Josué 20

Runakuna amparakunanpaq markakunata akrapäkushqan

Números 35.6-34; Deuteronomio 4.41-43; 19.1-13

1Tsaypitanami Josuéta Tayta Dios kayno nirqan: 2<<Israel runakunata ninki Moisésta nishqänöla amparakuna markakunata akrapäkunanpaq. 3Tsay markakunamanmi runa mayinta mana yarpaypa wanutsiq runa qeshpir amparakunqa. Tsaymanmi qeshpinqa wanuq runapa aylunkuna mana wanutsinanpaq.

4<<Amparakuyta munaq kaqqa mayqan amparakuna markamanpis chayaykur marka yaykuna punkucho juntakaq mayor runakunawan parlanqa. Tsaychömi paykunata wilanqa imano wanutsishqantapis. Tsaymi mayor runakunaqa markaman yaykaykatsir rikatsinqa maynincho tänanpaqpis. 5Contran mana kaykar runa mayinta wanutsiptinqa wanuqpa legïtimu aylunkuna qepanta chayaptin mayor runakuna manami kachapanqatsu. 6Tsaypa trukanqa tsaycho taq runakunami juzgar nipäkunqa yarpaypa o mana yarpaypa wanutsishqantapis. Mana yarpaypa wanutsishqanta niptinqa tsay markalachömi tanqa mandaq cüra wanunanyaq. Tsaypitaraqmi wayinman kutikunqa>>.

7 Tayta Dios tsayno niptinmi amparakunanpaq kaq markakunata Israel runakuna akrapäkurqan Cedesta, Siquemta y Quiriat-arbata. Cedesqa Neftalí trïbu runakuna tashqan jalqakunacho kaykaq Galileachömi kaykan. Siquemqa Efraín jalqakunachömi kaykan. Quiriat-arbaqa Judá trïbu runakuna tashqan jalqakunachömi kaykan. Quiriat-arbapa jukaq jutinmi kaykan Hebrón. 8Jericóta pasar Jordán mayu wak tsimpachömi akrapäkurqan Beserta, Ramotta y Golánta. Beserqa Rubén trïbu runakuna tashqan chunyaq pampachömi kaykan. Ramotqa Galaadchömi kaykan. Golánqa Basánchömi kaykan. Basánqa Manasés trïbu runakuna tashqanchömi kaykan.

9Tsay markakuna karqan Israel runakuna y Israel runakunacho taq jäpa runakunapis mana yarpaypa runa mayinta wanutsishqanpita amparakunanpaqmi. Tsayman amparakuptinmi wanuqpa aylunkuna mana wanutsinqatsu. Tsaycho taq runakunanami juntakaykur tsay runata juzganqa yarpaypa o mana yarpaypa wanutsishqantapis musyapäkunanpaq.

Currently Selected:

Josué 20: qvmB

Highlight

Copy

Compare