Ezequiel 30
30
Egipto runakunata castigananpaq yapay nishqan
1 Tayta Diosmi kayno nimarqan: 2<<Runapa tsurin, kayno nir wilakunki:
<< <Tayta Diosmi kayno nin:
¡Egipto runakuna, fiyupa castiganäpaq kaq junaq chayaykämunnami!
¡Pasaypa lakikushpayki waqapäkuy!
3Tsay junaq janaykichönami kaykan.
Qamkunata castiganäpaq manami aykäpis pishinnatsu.
Tsay junaqqa patsapis tsakakurkuqnömi kanqa.
Lapan nacionkunapis fiyupa mantsakurmi löcutanqa.#Isa. 13.6; Joel 1.15; Sof. 1.14-18; Mal. 3.2; Apoc. 6.17.
4Nacionnikicho guërra kaptinmi tsaytsika runakuna wanunqa.
Marka murällaykikunatapis cimientunpita juchuratsirmi imaykaykikunatapis apakärinqa.
Tsayta mayaykurmi Etiopíachöpis mantsakärishpan siksikyanqa.
5<< <Tsay guërrachömi Etiopía nacionpa, Fut nacionpa, Lud nacionpa, Arabia nacionpa, Libia nacionpa y Egiptuta yanapaq wakin nacionkunapa soldädunkunapis wanupäkunqa.
6<< <Tayta Diosmi kayno nin:
Egipto nacionta yanapaqkuna lapanpis wanunqami.
Migdolpita patsa Seveniyaqmi guërracho wanupäkunqa.
Munayniyuq kar ali chölu tukuykaptinmi ushakätsinqa.
Tayta Diosmi tsayno nin.
7<< <Ushakashqan nacionkunapitapis mas peormi Egipto nación ushakanqa.
Ushakashqan markakunanölami markankunapis chipyaq ushakanqa.
8Egipto nacionta ninawan rupatsirmi lapan yanapaqninkunatapis ushakätsishaq.
Tsayraqmi Tayta Dios kashqäta musyapäkunqa.
9<< <Tsay witsanmi büquiwan Etiopíaman kachata kachashaq.
Tsayno kachashaq mana yarpachakuq Etiopía runakunapis ushakänanpaqna kashqanta wilananpaqmi.
Tsaymi Etiopía runakuna fiyupa mantsakanqa.
Tsay junaq chayamunanpaq manami aykäpis pishinnatsu.
10<< <Tayta Diosmi kayno nin:
Babilonia nacionpa mandaqnin rey Nabucodonosorwanmi Egipto nacionpa imayka riquëzankunatapis ushakätsishaq.
11Paytami imatapis mana mantsaq soldädunkunatawan Egiptuman kachashaq.
Paykunami tsay nacionta espädankunawan ushakätsinqa.
Tsaymi maytsaychöpis aya jitarpanqa.
12Nilo mayuta tsakitsirmi fiyu runakunapa makinman tsay nacionta churaykushaq.
Jäpa runakunawanmi tsay nacionta y lapan imaykankunatapis ushakätsishaq.
Tayta Diosmi tsayno nin.
13<< <Tayta Diosmi kayno nin:
Egipto runakuna rurashqan ïdulukunata lapantami ushakätsishaq.
Menfis markacho adorashqan ïdulukunatapis chipyaqmi ushakätsishaq.
Tsaykunata rikarmi tsay nacioncho taq runakuna pasaypa mantsakanqa.
Egiptucho reypis manami kanqanatsu.
14<< <Patros partita chipyaqmi asulashaq.
Zoán markata kanaypami ushakätsishaq.
Tebas marka runakunatapis lapantami juzgashaq.
15Egiptucho ali corralashqa Sin markata castigaptïraqmi rabyaynï kachakanqa.
Tebas markata y lapan imaykantapis chipyaqmi ushakätsishaq.
16<< <Egipto naciontaqa ninawanmi ushakätsishaq.
Sin markacho taqkuna nanaywanmi qochpanqa.
Tebas markapa murällankuna shilikarmi kichakanqa.
Menfis markacho taqkuna mantsakashqami imaypis kawapäkunqa.
17On markacho y Pibeset markacho taq mözukunapis guërrachömi wanupäkunqa.
Warmikunatanami juk nacionman prësu apakärinqa.
18<< <Egipto naciontaqa munayniyuq kaptinpis ushakätsishaqmi.
Orgullösu rikakushqanpitami manakaqman churashaq.
Tsay junaqmi Tafnes markacho patsapis tsakakäkunqa.
Intëru Egiptuchömi pukutaypis yanawyaraykanqa.
Lapan runakunatapis juk lädu nacionmanmi prësu apakärinqa.
19Tsaynömi jutsata rurashqanpita Egipto runakunata castigashaq.
Tsayraqmi Tayta Dios kashqäta musyapäkunqa> >>.
20Babiloniaman prësu apapäkamashqan chunka juk wata qalaykunan killa qanchis junaqchömi Tayta Dios kayno nimarqan: 21<<Runapa tsurin, Egipto nacionpa mandaqnin rey Faraónpa rikrantami pakishqä.#30.21 Kay textucho Faraónpa munaynintami rikranman tinkutsin. Manami rikranta pakishqanpitatsu parlan, sinöqa munayniynaq rikakushqanpitami parlan. Tsay pakishqä rikranta manami pipis jampipashqatsu ni astillawanpis watapashqatsu. Tsaymi espädata yapay aptananpaqpis rikran mana aliyanqanatsu.
22<<Tayta Diosmi kayno nin: <Egipto nacionpa mandaqnin Faraónpa contran sharkurmi ishkan rikranta pakirishaq. Sänu kaqta y pakishqa kaqtapis pakishaqmi. Tsayno ruraptïmi aptaraykashqan espädantapis kachapakunqa. 23Juk lädu nacionkunaman qarquptïmi Egipto runakuna matsipa matsir aywakärinqa.
24<< <Babilonia nacionpa mandaqnin reytami munayniyuq kananpaq yanapashaq.
Espädätapis paytami aptapäshaq.
Faraónpa rikrantami itsanqa pakishaq.
Tsaymi Babilonia nacionpa mandaqnin reypa nawpancho pitiykaqnöraq nanaywan atanqa.
25Yapaymi kayno nï: Babilonia nacionpa mandaqnin reytami munayniyuq kananpaq yanapashaq.
Faraóntami itsanqa munayniynaqta kacharishaq.
Babilonia nacionpa mandaqnin reytami espädäta aptapäshaq.
Paymi Egipto runakunata chipyaq wanutsinqa.
Tsaynöpami Tayta Dios kashqäta musyapäkunqa.
26<< <Maytsay nacionkunaman qarquptïmi Egipto runakuna matsiypa matsir aywakärinqa.
Tsayraqmi Tayta Dios kashqäta musyapäkunqa> >>.
Currently Selected:
Ezequiel 30: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
