Deuteronomio 27

Ebal jirkacho wankakunata ichirkatsir altarta perqananpaq nishqan

1Tsaymi lapan runakunata Moisés y Israel mayor runakuna kayno nipäkurqan: <<Kanan tantiyatsishqä mandamientukunata lapanta cumplipäkuy. 2Jordán mayuta tsimparir Tayta Dios qoykushunaykipaq kaykaq nacionman chayashpayki jatusaq wanka rumikunata jawiykur iskuwan pintapäkunki. 3Tsay wankakunaman qelqapäkunki tantiyatsishqä lapan leykunata. Tsayno qelqapäkunki unay ayluntsikunata Tayta Dios promitishqan nacionman yaykushpayki. Tsaychöqa lëchipis abëjapa mishkinpis yakunöraqmi atska kaykan. 4Tsay wankakunataqa Jordán mayuta tsimparkur Ebal jirka puntaman jawipäkunki. Kanan junaq nishqänöla tsay wankakunata iskuwan pintapäkunki.

5<<Nirkurmi Tayta Diospaq altarta tsaycho perqapäkunki. Tsay altartaqa manami laqlashqa rumikunawantsu perqanki, sinöqa laqläni rumikunalawanmi.#Éxo. 20.25. 6Laqläni rumikunawan altarta perqarkurmi rupatsina sacrificiuta Tayta Diospaq tsaycho rupatsipäkunki. 7Tsaynöpis tsay altarcho jawka kawakuy sacrificiuta rupatsir lapayki Tayta Diospa nawpancho kushishqa mikupäkunki. 8Tsay wankakunaman lapan nishqä leykunata shumaq qelqapäkunki>>.#Jos. 8.30-32.

9Tsaypitana Moisés y levita cürakuna Israel mayinkunata kayno nirqan: <<Israel runakuna, shumaq mayapäkamay. Kanan junaqpitaqa Tayta Dios akrashqan runakunami karkaykanki. 10Tsayno kaykarqa Tayta Diosta cäsukur lapan mandamientunkunata y estatütunkunata kanan tantiyatsishqäta cumplipäkuy>>.

Mana cäsukuq runakunapaq maldición imano kananpaq nishqan

11Tsay junaq Israel runakunata Moisés kayno nirqan: 12<<Jordán mayuta tsimparkur Simeón trïbu runakuna, Leví trïbu runakuna, Judá trïbu runakuna, Isacar trïbu runakuna, José trïbu runakuna y Benjamín trïbu runakuna Gerizim jirkaman witsanqa. Tsaypitami nimunqa Israel runakuna Tayta Diosta cäsukur bendicionta chaskinanpaq kashqanta.#Deut. 11.29; Jos. 8.33-35.

13<<Ebal jirkamannami witsanqa Rubén trïbu runakuna, Gad trïbu runakuna, Aser trïbu runakuna, Zabulón trïbu runakuna, Dan trïbu runakuna y Neftalí trïbu runakuna. Paykunami tsaypita nimunqa Israel runakuna Tayta Diosta mana cäsukur maldicionta chaskinanpaq kashqanta.

14<<Levitakunanami lapan Israel runakuna mayananpaq fuertipa kayno nimunqa: 15<Pipis fiërruta tsulurkatsir o qeruta laqlaypa ïduluta rurashpan pakaylapapis adoraq kaqqa maldicionashqami kanqa.#Éxo. 20.4; 34.17; Lev. 19.4; 26.1; Deut. 4.15-18; 5.8. Tsayno ruraqkunaqa Tayta Diosta rabyanätsinmi>. Tsayno niptin lapan runakuna nipäkunqa: <¡Nipäkushqaykino katsun!>

16<< <Pipis mamanta o taytanta mana respitaq kaqqa maldicionashqami kanqa>.#Éxo. 20.12; Deut. 5.16. Tsayno niptin lapan runakuna nipäkunqa: <¡Nipäkushqaykino katsun!>

17<< <Runa mayinpa chakranta qechuyta munar mujunninpaq jawishqan wankata wititsiq kaqqa maldicionashqami kanqa>.#Deut. 19.14; Job 24.2; Prov. 22.28; Ose. 5.10. Tsayno niptin lapan runakuna nipäkunqa: <¡Nipäkushqaykino katsun!>

18<< <Nänipa qapra ali aywakuykaqta lutanpa pushaq kaqqa maldicionashqami kanqa>.#Lev. 19.14. Tsayno niptin lapan runakuna nipäkunqa: <¡Nipäkushqaykino katsun!>

19<< <Jäpa runakunata, waktsakunata y viüdakunata chikiq kaqqa maldicionashqami kanqa>.#Éxo. 22.21; 23.9; Lev. 19.33-34; Deut. 24.17-18. Tsayno niptin lapan runakuna nipäkunqa: <¡Nipäkushqaykino katsun!>

20<< <Pipis papäninta penqayman churar mädistanwan kakuq kaqqa maldicionashqami kanqa>.#Lev. 18.8; 20.11; Deut. 22.30. Tsayno niptin lapan runakuna nipäkunqa: <¡Nipäkushqaykino katsun!>

21<< <Ima uywawanpis kakuq kaqqa maldicionashqami kanqa>.#Éxo. 22.19; Lev. 18.23; 20.15. Tsayno niptin lapan runakuna nipäkunqa: <¡Nipäkushqaykino katsun!>

22<< <Mamalanpita o taytalanpita paninwan kakuq kaqqa maldicionashqami kanqa>.#Lev. 18.9; 20.17. Tsayno niptin lapan runakuna nipäkunqa: <¡Nipäkushqaykino katsun!>

23<< <Pipis suedranwan kakuq kaqqa maldicionashqami kanqa>.#Lev. 18.17; 20.14. Tsayno niptin lapan runakuna nipäkunqa: <¡Nipäkushqaykino katsun!>

24<< <Traicionpita runa mayinta wanutsiq kaqqa maldicionashqami kanqa>.#Éxo. 20.13; 21.12-14. Tsayno niptin lapan runakuna nipäkunqa: <¡Nipäkushqaykino katsun!>

25<< <Wanutsinanpaq päguta chaskipakur jutsaynaq runata wanutsiq kaqqa maldicionashqami kanqa>. Tsayno niptin lapan runakuna nipäkunqa: <¡Nipäkushqaykino katsun!>

26<< <Kay tantiyatsishqä leykunata mana cumpliq kaqqa maldicionashqami kanqa>.#Jer. 11.3; Gál. 3.10. Tsayno niptin lapan runakuna nipäkunqa: <¡Nipäkushqaykino katsun!>

Currently Selected:

Deuteronomio 27: qvmB

Highlight

Copy

Compare