Gálatas 1
1
Carta qalaykunan
1-2Galacia provinciacho kaykaq wawqi panikuna:
Noqa Pablumi kay cartata qamkunapaq apaykätsimü. Apóstol kanäpaq manami runakunatsu churamashqa, sinöqa Jesucristo y payta kawaritsimuq Tayta Diosmi.
Kaycho kaykaq wawqi panikunami qamkunapaq salüdunta apatsikamun. 3Papänintsi Tayta Dios y Señor Jesucristo kuyapäshushpayki ali kawapäkunaykipaq yanapaykuläshunki. 4Papänintsi Tayta Dios munashqannömi kay patsacho jutsa ruraypita salvamänantsipaq Jesucristo wanurqan.#Mat. 20.28; Mar. 10.45; 1Tim. 2.6; Tito 2.14. 5Tayta Dios imayyaqpis alabashqa kaykulätsun. Amén.
Wawqi panikuna lutan yachatsikuyta chaskikushqan
6Musyapäkushqaykinöpis Jesucristupa kuyakuyninwanmi Tayta Dios qayashushqanki. Tsayta musyaykarqa ¿imanirtaq lutan yachatsikuyta chaskikur manaraqpis aykäta Tayta Diospita witikärishqanki? ¡Tsaytaqa manami imano tantiyakuytapis atipätsu! 7Jesucristupa wilakuyninpita mas juk wilakuyqa manami salvakunantsipaq kantsu. Tsayno kaptinpis wakin runakuna Jesucristupa wilakuyninman yaparkurmi lutankunata yacharkaykätsishunki.
8Qamkunata yachatsishqäta manakaqman churar lutanta pipis yachatsiptinqa infiernuman Tayta Dios qaykutsun. Noqakunatapis lutanta yachatsiptïqa infiernuman qaykamätsun. Jana patsapita shamuq angiltapis lutanta yachatsiptinqa infiernuman qaykutsun. 9Yapaypis kaynömi nï: Pipis Jesucristupa wilakuynin jananman lutan yachatsikuyta yapaq kaqtaqa infiernuman qaykutsun.
10Tsayno nishpä ¿runakuna alabamänantatsuraq ashiykä? ¿Runakunapita ali rikashqa kaytatsuraq munaykä? Noqaqa manami runakuna alabamänanpaqtsu yachaykätsï, sinöqa Tayta Dios: <<Alitami rurashqanki>> nimänanpaqmi.#1Tes. 2.4. Runakuna alabamänan rayku yachatsirqa manami Jesucristupa sirviqnintsu käman.
Apostolnin kananpaq Pabluta Jesucristo churashqan
11Wawqi panikuna, shumaq tantiyakäriy. Ali wilakuyta wilakushqäqa manami runakunapa yarpaynintsu kaykan. 12Tsaynöpis manami tsay wilakuyta runatsu yachatsimashqa, sinöqa kikin Jesucristumi revelacioncho tantiyatsimashqa.
13Qamkuna musyankimi nawpata Israel runakunapa costumbrinkunata cumplir imano kashqätapis. Tsay witsanqa Jesucristuta chaskikuqkunapa contran sharkur qatikacharmi lapanta ushakätsiyta munarqä.#Hech. 8.3; 22.4-5; 26.9-11. 14Wakin Israel mayïkunapitapis masmi costumbrïkunata välitsirqä.#Hech. 22.3. Lapan winay mayïkunapitapis masraqmi Moisés qelqashqankunata cumplirqä.
15Imano kaptinpis manaraq yuriptïmi Tayta Dios kuyamashpan payta sirvinäpaq akramashqa.#Isa. 49.1; Jer. 1.5. 16Nirkurmi Jesucristuta chaskikunäpaq shumaq tantiyarkatsimar#Hech. 9.3-6; 22.6-10; 26.13-18. mana Israel runakunaman wilakuyninta apanäpaq kachamashqa.
Tsayno kachamaptinmi pitapis tapukurqänatsu wilakuyninta tantiyatsimänanpaq. 17Tsaynöpis manami noqapita mas punta kaq apostolkunawan parlanäpaqpis Jerusalénman aywarqätsu. Tsaypa trukanqa Arabia partipami aywakurqä. Tsaypitanami Damasco markaman yapay kutirqä. 18Tsaypita kimsa watataraqmi Pedruwan parlaq Jerusalénman aywarqä.#Hech. 9.26-30. Tsaychömi chunka pitsqa junaq paywan qoyämurqä. 19Tsaychömi reqirqä Señor Jesucristupa wawqin Santiaguta. Itsanqa wakin apostolkunataqa manami tarirqätsu. 20Tayta Dios musyanmi mana lulakuykashqäta.
21Tsaypitanami Siria y Cilicia provinciakunapa aywarqä.#1.21 Cilicia provinciachömi Pablupa markan Tarso karqan (Hech. 9.30). Siria provinciachönami Antioquía karqan (Hech. 11.25-26). 22Judea provinciacho#1.22 Judea provinciachömi Jerusalén karqan. wawqi panikuna manami mayqanpis reqimarqanraqtsu. 23Paykunaqa kayno niqtashi mayapäkurqan: <<Qatikachämaqnintsi runami kananqa Jesucristupa wilakuyninta wilakur puriykan>>.
24Tsayno niqta mayarshi Tayta Diosta alabapäkurqan.
Currently Selected:
Gálatas 1: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.