Hebreos 1
1
Libru qalaykunan
1Nawpataqa profëtankunawanmi Tayta Dios yaparir yaparir unay ayluntsikunata tukuynöpa wilaparqan. 2Kay ultimu tiempuchönami itsanqa Tsurin Jesucristuwanna wilakuyninta wilapämantsi. Paywanmi kay patsatapis jana patsatapis kamarqan. Paytami churarqan lapantapis munaynincho tsararänanpaq. 3Jesucristumi musyatsimantsi Tayta Dios imano kashqantapis. Payta reqirqa kikin Tayta Diostami reqintsi.#Juan 1.1-3; Col. 1.15-17. Munayniyuq palabranwanmi lapan kamashqankunatapis mandan munashqanno kananpaq. Jutsa rurashqantsipita purificashqa kanantsipaq wanurkurmi gloriaman kutirqan. Kananqa Tayta Diospa trönun alawqa kaq nawpanchömi jamaraykan.
Angilkunapitapis Jesucristo mas munayniyuq kashqan
4Tsayno karmi Tayta Diospa Tsurin Jesucristo lapan angilkunapitapis mas munayniyuq kaykan. Paypa jutinqa angilkunapa jutinpitapis mas respitashqami kaykan.#1.4 Jutinpaq parlarqa Jesús Diospa Tsurin kashqanpita y salvamaqnintsi kashqanpitami parlaykan. 5Tayta Dios manami imaypis angilkunata kayno nirqantsu:
<<Qamqa tsurïmi kanki.
Kanan junaqpitaqa taytaykinami kaykä>>.#1.5 Kanan junaqpitaqa taytaykinami kaykä nishqanqa manami puntata Tsurin mana kashqantatsu niykan, sinöqa Jesucristo Tayta Diospa Tsurin kashqanta tsay junaqpita musyatsishqantami niykan. Tsayno musyatsirqan wanushqanpita Jesucristuta kawaritsimurmi (Hech. 13.33).#Sal. 2.7.
Tsaynölami mastapis Tayta Dios nirqan:
<<Noqami paypa taytan kashaq.
Paynami noqapa tsurï kanqa>>.#2Sam. 7.14; 1Crón. 17.13.
6Tsaynölami japalan Tsurinta kay patsaman kachamushpan Tayta Dios kayno nirqan: <<Lapan angilkunapis payta adoratsun>>.#Deut. 32.43.
7Angilkunapaqmi Tayta Dios nirqan:
<<Angilnïkunata wayratanömi kachä.
Sirvimaqnï karmi bunyaypa bunyar rataykaq ninano kaykan>>.#Sal. 104.4.
8Tsurinpaqnami itsanqa kayno nirqan:
<<Tayta Dios, trönuykichömi imayyaqpis mandaq kaykanki.
Qamqa lapantapis alimi mandanki.
9Pipis alita ruraptinqa kushikunkimi.
Mana alita ruraptinqa rabyankimi.
Tsaymi Tayta Dios qamta churashushqanki pïmaypitapis mas kushishqa kanaykipaq>>.#Sal. 45.6-7.
10Tsaynöpis Tsurinpaq kaynömi nirqan:
<<Tayta Dios, qammi kamashqayki höra kay patsatapis shumaq takyatsishqanki.
Jana patsatapis makikiwanmi kamashqanki.
11Lapan kamashqayki ushakaptinpis qamqa imaypis kaykankimi.
Röpa makwayar ushakashqannömi lapanpis ushakanqa.
12Punchuta luyluqnömi kamashqaykikunatapis luylurinkipaq.
Röpata trukatsiqnölami trukaratsinkipaq.
Lapan ushakaptinpis qamqa imaypis kashqalanmi kaykanki.
Qamqa manami imaypis awkinyankitsu>>.#Sal. 102.25-27.
13Manami mayqan angilkunatapis Tayta Dios kayno nirqantsu: <<Alawqa kaq nawpäman jamakamuy lapan chikishuqnikikunata munaynikiman churanäyaq>>.#Sal. 110.1; Mat. 22.44; Hech. 2.34; Heb. 1.3.
14Tsaymi angilkunaqa Tayta Dios mandaykashqanta ruranalanpaq kaykan. Paykunatami Tayta Dios kachamun salvashqa kaqkunata yanapananpaq.#Mat. 4.11; Luc. 1.19.
Currently Selected:
Hebreos 1: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.