Mateo 11

1Chunka ishkay discïpulunkunata yachatsiyta usharkurnami Galileapa markan markan Tayta Diospa wilakuyninta wilakur Jesús purirqan.

Discïpulunkunata Bautizaq Juan Jesúsman kachashqan

Lucas 7.18-35

2Carcilcho kaykarmi Bautizaq Juan mayarqan Jesucristo imata ruraykashqantapis. Tsaymi [ishkay] discïpulunkunata Jesús kaqman kacharqan 3kayno nir tapumunanpaq: <<¿Qamkush kaykanki Tayta Dios kachamushqan Cristo o juktaraqkush shuyarpäshaq?>>

4Tsaymi Jesús kayno nirqan: <<Kutiykur Juanta wilapäkuy mayashqaykita y rikashqaykita. 5Qaprakuna rikannami. Makllukuna purinnami. Leprawan qeshyaqkuna aliyashqanami. Upakuna wiyannami.#Isa. 35.5-6. Wanushkuna kawarimushqanami. Waktsakunapis Tayta Diospa ali wilakuyninta mayaykannami.#Isa. 61.1. 6Yarpashqanno mana ruraptïpis mana ajayaypa noqaman yärakamaq runaqa kushishqami kawanqa>>.

7Juanpa discïpulunkuna kutikäriptinnami runakunata Jesús kayno nirqan: <<¿Ima rikaqtaq chunyaq jirkaman aywapäkurqayki? ¿Shoqushta wayra kuyutsiqta rikanaykipaqku? 8O ¿ima rikaqtaq aywapäkurqayki? ¿Ali röpashqa runata rikaqku aywapäkurqayki? Musyashqaykinöpis reypa wayincho taq rïcu runakunalami ali röpan jatishqa karkaykan. 9Tsayno kaptinqa ¿ima rikaqtaq aywapäkurqayki? ¿Profëtata rikaqku? Aw, profëta rikaqmi. Noqa kaynömi nï: Paynöqa manami mayqan profëtapis kashqatsu. 10Juanta kachamunanpaqmi kayno qelqaraykan: <Nänita pitsaqno runakunata kamarikatsinanpaqmi wilakuqnïta puntaykita kachashaq>.#Mal. 3.1.

11<<Rasunpami kayno nï: Lapan profëtapitapis Bautizaq Juanqa mas tantiyakuqmi. Tsayno kaptinpis Tayta Dios mandaykashqanman tsayraq yaykuqkunaqa Juanpitapis masmi tantiyapäkun.

12<<Bautizaq Juan wilakuyta qalaykushqanpita patsami Tayta Dios mandaykashqanta atska runakuna chaskiykurkaykan. Tsayno kaykaptinpis wakin runakunaqa manami munantsu tsay wilakuyta wilakärinanta, sinöqa imanöpapis tsapatami churaparkaykan. 13Juan manaraq wilakuptinmi Moiséspis y profëtakunapis tsayno kananpaq kashqanta wilakärirqan.#Luc. 16.16. 14Paykuna wilakärishqanta mana criyipäkuptikipis <Elías shamunqami> nir profëta wilakushqantaqa Juanmi cumplishqa.#Mal. 4.5; Mat. 17.10-13; Mar. 9.11-13. 15Rinriyuq kaqkunaqa nishqäkunata wiyakäritsun.

16<<Kanan tiempu runakunata ¿imamanraq tinkutsïman? Paykunaqa pläzacho puklaq wamrakunanölami karkaykan. 17Tsay wamrakunami qayarpan kayno nir: <Pinkulluta tukaptïpis manami qatswankitsu. Ayapa cantanta cantaptïpis manami waqankitsu>. Tsay wamrakunanölami kanan tiempu runakunapis karkaykan. 18Juan tantata mana mikuptin y vïnuta mana upuptinmi kayno nipäkun: <¡Payqa supaypa munayninchömi kaykan!> 19Runapa Tsurin mikuptin y upuptinmi kayno nipäkun: <¡Kay runaqa mikular upularmi purikun! ¡Impuestu cobraqkunapa y jutsasapa runakunapa yanasanmi!> Tsayno nipäkuptinpis discïpulükuna Tayta Dios munashqanno kawaptinmi Juanta y noqata Tayta Dios kachamashqan tantiyakaykan>>.

Jutsa ruraqkunata juzgananpaq Jesús nishqan

Lucas 10.13-15

20Atska milagrukunata Jesús rurashqanta rikarpis jutsa ruraykunata runakuna manami kacharirqantsu. Tsaymi Jesús kayno nirqan: 21<<¡Wawalaw, Corazín runakuna! ¡Wawalaw, Betsaida runakuna! Markaykikunacho milagrukunata rurashqäno Tiro markacho y Sidón markacho#Isa. 23.1-18; Eze. 26.1—28.26; Joel 3.4-8; Amós 1.9-10; Zac. 9.2-4. milagrukunata ruraptïqa maynami jutsa ruraykunata kacharishpan qachqa röpata jatikurkur uchpa janancho jamarpanman karqan. 22Noqa kaynömi nï: Tiro y Sidón runakunata castigashqanpitapis mas peormi juiciu final junaqcho Tayta Dios castigashunkipaq.

23<<Capernaúm runakuna, ¿jana patsaman chayanaykipaq kashqantaku yarparkaykanki? ¡Qamkunaqa Hadesman qaykushqami kapäkunkipaq! Qamkunacho rurashqä milagrukunata Sodomacho#Gén. 19.24-28. ruraptïqa jutsakunata kachariptin kananyaqmi tsay marka kaykanman karqan. 24Noqa kaynömi nï: Sodoma runakunata castigashqanpitapis mas peormi juiciu final junaqcho Tayta Dios castigashunkipaq>>.#Mat. 10.15; Luc. 10.12.

Tayta Diosta Jesús manakushqan

Lucas 10.21-22

25Tsaychömi Tayta Diosta Jesús manakurqan kayno nir: <<Jana patsacho y kay patsacho munayniyuq Papä, qamtami alabä. Manami yachaq tukuqkunatatsu yarpaykashqaykikunata musyatsishqanki, sinöqa wamrano kaqkunalatami tantiyatsishqanki. 26Tsayno kanantami munashqanki, Papä>>.

27Nirkurnami tsaycho kaykaq runakunata kayno nirqan: <<Taytämi lapantapis munaynïman churamushqa.#Juan 3.35. Tsurin kaptï pay japalanmi noqata reqiman. Tsaynöpis Taytä kaptin noqalami payta reqï. Tsaymi noqa tantiyatsishqä runakunala Taytäta reqin>>.#Juan 1.18; 10.15.

28<<Utikashqa y lakishqa kaqkuna, lapayki noqaman shapäkamuy. Noqami jamayta qoshayki. 29Noqapa yügüta matankaykiman churakäriy.#11.29 Noqapa yügüta matankaykiman churakäriy nishqanqa discïpulü kapäkuy ninanmi. Kuyapäkuq y ali shonqu kashqäta rikakamar noqapita yachakäriy. Noqapita yachakurmi jamayta taripäkunki.#Éxo. 33.14; Jer. 6.16. 30Noqapa yügü ankashlami. Manami sasa apaytsu>>.

Currently Selected:

Mateo 11: qvmB

Highlight

Copy

Compare