqan: <<Qamkunaqa manami musyankitsu Taytä pï kashqanta ni noqa pï kashqätapis. Pï kashqäta musyarqa Taytä pï kashqantapis musyapäkunkimanmi>>.
20Jesús tsayno nirqan templu patiucho ofrendata shuntakuna kaqcho yachatsirmi. Tsaycho yachatsiptinpis höran manaraq chayaptinmi pipis prësu tsarirqantsu.
Jana patsapita kashqanta Jesús nishqan
21Tsaypitanami Jesús kayno nirqan: <<Aywakushaqnami. Aywakuptï ashimashpaykipis manami taripäkamankipaqtsu. Noqa aywashqä kaqmanqa manami aywayta kamäpakunkipaqtsu. Tsaypa trukanqa jutsalaykichömi wanupäkunkipaq>>.
22Tsawraqa Israel runakuna kayno nipäkurqan: <<¿Imanirtaq pay kashqan kaqman mana chayanantsipaq kashqanta niykämantsi? ¿Wanutsikuytatsuraq yarpaykan?>>
23Tsaymi Jesús kayno nirqan: <<Qamkunaqa kay patsacho yuriqlami karkaykanki. Noqami itsanqa jana patsapita shamushqä. 24<Noqami Kä>#8.24 Noqami Kä nirqa Jesucristo tantiyatsirqan kikin Dios kashqantami. Tsaypita masta musyanaykipaq liyinki Éxo. 3.14; Juan 10.30-33. niykaptïpis mana criyimarqa jutsalaykichömi wanupäkunkipaq. Tsaymi jutsalaykicho wanunaykipaq kashqanta nishqä>>.
25Tsawraqa kayno tapupäkurqan: <<¿Pitaq qam kanki?>>
Jesúsnami kayno nirqan: <<Nawpapita patsanami pï kashqätapis wilashqä. 26Jutsaykikunata careanäpaq atskaraqmi kaykan. Noqaqa kachamaqnï nimashqalantami wilapaykä. Pay nimashqankunaqa lapanpis rasun kaqlami kaykan>>.
27Jesús tsayno niykaptinpis paykuna manami tantiyapäkurqantsu Tayta Diospita parlaykashqanta. 28Tsaymi Jesús kayno nirqan: <<Runapa Tsurinta joqarirraqmi#8.28 Runapa Tsurinta joqarinanpaq kashqanta nirqa kikinta cruzcho wanutsinanpaq kashqantami nirqan. Tsaynöpis nirqan wanushqanpita kawarimuptin payta adorapäkunanpaq kashqantami. pï kashqätapis tantiyapäkunki. Tsayraqmi tantiyapäkunki munayläpita imatapis mana rurashqäta. Wilakurpis Taytä nimashqalantami wilakuykä. 29Kachamaqnïqa imaypis noqawanmi kaykan. Pay munashqalanta imaypis ruraptïmi kikilätaqa mana kachaykamantsu>>.
30Jesús tsayno niptinmi payman atskaq criyipäkurqan.
Libri kanantsipaq Jesús nishqan
31Tsaypitanami payman criyiq Israel runakunata Jesús kayno nirqan: <<Yachatsishqänöla kawarqa rasunpami discïpulükuna karkaykanki. 32Tsaymi rasunpa kaqta tantiyapäkushpayki librina kapäkunkipaq>>.
33Tsayno niptinmi kayno nipäkurqan: <<¿Imanirtaq nipäkamanki librina kanäpaq kashqanta? Noqakunaqa Abrahampita miraqkunami karkaykä. Manami imaypis jukpa ashmaynin kapäkushqätsu>>.#Mat. 3.9; Luc. 3.8.
34Tsawraqa Jesús kayno nirqan: <<Rasunpami kayno nï: Pipis jutsa ruraylacho kawarqa jutsa ruraypa ashmayninmi kaykan. 35Ashmayqa manami patronpa tsurintsu, sinöqa ashmaylami. Patronpa tsurinmi itsanqa papäninpa kaqta imatapis rurananpaq munayniyuq kaykan. 36Tsaymi ashmay kashqaykipita Tayta Diospa Tsurin jorqushuptiki rasunpa librina karkaykanki.#Gál. 5.1, 13.
37<<Musyämi Abrahampita miraq kapäkushqaykita. Abrahampita miraq kaykarpis nishqäkunata mana chaskikurmi wanutsimayta munarkaykanki. 38Taytäpa nawpancho rikashqäkunatami noqaqa wilapaykä. Qamkunapis taytayki yachatsishushqaykitami rurarkaykanki>>.
Diablupa wamran kapäkushqan
39Tsawraqa kayno nipäkurqan: <<Noqakunapa taytäqa Abrahammi kaykan>>.
Tsayno niptinmi Jesús kayno nirqan: <<Taytayki rasunpa Abraham kaptinqa pay kawashqannömi kawapäkunkiman. 40Tayta Dios nimashqankunata wilapaptïmi qamkunaqa wanutsimayta munarkaykanki. Abrahamqa manami imaypis yarparqantsu Tayta Diospa wilakuqninta wanutsiyta. 41Qamkunaqa taytayki rurashqannömi rurarkaykanki>>.
Tsawraqa kayno nipäkurqan: <<Noqakunaqa manami tsuripakuytsu karkaykä. Tayta Diosmi noqakunapa Taytäqa>>.
42Tsaymi Jesús kayno nirqan: <<Tayta Dios rasunpa Taytayki kaptinqa kuyapäkamankimanmi. Noqaqa Tayta Diospitami kay patsaman shamushqä. Manami kikïpa munayniläpitatsu shamushqä, sinöqa Taytämi kachamashqa. 43¿Imanirtaq nishqäkunata mana tantiyapäkunkitsu? Nishqäkunata chaskikuyta mana munarmi tsayno karkaykanki.
44<<Qamkunapa taytaykiqa diablumi kaykan. Tsaymi pay munashqalanta imatapis rurarkaykanki. Payqa unaypita patsa wanutsikuqmi kaykan. Lulakuq karmi imaypis rasun kaqtaqa parlantsu. Tsaymi pipis lulakurqa payno lulakuq kaykan. 45Rasun kaqta parlaptïpis noqataqa manami criyipäkamankitsu.
46<<Jutsata rurashqa kaptïqa mä mayqaykipis careapäkamay. Rasun kaqta wilakuykaptïqa ¿imanirtaq mana criyipäkamankitsu? 47Tayta Diospa wamran karqa pay nishqantami cäsukunkiman. Wamran mana karmi cäsukärinkitsu>>.
Abraham manaraq yuriptinpis Jesús kaykashqan
48Tsayno niptinmi Israel runakuna kayno nipäkurqan: <<¡Qamqa Samaria runakunanömi lutanta parlaykanki! ¡Qamchöqa supaymi kaykan!>>
49Tsawraqa Jesús kayno nirqan: <<Noqachöqa manami ima supaypis kantsu. Noqaqa manami Taytäta manakaqman churätsu. Qamkunami itsanqa manakaqman churarkaykämanki. 50Noqaqa manami alabakütsu, sinöqa lapan runakunata juzgaq Tayta Diosmi aliman churamanqa. 51Rasunpami kayno nï: Nishqäkunata chaskikuqkunaqa manami imaypis wanunqatsu>>.
52Tsawraqa Israel runakuna kayno nipäkurqan: <<Kananmi itsanqa rasunpa musyapäkü qamcho supay kaykashqanta. Abrahampis y profëtakunapis lapanmi wanukushqa. Tsayno kaykaptinpis qamqa niykanki: <Nishqäkunata chaskikuqkunaqa manami imaypis wanunqatsu>. 53¿Abrahampita mas munayniyuqtsuraq kaykanki? Abrahampis y profëtakunapis wanushqa kaykaptinqa ¿pï kashqaykitataq qamqa yarpaykanki?>>
54Tsawraqa Jesús kayno nirqan: <<Qamkuna nipäkushqaykino alabakuptïqa parlashqäkunapis manakaqlapaqmi kanman. Taytämi noqataqa aliman churamanqa. Paytami qamkunapis <Diosnïmi> nirkaykanki. 55Qamkuna manami payta reqipäkunkitsu. Noqami itsanqa reqï. <Manami reqïtsu> nirqa qamkunanömi lulakuq käman. Pay nishqankunataqa lapantami cäsukü. 56Unay ayluyki Abrahampis shamunäpaq kashqanta musyarmi kushikurqan. Shamuqta rikamarmi fiyupa kushikurqan>>.
57Tsawraqa Israel runakuna kayno nipäkurqan: <<Qamqa manami pitsqa chunka (50) watayuqlapis kankiraqtsu. Tsayno kaykarqa ¿imanöpataq Abrahamta reqinkiman karqan?>>
58Tsayno niptinmi Jesús kayno nirqan: <<Rasunpami kayno nï: Abraham manaraq yuriptin Noqami Kä>>.#8.58 Noqami Kä nirqa Jesucristo tantiyatsirqan kikin Dios kashqantami. Tsaypita masta musyanaykipaq liyinki Éxo. 3.14; Juan 10.30-33.
59Tsawraqa saqmapäkunanpaq rumita aptakarkäriptinmi Jesús pakakurqan. Tsaypitanami [runakunapa chawpinpa pasar] templupita aywakurqan.
Currently Selected:
Juan 8: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.