Ezequiel 46

Mandaq autoridä fiestakunacho imata rurananpaq nishqan

1<< <Tayta Diosmi kayno nin: Ruri kaq patiucho inti jeqamunan kaq lädu punkuqa aruy junaqkunacho wichqaräkunqami. Jamay junaqkunacho y lulu killakunachömi itsanqa kicharanqa. 2Tsay junaqkunacho mandaq autoridämi jatun kaq patiupita tsay punkupa yaykunqa. Nirkur rupatsina sacrificiuta y jawka kawakuy sacrificiuta cürakuna rupatsinanyaq punku yaykunalacho urkunpis pampaman töpashqanyaq qonqurpakuykur adoramanqa. Tsaylapitami jatun patiuman kutikunqa. Tsay punkuqa patsa tsakashqanyaqmi kicharanqa. 3Tsaynölami pampa runakunapis jamay junaqkunacho y lulu killakunacho tsay punku nawpalanpita adorapäkamanqa.

4<< <Cada jamay junaqmi mandaq autoridä noqapaq rupatsinanpaq apamunqa soqta carnishkunata y alinnin kaq carnita. Lapanpis tsaykuna sänu katsun. 5Carnita apamurqa ishkay chunka (20) kïlu tsaki mikuytami apamunqa. Carnishkunata apamurqa puëdishqalanpitami tsaki mikuy ofrendata apamunqa. Ishkay chunka (20) kïlu tsaki mikuy ofrendata apamurqa kimsa litru pulan aceitita apamunqa.

6<< <Lulu killachöqa juk turituta, soqta carnishkunata y juk carnitami sänuta apamunqa. 7Turituta apamurqa ishkay chunka (20) kïlu tsaki mikuytami apamunqa. Tsaynölami carnita apamurpis ishkay chunka (20) kïlu tsaki mikuyta apamunqa. Carnishkunata apamurmi itsanqa puëdishqalanpita tsaki mikuy ofrendata apamunqa. Ishkay chunka (20) kïlu tsaki mikuyta apamushqan jananmanmi kimsa litru pulan aceitita apamunqa.

8<< <Mandaq autoridä templu patiuman yaykurqa punkucho kaykaq cuartupami yaykunqa y tsaylapami yarqunqapis. 9Fiestakunacho adoramänanpaq shamuq pampa runakunami itsanqa norti kaq lädu punkupa yaykurqa sur kaq lädu punkupana yarqupäkunqa. Sur kaq lädu punkupa yaykuqkunaqa norti kaq lädu punkupanami yarqupäkunqa. Yaykushqan punkupaqa ama kutitsuntsu, sinöqa frentin kaq punkupami pasapäkunqa. 10Pampa runakuna yaykuptin y yarquptinpis paykunawanmi mandaq autoridäpis yaykunqa y yarqunqa.

11<< <Fiestakuna kaptin cada turituta y cada carnita pishtarkur ishkay chunka (20) kïlu tsaki mikuy ofrendatami mandaq autoridä apamunqa. Carnishkunata apamurqa puëdishqalanpitami tsaki mikuyta apamunqa. Ishkay chunka (20) kïlu tsaki mikuy ofrenda jananmanmi kimsa litru pulan aceitita apamunqa.

12<< <Mandaq autoridä voluntäninpita rupatsina sacrificiuta o jawka kawakuy sacrificiuta noqapaq apamuptinqa inti jeqamunan kaq lädu punkutami kichapanqa. Tsaypa yaykuptinmi apamushqan rupatsina sacrificiuta y jawka kawakuy sacrificiuta rupatsinqa jamay junaqkunacho rupatsishqannöla. Yarquptinnami tsay punkuta wichqanqa.

Waran waran sacrificiuta rupatsinanpaq nishqan

13<< <Cada tuta noqapaq sacrificiuta rupatsinaykipaqmi juk watayuq sänu carnishta pishtatsipäkunki. 14Tsaynöla cada tuta noqapaq apapäkamunki qanchis kïlu tsaki mikuyta y harinaman takunaykipaq juk litru aceitita. Mana qonqaypa imayyaqpis tsayno rurapäkunki. Tsay nishqäqa imayyaqpis leymi qamkunapaq kanqa. 15Rupatsina sacrificiupaq carnishta pishtarqa tsaki mikuyta y aceitita cada tutami imaypis apapäkamunki.#Éxo. 29.38-42.

Mandaq autoridä chakrankunata imano aypunanpaq nishqan

16<< <Tayta Diosmi kayno nin: Mandaq autoridä tsurinkunata chakrata aypuptinqa tsay chakrakuna imaypis tsurinkunapa herencianmi kanqa. 17Chakranpita ashmayninta aypuptinqa Jubileo watayaqlami ashmaynin tsay chakrata tsararanqa.#Lev. 25.10. Tsaypita mandaq autoridätami kutitsinqa. Tsayno kutitsinqa mandaq autoridäpa tsurinkunapa herencian tsay chakra kaptinmi.

18<< <Pampa runakunapa chakran kaqchöqa mandaq autoridä manami ima posisiontapis chaskinqatsu ni runakunapa chakrantapis qechunqatsu. Tsurinkunata herenciata kachapayta munarqa kikinpa kaqtami aypunqa> >>.

Templucho kusinakuna imano kashqanpis

19Tsaypitanami norti lädupa kaykaq punkupa runa pushamar cürakunapa cuartunkuna kashqanman chayatsimarqan. Tsay cuartukuna norti kaq lädupami rikararqan. Tsayman chayaykatsimaptinmi inti jeqanan kaq läducho juk cuartuta rikarqä. 20Tsaychömi kayno nimarqan: <<Kaychömi cürakuna yanukärinqa consagratsina sacrificiuta, purificatsina sacrificiuta y tsaki mikuy ofrendata. Kaycho yanukushqanta jatun patiumanqa ama jorqapäkunqatsu. Tsayman jorquptinqa tsaycho kaykaq runakunata ima desgraciapis pasanqami>>.

21Tsaypitami jatun patiuman yaykatsimar kuchu kuchu puritsimarqan. Cada kuchuchömi juk taksha alar karqan. 22Tsay alarkunaqa tsay tamäñulami corralashqa karqan. Largunmi karqan ishkay chunka (20) metru y anchunnami karqan chunka pitsqa metru. 23Tsay corralaraq perqapa ura tumanchömi tulpakuna kaykarqan. 24Tsaychömi kayno nimarqan: <<Kay tulpakunachömi runakuna apamushqanta templucho aruq runakuna yanukärinqa>>.

Currently Selected:

Ezequiel 46: qvmB

Highlight

Copy

Compare