Tito 2
2
Shumaq yachatsinanpaq Tituta yätsishqan
1Qamqa Jesucristupa wilakuynin nishqannöla wawqi panikunata yachatsiy. 2Awkinkunata yachatsinki lutanta imatapis mana rurapäkunanpaq, alilata rurar pïmaypitapis respitashqa kananpaq y shumaq yarpachakuykur imatapis rurapäkunanpaq. Tsaynöpis yachatsinki Tayta Diosman lapan shonqunwan yärakärinanpaq, kuyapäkuq kananpaq y imachöpis pacienciakuq kananpaq.
3Chakwankunatapis yachatsinki Tayta Dios munashqanno shumaq kawapäkunanpaq, pitapis mana tumpapäkunanpaq y upyalaman mana churakashqa kapäkunanpaq. Tsaypa trukanqa wakintapis yachatsipäkutsun ali kawapäkunanpaq. 4Tsaynöpis jipash kaq warmikunata yachatsipäkutsun runanta y wawankunata kuyapäkunanpaq. 5Tsaynöpis yachatsipäkutsun shumaq yarpachakuykur imatapis rurapäkunanpaq, runanta mana jarukärinanpaq, wayincho rurayninkunata shumaq rurapäkunanpaq, kuyapäkuq kapäkunanpaq y runanta cäsukärinanpaq. Tsayno ali kawaqta rikarmi Tayta Diospa palabranta pipis manakaqman mana churanqatsu.
6Tsaynöla mözukunatapis tantiyatsinki shumaq yarpachakur alilata rurapäkunanpaq. 7Runakuna rikakushunaykipaq kikikipis ali kaway. Pitapis yachatsirqa Tayta Diospa wilakuynin nishqalanta yachatsinki. 8Pipis mana rimananpaq rasun kaqlata yachatsinki. Tsayno ali yachatsiptikiqa contrantsikunapis penqakur manami wasantsita rimanqatsu.
9Ashmaykunatapis yachatsinki patronninta cäsukärinanpaq y mandashqankunata ashak ashakla rurapäkunanpaq. Tsaynöpis yachatsinki shimisapa mana kananpaq 10y patronninpa imantapis mana suwakärinanpaq. Tsaypa trukanqa patronnin yärakunanpaq alilata rurapäkutsun. Jesucristuta chaskikuq ashmaykuna ali kawaqta rikarmi runakuna tantiyakärinqa salvamaqnintsi Tayta Diospa wilakuynin ali kashqanta.
11Lapan runakunata salvananpaqmi Tayta Dios kuyapämashpantsi Jesucristuta kachamurqan. 12Paymi tantiyatsimantsi kikintsi munashqantsino kawanantsipa trukanqa jutsa ruraykunata kacharir pay munashqanno alilata rurar kawanantsipaq. 13Tsayno kawarmi salvamaqnintsi Jesucristo kutimunanyaq kamarikushqala shuyarpaykäshun. Paymi lapanpaq munayniyuq Diosnintsi kar lapan runakuna rikarpaykaptin chipchipyaykar kutimunqa.#Fil. 3.20. 14Jutsa ruraypita jorqamänantsipaqmi wanurqan.#Mat. 20.28; Mar. 10.45; Gál. 1.4; 1Tim. 2.6. Perdonamashpantsimi shuntakamashqantsi kuyashqan runakuna kanantsipaq y lapan shonquntsiwan imatapis alilata ruranantsipaq.#Éxo. 19.5; Deut. 7.6; 14.2; 1Ped. 2.9.
15Wawqi Tito, kay yätsishqäkunata pitapis mana mantsakuypa yachatsinki, shakyätsinki y tantiyatsinki. Pipis manakaqman mana churashunaykipaq shumaq kawanki.
Currently Selected:
Tito 2: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.