Juan 6
6
Pitsqa waranqa runakuna mikushqan
Mateo 14.13-21; Marcos 6.30-44; Lucas 9.10-17
1Tsaypitanami Tiberias nishqan Galilea qochata Jesús tsimparqan. 2Qeshyaqkunata aliyätsishqanta rikarmi Jesúspa qepanta atska runakuna aywapäkurqan. 3Qocha tsimpanchönami jirkanman aywaykur discïpulunkunawan jamakurqan. 4Tsay junaqkuna Israel runakunapa Pascua fiestan chayaykämurqannami. 5Paykuna kaykashqanman atska runakuna chayashqanta rikarmi Felipita Jesús kayno nirqan: <<Kaytsika runakunapaqqa ¿maypitataq mikuyta rantimushun?>>
6Tsayno nirqan <<mä ima nimanqashi Felipe>> nishpanmi. Jesúsqa musyarqannami imata rurananpaq kashqantapis. 7Tsawraqa Felipe kayno nirqan: <<Ishkay pachak (200) junaq arur gänashqantsiwan rantimuptintsipis manami ichik ichikla yawarkunalanpaqpis aypanqatsu>>.
8Tsayno niptinmi Jesúspa discïpulun Andrés kayno nirqan (Andrésqa Simón Pedrupa wawqinmi karqan): 9<<Kaycho juk wamra tsararaykan pitsqa cebäda tantata y ishkay pescädulatami. Tsaylaqa manami aypanqatsu lapan runakunapaq>>.
10Tsawraqa discïpulunkunata Jesús kayno nirqan: <<Lapan runakunata jamakärinanpaq nipäkuy>>. Discïpulunkuna jamakärinanpaq niptinmi atska qewa jananman runakuna jamakärirqan. Runakuna pitsqa waranqanömi (5,000) kaykarqan. 11Tsay pitsqa tantata Jesús aptarkurmi Tayta Diosta manakur yusulpäki nirqan. Nirkurnami jamaraykaq runakunata [discïpulunkuna] aypurqan. Tsaynölami pescädutapis aypurqan. Aypuptinmi lapanpis saksashqa mikupäkurqan.
12Runakuna mikurkuptinnami discïpulunkunata kayno nirqan: <<Putsuqkunata lapanta shuntapäkamuy. Ama imatapis perditsishuntsu>>.
13Tsayno niptinmi pitsqa cebäda tantalapita putsuq kaqta shuntapäkurqan chunka ishkay canastata. 14Tsay milagru rurashqanta rikaykurmi runakuna kayno nipäkurqan: <<¡Kay runaqa Tayta Dios kachamunanpaq kaq profëtami kaykan!>>#Deut. 18.15-18.
15Tsayno nipäkushpanmi mandaqnin rey kananpaq imaykanöpapis churayta munapäkurqan. Tsayta tantiyarmi jirkapa Jesús japalan aywakurqan.
Yaku jananpa Jesús aywashqan
Mateo 14.22-27; Marcos 6.45-52
16Patsa tsakaykaptinnami Jesúspa discïpulunkuna kutipäkurqan qocha kuchunman. 17Patsa tsakashqanyaqpis Jesús mana kutimuptinmi büquiman witsarkur Capernaúm markaman aywapäkurqan. 18Aywarkaykaptinmi fiyupa wayraptin yaku pulchaqyayta qalaykurqan. 19Tsaypita juk lëwatano aywarkaykashqanchömi Jesústa rikapäkurqan yaku jananpa paykuna kaqman aywaykaqta. Tsayta rikaykurmi fiyupa mantsakarqan. 20Tsawraqa Jesús kayno nirqan: <<¡Noqami kaykä! ¡Ama mantsakamaytsu!>>
21Niptinmi Jesús witsänanpaq büquita ichitsirqan. Tsaypita rätulami qocha kuchunman chayarqan.
Imayyaqpis kawatsikuq tanta kashqanta Jesús nishqan
22Patsa wararkuptinnami quëdaq runakuna tantiyakärirqan tsaycho kaykaq juklayla büquiwan discïpulunkuna aywakärishqanta. Tsaynöpis cuentata qokärirqan paykunawan Jesús mana aywashqantami. 23Tsayno karkaykaptinmi Tiberias markapita büquikuna chayarqan Señor Jesús tantata qarashqan cercanman. 24Jesústapis ni discïpulunkunatapis mana tarishpanmi tsay büquikunawanna Jesústa ashir Capernaúm markaman aywapäkurqan.
25Capernaúmcho tariykurmi tapupäkurqan kayno nir: <<Rabí, ¿imaytaq kayman shamushqanki?>>
26Tsaymi Jesús kayno nirqan: <<Rasunpami kayno nï: Manami qamkunaqa milagrukunata rikartsu ashirkaykämanki, sinöqa saksaqpaq mikushqalaykipitami. 27Pachalaykipaq arunaykipa trukanqa imayyaqpis kawatsikuq mikuypaq arupäkuy. Tsay mikuytaqa Runapa Tsurinmi kamaripäshunki. Tsaypaqmi Tayta Dios kachamushqa>>.
28Tsayno niptinmi kayno tapupäkurqan: <<Tayta Diospa aruynincho arunäpaq ¿imatataq rurapäküman?>>
29Tsawraqa Jesús kayno nirqan: <<Tayta Diospa aruyninqa kaykan kachamushqanman yärakärishqaykimi>>.
30Tsayno niptinmi kayno nipäkurqan: <<Tayta Dios kachamushushqaykita criyipäkunäpaqqa mä juk milagruta ruray. 31Unay ayluntsikunaqa chunyaq jirkacho manátami mikupäkurqan. Tayta Diospa palabranchöpis kaynömi qelqaraykan: <Jana patsapita kaq tantatami mikunanpaq kamariparqan> >>.#Éxo. 16.4, 15; Sal. 78.24.
32Tsawraqa Jesús kayno nirqan: <<Rasunpami kayno nï: Manami Moiséstsu jana patsapita kaq tantata kamariparqan, sinöqa Taytämi. Paymi jana patsapita rasunpa kawatsikuq tantataqa qarapäkushunki. 33Tsay tantaqa jana patsapita shamuq runami kaykan. Paymi pïmaytapis mana ushakaq kawayta qonqa>>.
34Tsawraqa kayno nipäkurqan: <<Tayta, tsay tantataqa imaypis kamaripaykalämay>>.
35Tsayno niptinmi Jesús kayno nirqan: <<Noqami kawatsikuq tanta kaykä. Noqata chaskikamaq kaqqa imaypis manami mikananqanatsu ni yakunanqanatsu. 36Nawpata nishqänölami rikaykämarpis criyipäkamankitsu.
37<<Taytä qomashqan runakunaqa lapanmi chaskikaman. Noqata chaskikamaqkunataqa manami pitapis qarqushaqtsu. 38Manami kikï munashqäta ruranäpaqtsu jana patsapita shamushqä, sinöqa kachamaqnï munashqanta ruranäpaqmi. 39Kachamaqnï [Taytä] manami munantsu qomashqan runakunata ni juklaylatapis oqranäta, sinöqa lapantapis juiciu final junaqcho kawaritsimunätami. 40Payqa munan lapanpis Tsurinman criyiqkuna mana ushakaq kawayta tarinantami. Paykunataqa juiciu final junaqchömi kawaritsimushaq>>.
41<<Noqaqa jana patsapita shamuq tantami kaykä>> niptinmi tsaycho kaykaq Israel runakuna Jesústa manakaqman churar 42kayno nipäkurqan: <<Kay runaqa ¿manaku Josépa tsurin Jesús kaykan? Musyantsimi maman y taytan pï kashqantapis. ¿Imanirtaq payqa <jana patsapitami shamushqä> niykämantsi?>>
43Tsayno niptinmi Jesús kayno nirqan: <<Manakaqman ama churapäkamaytsu. 44Kachamaqnï Taytä mana tantiyatsiptinqa manami pipis chaskikamanmantsu. Chaskikamaqkunataqa juiciu final junaqchömi kawaritsimushaq. 45Profëtakuna qelqashqanchöpis kaynömi niykan: <Lapan runakunata kikïmi yachatsishaq>.#Isa. 54.13. Tsay nishqannölami Tayta Dios tantiyatsishqanta chaskikuq kaqkunaqa lapanpis chaskikaman. 46Tayta Diosta manami pipis rikashqatsu. Diospita shamuq runalami paytaqa rikashqa. 47Rasunpami kayno nï: Noqata chaskikamaqkunaqa mana ushakaq kawaytami taripäkunqa.
48<<Noqaqa kawatsikuq tantami kaykä. 49Unay ayluykikuna chunyaq jirkacho manáta mikurpis wanupäkurqanmi. 50Jana patsapita shamuq tantata mikuqkunami itsanqa mana wanunqatsu. 51Noqami jana patsapita shamuq kawaykaq tanta kaykä. Pipis kay tantata mikurqa mana ushakaq kawaytami tarinqa. Kay tantaqa kikïpa aytsämi kaykan. Runakuna mana ushakaq kawayta tarinanpaqmi aytsäta sacrificiutano Tayta Diosta qoykushaq>>.
52Tsayno niptinmi Israel runakuna kikinpura rimanakurqan kayno nir: <<¿Imanöpataq kay runa aytsanta mikatsimäshun?>>
53Tsawraqa Jesús kayno nirqan: <<Rasunpami kayno nï: Runapa Tsurinpa aytsanta mana mikurqa y yawarninta mana upurqa manami mana ushakaq kawayta taripäkunkitsu. 54Aytsäta mikur y yawarnïta upurmi itsanqa mana ushakaq kawayta taripäkunki y juiciu final junaqchöpis kawaritsimushayki. 55Noqapa aytsäqa rasunpa kaq mikuymi y yawarnïpis rasunpa kaq yakumi. 56Aytsäta mikuq kaqqa y yawarnïta upuq kaqqa noqawanmi juklaylano kanqa y noqapis paywanmi juklaylano kashaq.
57<<Noqa kawaykä kachamaqnï y imayyaqpis kawaq Taytä kawayta qomaptinmi. Taytäpita kawayta chaskishqänölami aytsäta mikuq kaqkunapis noqapitaraq kawayta chaskinqa. 58Jana patsapita shamuq tantaqa noqami kaykä. Tsay tantaqa manami unay ayluykikuna manáta mikushqannötsu kaykan. Paykunaqa manáta mikurpis wanurqanmi. Kay tantata mikuqkunami itsanqa imayyaqpis kawapäkunqapaq>>.
59Jesús tsayno yachatsirqan Capernaúmcho kaykaq sinagögachömi.
Jesús yachatsishqankuna mana ushakaq kawayta qomänantsipaq kashqan
60Tsayno yachatsishqanta mayashpanmi Jesúspa atska discïpulunkuna kayno nipäkurqan: <<Kay yachatsikuykunaqa sasa tantiyaymi kaykan. Tsayno parlaptinqa ¿piraq payta criyinqa?>>
61Tsayno nirkaykashqanta tantiyarmi Jesús kayno nirqan: <<¿Yachatsishqaläpitaku rabyapäkunki? 62Tsayno rabyakurqa ¿imataraq nipäkunki Runapa Tsurin jana patsaman kutiykaqta rikapäkushpayki? 63Manami pipis kikilanpitatsu mana ushakaq kawayta tarin, sinöqa Espïritupitaraqmi. Noqa yachatsishqäqa Espíritu Santupita karmi mana ushakaq kawayta qoshunaykipaq kaykan. 64Tsayno kaykaptinpis wakinnikiqa nishqäkunata manami criyinkitsu>>.
Jesús tsayno nirqan mayqan runakuna payta mana chaskikushqanta musyarmi. Tsaytaqa qalaykunanpita patsami musyarqan. Tsaynölami musyarqan mayqan discïpulun payta rantikunanpaq kashqantapis.
65Tsawraqa Jesús kayno nirqan: <<Wakinniki mana criyipäkushqaykitaqa maynami kayno nishqä: <Taytä mana tantiyatsiptinqa manami pipis chaskikamanmantsu> >>.
66Nishqankunata mayaykurmi atska discïpulunkuna Jesústa kacharir aywakärirqan. 67Aywakäriptinmi chunka ishkay akrashqan kaq discïpulunkunata Jesús kayno tapurqan: <<¿Qamkunapis aywakuytaku munarkaykanki?>>
68Tsawraqa Simón Pedro kayno nirqan: <<Tayta, qampita mas jukqa manami pipis kantsu qatiränäpaq. Nishqaykikunaqa mana ushakaq kawayta taripäkunäpaqmi kaykan. 69Noqakunaqa qammanmi criyipäkü. Qamqa Tayta Dios kachamushqan santu runami kaykanki#6.69 Wakin qepa kaq griego copiakunaqa kaynömi nipäkun: Qamqa kawaykaq Tayta Diospa Tsurin Cristumi kaykanki.>>.#Mat. 16.16; Mar. 8.29; Luc. 9.20.
70Tsawraqa Jesús kayno nirqan: <<¿Manaku discïpulükuna kanaykipaq qamkunata chunka ishkayta akrashqä? Tsayno kaptinpis jukqa diablupa munayninchömi kaykan>>.
71Jesús tsayno nirqan Simónpa tsurin Judas Iscariotipaqmi. Payqa apostolnin kaykarpis Jesústa wanutsinanpaqmi rantikurqan.
Currently Selected:
Juan 6: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.