Habacuc 2
2
1Rikachakuna törricho marka täpaq runa mayaq mayaqla kashqannömi noqapis mayaq mayaqla shuyaraykä manakushqäta Tayta Dios contestamänanta.
Habacuc yapay manakushqanta Tayta Dios contestashqan
2Tsaymi Tayta Dios kayno nimarqan:
<<Pipis mana pantaypa liyinanpaq taksha tablacho revelashqäta shumaq qelqanki.
3Tsay revelashqäqa tiempun chayamuptinraqmi cumplinqapaq.
Jukla mana cumpliptinpis mana ajayaypa shuyaray.
Imay karpis kamakanqami.
Höran chayamuptinqa lapanpis nishqänölami kanqa.#Heb. 10.37; 2Ped. 3.8-10.
4<<Tsay runakunaqa orgullösu karmi kalpalanman yärakärin.
Paykunaqa mana alikunatami rurapäkun.
Munashqäno kawaq runaqa noqaman yärakamarmi kawanqa>>.#Rom. 1.17; Gál. 3.11; Heb. 10.38.
Fiyu runakunata Tayta Dios ushakätsinanpaq nishqan
5Orgullösu runakunaqa imaykayuqpis kayta munarmi#2.5 Wakin hebreo copiakunachöqa aläpa vïnuta upyar ninmi. jamaytapis mana taripäkuntsu.
Imaykan kaptinpis ali kawayta manami taripäkuntsu.
Munayniyuq kayta munarmi ayata sepultüra chaskiypa chaskishqanno runakunata usharkaykan.
Tsaymi juk markata juk markata atacar asularkaykan.
6Tsay vincishqan runakunami vinciqninkunata manakaqman churashpan kayno nipäkunqa:
<<¡Wawalaw! ¡Qamkunaqa runakunapa imaykantapis qechushqaykiwanmi pasaypa rïcuyaykanki!
¡Imayyaqraq suwakuylapa rïcuyarkaykanki!
7Nakatsishqayki runakuna wanutsipäkushunaykipaq elaqpita chayamuptinmi mantsariywan siksikyapäkunkipaq.
Lapan imaykitapis apakuptinmi qarapächula rikakunkipaq.
8Atska markakunapa imaykantapis apakärishqaykipitami tsaytsika soldädukuna shamur qamkunapa imaykaykikunatapis apakärinqapaq.
Tsayno rurashunkipaq nacionnïman shamur may markachöpis wanutsipäkushqaykipita y mana alikunata rurapäkushqaykipitami.
9<<¡Wawalaw! Qamkunaqa runapa imaykantapis rïcuyänaykipaq suwapaykanki.
Tsayno rïcuyar yarparkaykanki imapis mana pasashunaykipaq kashqanta.
10Tsayno rurashqaykipitami qamkuna y ayluykikuna penqapaypaq kankipaq.
Atska markakunata ushakätsishqaykipitami kikikikunatapis ushakätsishunkipaq.
11Lutanta rurashqaykitami wayipa perqankunacho kaykaq rumikunapis y terrädukunapis careashunkipaq.
12<<¡Wawalaw! Qamkunaqa runakunata wanutsir imaykantapis apakushqalaykiwanmi markaykikunata sharkatsishqanki.#Miq. 3.10.
13Tsayno kashqaykipitami lapanta mandaq Tayta Dios lapan sharkatsishqaykita ninawan ushakätsinqa.
Ushakätsiptinmi lapan arupäkushqaykipis manakaqlapaq kanqa.
14Lamarcho yaku junta kashqannömi Tayta Diosta reqiqkunapis kay patsacho junta kanqa.#Isa. 11.9.
15<<¡Wawalaw! Qamkunaqa vecïnuyki markakunata vincir penqaymanmi churarkaykanki.
Qarapächu kaykaqta rikananpaq runa mayinta shinkatsiqnömi karkaykanki.
16Tsayno rurapäkushqaykipitami respitädu kanaykipa trukanqa penqaypaq kapäkunkipaq.
Tayta Diospa castïgun winaraykaq cöpapita upuptikimi kikikitapis qarapachashunkipaq.
Kanan munayniyuq karpis wara warantin kuyapaypaqmi kapäkunkipaq.#Jer. 25.15-29; Eze. 23.32-34.
17Líbanuman aywaykur yörakunata ushar tsaycho taq uywakunata wanutsipäkushqaykipitami kikikikunatapis Tayta Dios mana kuyapaypa wanutsishunkipaq.
Runakunata may markachöpis wanutsishqaykipitami pasaypa nakapäkunkipaq.
18<<Qeruta laqlaykur rurashqan ïdulukuna ¿imapaqraq välin?
Runata engañanalanpaq kaptinqa ¿imapaqraq välin metalkunata fundiykur ïduluta rurashqan?
Shimin kaptinpis manami rimakuntsu.
¡Imanöpataq kikin ruraqpis tsayman yärakunman!
19<<¡Wawalaw! Qamkunaqa qerupita rurashqan ïdulutami <rikchay> nirkaykanki.
Tsaynöpis rumipita rurashqan ïdulutami <sharkuy> nirkaykanki.
Tsay ïdulukunaqa manami imatapis musyatsishunkitsu.
Qoriwan y qellaywan enchapashqala karpis manami kawapäkuntsu.
20 Tayta Diosqa sagrädu templunchömi kaykan.
Paypa nawpancho lapan runakuna maytsaychöpis upälakäritsun>>.#Sal. 11.4; Sof. 1.7.
Currently Selected:
Habacuc 2: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
