Josué 22
22
Rubén, Gad y pulan Manasés trïbu runakuna posisionninman kutipäkushqan
1Tsaypitanami Josuéqa Rubén trïbu, Gad trïbu y pulan Manasés trïbu runakunata qayaykur 2kayno nirqan: <<Tayta Diospa sirviqnin Moisés nishushqaykita lapantami cumplipäkushqanki. Noqa nishqäkunatapis lapantami cäsukärishqanki. 3Kananyaqmi Israel mayintsikunata mana kachaypa yanapashqanki. Tayta Diosnintsipa mandamientunkunata lapantami cumplipäkushqanki. 4Tsaymi kananqa Tayta Diosnintsi promitimashqantsino Israel mayintsikunata jamayman yaykatsishqa. Tsayno kaykaptinqa Jordán mayuta tsimparir Tayta Diospa sirviqnin Moisés qoshushqayki posisionnikiman kutikäriyna.#Núm. 32.20-32; Jos. 1.12-15. 5Itsanqa nimashqantsino lapan yachatsimashqantsi leykunata mana qonqaypa cumplipäkunki. Tayta Diosnintsita kuyashpayki munashqanno lapayki kawapäkunki. Tsaynöpis nishqankunata cumplishpayki lapan shonquykiwan y lapan voluntänikiwan payta sirvipäkunki>>.
6Tsayno yätsirkurmi ali kawapäkunanpaq bendicionta Josué qorqan. Nirkurmi cada ünun wayinkunaman kutikärinanpaq nirqan.
7Jordán mayuta Israel runakuna manaraq pasashqan witsanmi Basán partita pulan Manasés trïbu runakunata Moisés aypurqan posisionta. Wakin kaq Manasés trïbu runakunatanami posisionta Josué aypurqan Jordán mayuta tsimparkur. Tsay tsimpachömi wakin Israel runakunapis posisionta chaskipäkurqan. Basán partiman kutikunanpaq pulan Manasés trïbu runakunata bendicionta qoshpan Josué 8kayno nirqan: <<Vincishqayki runakunapa imaykantapis qechushqaykiwan pasaypa rïcumi kutirkaykanki. Atskatami uywatapis, qoritapis, qellaytapis, broncitapis, fiërrutapis y röpatapis aparkaykanki. Tsayno kaykaptinqa markaykiman chayaykur marka mayikita rakipanki>>.
9Tsayno niptinmi Rubén trïbu, Gad trïbu y pulan Manasés trïbu runakuna Israel mayinkunawan Silucho kaykashqanpita Galaadman kutikurqan. Moisésta Tayta Dios nishqannölami paykunapa posisionnin Galaadcho karqan.
Jordán mayu kuchuncho altarta rurapäkushqan
10Rubén trïbu, Gad trïbu y pulan Manasés trïbu runakuna kutiykashqanchömi Jordán mayu kuchunman chayaykur Canaán partipita manaraq tsimpar jatunkaray altarta perqapäkurqan. 11Tsay altarta perqashqanta wakin Israel runakuna musyaykur 12yarpapäkurqan Tayta Diospa contran sharkushqanta.#Lev. 17.8-9; Deut. 12.5-7. Tsaymi Siluman juntakarqan altarta perqaq runakunawan pelyaq aywapäkunanpaq. 13Manaraq pelyaq aywarmi cüra Eleazarpa tsurin Fineesta Galaadman kachapäkurqan Rubén trïbu, Gad trïbu y pulan Manasés trïbu runakunawan parlananpaq. 14Fineeswanmi aywapäkurqan Israel runakunapa chunka mandaqninkunapis. Paykunaqa cada trïbupa mandaqninmi karqan.
15Galaadman chayaykurmi Rubén trïbu runakunata, Gad trïbu runakunata y pulan Manasés trïbu runakunata kayno nipäkurqan: 16<<Israel mayintsikuna lapanmi musyayta munarkaykan imanir Tayta Diosta mana cäsukärishqaykita y imanir paypa contran sharkur juk altarta rurapäkushqaykita. 17¿Manaku yarpapäkunki jutsa ruraqkunata Peorcho Tayta Dios ushakätsishqanta?#Núm. 25.1-9. Jutsata rurapäkushqanpita manami kananyaqpis shumaqlaqa purificashqaraqtsu kaykantsi. 18¿Imanirtaq qamkunapis Tayta Diospa contran sharkur tsay altarta rurapäkushqanki? Tsayno rurashqaykipita Tayta Dios fiyupa rabyakur lapantsitachari castigamäshunpaq.
19<< <Posisionniki impüru kashqanta yarparqa noqakuna tashqä kaqman shapäkamuy tänaykipaq. Tsaychömi Tayta Diospa Sagrädu Toldunpis kaykan. Shapäkamushpaykiqa noqakuna kaqchömi qamkunapis posisionta chaskipäkunkipaq. Imano karpis juk altarta ama rurapäkunkimantsu karqan. Juk altarta sharkatsirqa Tayta Diosnintsipa contran y noqakunapa conträmi sharkurkaykanki. 20Yarpapäkuy Zerapa tsurin Acán rupatsinanpaq kaqkunata pakar jutsata rurashqanta. Tsayno rurashqanpitami Tayta Diosqa noqantsipita fiyupa rabyakurqan.#Jos. 7.1-26. Manami Acán japalantsu jutsata rurashqanpita wanurqan, sinöqa wakin Israel mayintsikunapis wanurqanmi> >>.
21Tsayno nipäkuptinmi Rubén trïbu, Gad trïbu y pulan Manasés trïbu runakunaqa Israel mayinkuna kachashqan mandaqkunata kayno nirqan: 22<<¡Tayta Dioslami Dios kaykan! ¡Paypita mas juk Diosqa manami kantsu! Paypa contran mana sharkushqäta Tayta Dios musyanmi. Juk diosta adorayta yarpar tsay altarta rurashqa kaptïqa mana kuyapaypa wanutsipäkamay. 23Tayta Diospa contran sharkur rupatsina sacrificiuta, tsaki mikuy ofrendakunata jawka kawakuy sacrificiuta rupatsinäpaq tsay altarta rurashqa kaptïqa kikin Tayta Dios juzgamätsun.
24<<Wara warantin noqakunapita miraqkunata qamkunapita miraqkuna capazchari kayno nir michäpäkunqa: <Qamkunaqa ¿imanirtaq yarpapäkunki noqakuna adorashqä Tayta Dios qamkunapapis Diosniki kashqanta? 25Noqakuna adorashqä Tayta Diosmi Jordán mayuta churashqa rakirämänantsipaq. Tsaymi qamkunaqa, Rubén trïbu y Gad trïbu runakuna kar, noqakuna adorashqä Tayta Diosta mana adorapäkunkimantsu>. Tsayno nir michaptinqa tsurïkuna Tayta Diosta manami adorapäkunqanatsu.
26<<Tsayno mana kananpaqmi tsay altartaqa rurapäkushqä. Manami rupatsina sacrificiuta ni jawka kawakuy sacrificiuta tsaycho rupatsipäkunäpaqtsu rurapäkushqä, 27sinöqa noqakunapita miraqkuna Tayta Diosta imaypis mana qonqaypa adorapäkunanpaqmi. Tsaynöpami noqakunapita miraqkuna rupatsina sacrificiuta, jawka kawakuy sacrificiuta y wakin sacrificiukunatapis Sagrädu Tolduman Tayta Diospaq rupatsiq aywaptin qamkunapita miraqkuna mana michanqapaqtsu. 28Pipis tsayno michaptinqa kaynömi nipäkunqa: <Rikapäkuy unay aylükuna Tayta Diospa altarnin niraqta rurashqanta. Tsay altarta rurarpis manami rupatsina sacrificiuta ni wakin sacrificiuta rupatsinäpaqtsu rurapäkurqan, sinöqa noqakunapis qamkunano Tayta Diosta sirvipäkushqäta musyapäkunaykipaqmi>. Pipis michaptin tsaynömi nipäkunqa. 29Noqakuna manami yarpapäkütsu juk altarta rurarpis Tayta Diospa contran sharkuykashqäta. Tayta Diosnintsipa altarnin Sagrädu Toldun nawpancho kaykaptinqa ¿imapaqnataq rupatsina sacrificiuta, tsaki mikuy ofrendata y wakin sacrificiuta rupatsinäpaq juk läducho altarta rurapäküman?>>
30Tsayno nipäkuptinmi cüra Finees y Israel runakunapa mandaqninkunapis tantiyakurqan paykuna alita rurapäkushqanta. 31Tsawraqa cüra Eleazarpa tsurin Finees kayno nirqan: <<Alita yarpar tsay altarta rurapäkushqaykita tantiyarmi kanan musyapäkü Tayta Dios noqantsiwan kaykashqanta. Tsayno kaptinqa Tayta Dios manami castigamäshunpaqtsu>>.
32Tsaypitanami Finees y paywan aywaq runakuna Galaadpita Canaánman kutikurqan. Wakin Israel runakuna kaykashqanman chayaykurmi wilapäkurqan Rubén trïbu runakuna y Gad trïbu runakuna imata nishqantapis. 33Tsayno wilaptinmi kushikushpan Tayta Diosta alabapäkurqan. Tsay junaqpita patsa manami wilanakurqannatsu Rubén trïbu runakunata y Gad trïbu runakunata ushakätsiq aywapäkunanpaq.
34Rubén trïbu y Gad trïbu runakunaqa tsay altarpa jutinta churaparqan Yarpätsikuq jutin kananpaq. Tsayno jutinta churaparqan kayno nir: <<Kay altarta rikarmi runakuna yarpanqa noqantsipis Tayta Diosta adoraykashqantsita>>.
Currently Selected:
Josué 22: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
