Jueces 13

Sansón yurishqan

1Tsaypitanami Israel runakuna mana cäsukur Tayta Diosta yapay rabyanätsirqan. Tsaymi Tayta Dios manana yanapaptin filisteo runakuna chusku chunka (40) wata nakatsirqan.

2Tsay witsanmi Manoa jutiyuq runa tarqan Zora markacho. Payqa Dan trïbupitami karqan. Warmin qoluq kaptinmi tsurin karqantsu. 3Juk junaqmi Manoapa warminta Tayta Diospa angilnin yuriparkur kayno nirqan: <<Kananyaq qoluq kashqa karpis olqu wawatami tarinkipaq. 4Wawayki yurinanyaq vïnuta ni ima shinkatsikuqtapis ama upunkitsu. Tsaynöla impüru kaq uywakunatapis#Lev. 11. ama mikunkitsu. 5Pachaykicho kaykaptilanmi wawaykita Tayta Dios akranqa nazareo kananpaq.#Núm. 6.1-21. Tsaymi aqtsanta imaypis mana rutukunqatsu. Paymi Israel runakunata filisteo runakunapa munayninpita jorquyta qalaykunqa>>.

6Ángel tsayno niptinmi runanta wilarqan kayno nir: <<Tayta Diospa wilakuqninmi chayamushqa. Kikin Tayta Diospa angilnin niraq mantsariypaqmi kashqa. Manami maypita kashqanta ni pï kashqantapis tapushqätsu, ni kikinpis manami wilamashqatsu. 7Paymi nimashqa wamrantsi olqu kananpaq kashqanta. Kananpitaqa manashi upushaqtsu vïnuta ni ima shinkatsikuqtapis. Impüru kaq uywakunatapis manashi mikushaqtsu. Manaraqpis yuriptinshi wamrantsitaqa Tayta Dios akranqa yurishqanpita wanunanyaq nazareo kananpaq>>.

8Tsawraqa Tayta Diosta manakushpan Manoa kayno nirqan: <<Tayta Dios, yapay tsay runata kachaykalämuy tsurï yuriptin imano ashmanäpaq kashqantapis tantiyatsimänanpaq>>.

9Tsayno manakuptinmi Manoapa warminta ángel yapay yuriparqan chakracho kikilan kaykaptin. 10Tsaymi warmiqa warakayla aywaykur Manoata kayno nirqan: <<¡Jukpun yuripämaq runami yapay chayamushqa!>>

11Tsawraqa Manoaqa jinan höra aywarqan runa kaykashqan kaqman. Chayaykur kayno nirqan: <<¿Qamku warmïta nishqanki qeshyaq rikakunanpaq, tayta?>>

Tsayno niptinmi kayno nirqan: <<Aw, noqami tsay runa kaykä>>.

12Tsaymi Manoa kayno tapurqan: <<Nishqaykino tsurï yuriptin ¿imanötaq ashmashaq?>>

13Tsaymi Tayta Diospa angilnin kayno nirqan: <<Lapan yätsishqäkunata warmiki cumplitsun. 14Ama mikutsuntsu üvata ni päsasta. Tsaynöpis ama uputsuntsu vïnuta ni ima shinkatsikuqtapis. Impüru kaq uywakunatapis ama mikutsuntsu. Nishqäkunata lapanta cumplitsun>>.

15Tsaymi Tayta Diospa angilninta Manoa kayno nirqan: <<Cabra malwata pishtarir mikuyta yanukamushqäyaq kaycho jamapaykay, tayta>>.

16Tsayno niptin ángel kayno nirqan: <<Yanukamuptikipis manami mikushaqtsu. Qaramänaykipa trukanqa cabra malwata Tayta Diospaq rupatsina sacrificiuta rupatsiy>>.

Tsayno niykaptinpis Manoaqa manami tantiyarqantsu Tayta Diospa angilnin kashqanta.

17Tsaymi angilta kayno nirqan: <<Nimashqaykikuna cumpliptin qamta agradëcikärinäpaq jutikita wilaykalämay, tayta>>.

18Tsayno niptin ángel kayno nirqan: <<¿Imapaqtaq jutïta musyayta munanki? Jutïtaqa manami pipis tantiyayta kamäpakuntsu>>.

19Tsawraqa cabra malwata y tsaki mikuyta jatun rumi jananman churarkur Tayta Diospaq Manoa rupatsirqan. Rupaykätsiptinmi Manoata y warminta Tayta Dios rikatsirqan imaypis mana rikashqan milagruta. 20Tsaymi altarpita nina sharkuptin warminwan Manoa rikarqan Tayta Diospa angilnin nina chawpinpita jana patsaman witsaykaqta. Tsawraqa mantsakashpan ishkanpis pampaman jukla lätakuykurqan. 21Nina chawpinpita witsaykaqta rikarmi Manoaqa tantiyarqan Tayta Diospa angilnin kashqanta. Tsaypitaqa mayqantapis ángel manami yuriparqannatsu. 22Tsaymi warminta Manoa kayno nirqan: <<¡Tayta Diostami rikashqantsi! ¡Kananqa wanushunchari!>>

23Tsayno niptinmi warmin kayno nirqan: <<Wanutsiyta munamashpantsiqa Tayta Dios manami chaskimashwantsu karqan rupatsina sacrificiuta y mikuyta rupatsishqantsitapis. Manami imatapis rikatsimashwantsu karqan ni wilamashwantsu karqan>>.

24Tsaypita wachakunanpaq killan aypämuptinnami wacharqan olqu wamrata. Jutintami churaparqan Sansón jutin kananpaq.#Heb. 11.32. Winashqanman tupumi Sansónta Tayta Dios lapancho yanaparqan. 25Mahané-dan particho taykaptinmi Tayta Diospa Espïritun payta yanapaykashqanta runakuna tantiyakurqan. Tsay partiqa Zora y Estaol markakunapa chawpinchömi kaykan.

Currently Selected:

Jueces 13: qvmB

Highlight

Copy

Compare