Deuteronomio 24

Warminpita rakikaq runa imano kananpaqpis tantiyatsishqan

1<<Aybësis cäsu kanmanmi juk runa warminwan taykashqancho penqakuypaq kaqkunata warmi rurashqan y tsayno rurashqanpita rakikaykashqan papilta firmaparkur wayinpita runa qarqushqan.#Mat. 5.31; 19.7; Mar. 10.4. 2Tsay warmi aywakur juk runawan yapay taykashqancho 3tsay runanpis rakikaykashqan papilta ruraparkur wayinpita qarquptin o tsay runan wanuptinqa 4manami punta kaq runanwan kutipänakunmantsu. Tsay warmiqa punta kaq runanpaq impüru karmi yapay kutipänakurqa Tayta Diosta fiyupa rabyanätsinqa. Tsayno rurarqa Tayta Dios qoykushunaykipaq kaykaq naciontami impüruyätsinqa.

Mas leykunata tantiyatsishqan

5<<Juk runa tsayraq warmiwan taykaptinqa guërraman ama kachapäkunkitsu ni ima autoridä kananpaqpis ama churapäkunkitsu. Juk watayaqmi tsayno libri tanqa warminta yachakätsinanpaq.

6<<Pipa tunaynintapis ni maraynintapis prenda ama tsarikurkunkitsu. Tsaykunata prenda apakuptikiqa aqakunanpaq mana kaptin mikunanpaqpis manami kanqatsu.

7<<Israel mayinta ashmayninpaq o rantikunanpaq pipis suwaptinqa tsay runata wanutsipäkunki.#Éxo. 21.16. Tsaynöpami Israel nacioncho tsay niraq runakunata elqätsinki.#1Cor. 5.13.

8<<Pitapis lepra tsariptinqa levita cürakunaman aywanqa rikapäkunanpaq. Paykunaqa musyaykanmi leprapita lapan nishqäkunata. Tsayno kaptinqa lepra tsarishuptiki imatapis ruranaykipaq nishushqaykita lapanta rurapäkunki.#Lev. 13.1—14.57. 9Qamkuna ama qonqankitsu Egiptupita aywaykämuptintsi Maríata Tayta Dios leprawan castigashqanta.#Núm. 12.10-15.

10<<Runa mayikita qellayta prestashpaykiqa wayinman ama yaykapäkunkitsu imantapis prenda apakunaykipaq. 11Yaykunaykipa trukanqa wayi punkulancho shuyaranki prendata kikin churamushqanyaq. 12Waktsa kar punchunta o jakunta prenda churamuptinqa waraynin#24.12 Wakin runakunaqa warantin nipäkun. junaqyaq ama tsararäkunkitsu. 13Tsaypa trukanqa tsay tardila kutiykatsinki qatakurkur punukunanpaq. Tayta Dios munashqanta tsayno ruraptikimi kushikur payta manakunqa bendicionninta qoykushunaykipaq.#Éxo. 22.26-27.

14<<Markaykicho taq Israel mayiki kaptinpis o jäpa runa kaptinpis waktsa kar arupäshuptiki jukla pägapäkunki. 15Tsay tardila pägapäkunki mikuyninta rantipakunanpaq. Mana pägaptikiqa Tayta Diosta quejakuptin castigashunkipaqmi.#Lev. 19.13.

16<<Tsurinpa jutsanpita ama mamanta ni papäninta wanutsipäkunkitsu. Tsaynöpis mamanpa o papäninpa jutsanpita tsurinta ama wanutsipäkunkitsu. Tsaypa trukanqa jutsa ruraq kaqta wanutsipäkunki.#2Rey. 14.6; 2Crón. 25.4; Jer. 31.29-30; Eze. 18.20.

17<<Jäpa kaptinpis waktsa kaptinpis lapan runakunata shumaq arreglapäkunki. Viüdakunapa röpantapis prenda ama tsarikurkunkitsu. 18Ama qonqapäkuytsu qamkunapis Egiptucho ashmay kar nakarkaykaptiki Tayta Dios jorqamushushqaykita. Tsaymi qamkunata yätsiykä imano kaptinpis lapan runakunata shumaq arreglapäkunaykipaq.#Éxo. 23.9; Lev. 19.33-34; Deut. 27.19.

19<<Trïgu achushqaykicho juk manöjuta qonqaykushpaykipis shuntamunaykipaq ama kutipäkunkitsu. Tsaytaqa kachaykunki markaykicho tarkaykaq jäpa runakunapaq, waktsakunapaq y viüdakunapaq. Tsayno ruraptikimi ima arushqaykimanpis Tayta Dios bendicionninta churamunqa. 20Aceitünasta cosecharpis ashi ashiykurqa ama palapäkunkitsu. Putsuq kaqqa kanqa jäpa runakunapaq, waktsakunapaq y viüdakunapaqmi. 21Üvata palarpis tikrapaylapaqa ama shuntapäkunkitsu. Quëdaq kaqqa kanqa markaykicho taq jäpa runakunapaq, waktsakunapaq y viüdakunapaqmi.#Lev. 19.9-10; 23.22. 22Egiptucho ashmay kashqaykita ama qonqapäkuytsu. Tsaymi kanan nï jäpa runakunata, waktsakunata y viüdakunata kuyapänaykipaq.

Currently Selected:

Deuteronomio 24: qvmB

Highlight

Copy

Compare