Hechos 21

Jerusalénman Pablo aywashqan

1Paykunapita despidikurirmi Cos islayaq büquiwan aywapäkurqä. Jukaqnin junaqnami Rodas islayaq aywapäkurqä. Tsaypitanami Pátara markayaq chayapäkurqä. 2Tsaychömi Feniciaman aywaq büquita taripäkurqä. Tsay büquiwan aywarmi 3Chipre islata itsuq kaq lädupa pasapäkurqä. Tsaypita Siria provinciapa aywarmi Tiro markaman chayapäkurqä. Tsaychömi büquiwan apashqan cargankunata kachaykärirqan.

4Tsaycho discïpulukunata#21.4 Discïpulukunapaq parlarqa Jesucristuman yärakuqkunapaqmi parlaykan. tariykurmi qanchis junaq paykunawan qoyäpäkurqä. Paykunami Espíritu Santu tantiyatsiptin Pabluta nipäkurqan Jerusalénman mana aywananpaq. 5Tsay markapita aywakäriptïnami wawqikuna warminkunawan y wamrankunawan lamar kuchunyaq churamarqan. Tsaychömi qonqurpakuykur Tayta Diosta lapanï manakärirqä. 6Tsaypita despidikurirna büquiman witsäpäkurqä. Paykunanami wayinkunapa kutikärirqan.

7Tiro markapita aywakurmi Tolemaida markayaq chayapäkurqä. Tsaycho wawqi panikunawan tinkurmi paykunawan juk junaq qoyapäkurqä. 8Waraynin#21.8 Wakin runakunaqa warantin nipäkun. junaq yarqurnami Cesareaman chayaykur Tayta Diospa ali wilakuyninta wilakuq Felipipa wayincho patsakärirqä. Paytami Jerusaléncho mikuyta aypunanpaq soqta wawqikunatawan nawpata akrapäkurqan.#Hech. 6.5; 8.5. 9Felipipa chusku jipash tsurinkunami Tayta Diospa profetïsankuna karqan.

10Tsaycho atska junaqna kaykaptïmi Judea provinciapita Agabo jutiyuq profëta chayamurqan.#Hech. 11.28. 11Noqakuna kaykashqä kaqman shamurmi Pablupa wachkunta aptarkur makinta y chakintapis pankakurqan. Nirkurnami kayno nirqan: <<Espíritu Santumi kayno nin: <Kaynömi kay wachkupa duëñunta Israel runakuna Jerusaléncho pankarätsinqa. Nirkurmi mana Israel runakunaman prësu apanqa> >>.

12Tsayta mayaykurmi lapan wawqi panikunawan Pabluta ruwapäkurqä Jerusalénman mana aywananpaq. 13Tsayno ruwaptïmi Pablo kayno nimarqan: <<¿Imanirtaq waqar lakikatsimanki? Señor Jesucristupa jutincho wilakushqäpita manami pankaränaläpaqtsu kaykä, sinöqa Jerusaléncho wanunäpaqpis listumi kaykä>>.

14Imanöpa niptïpis Pablo mana cäsumaptinmi mas ruwapäkurqänatsu. Tsaypa trukanqa kayno nipäkurqä: <<Tayta Dios munaptinqa jina tsaynöpis kanqachari>>.

15Tsaypitanami Jerusalénman aywanäpaq kamarikärirqä. 16Cesareacho taq wakin discïpulukunami yanaqämashpan Mnasónpa wayinman pushapäkamarqan. Mnasónqa karqan Chipripitami. Payqa nawpapitanami Jesúspa discïpulun karqan. Paypa wayinchönami patsakärirqä.

Santiaguta Pablo watukushqan

17Jerusalénman chayaykuptïnami wawqi panikuna kushishqa chaskikärimarqan. 18Waraynin#21.18 Wakin runakunaqa warantin nipäkun. junaq Santiaguta watukuq Pabluwan aywarmi mayor wawqikunatapis juntakashqa kaykaqta taripäkurqä. 19Paykunata winchikurkurmi Pablo wilaparqan mana Israel runakuna kaqcho wilakuptin Tayta Dios imata rurashqantapis.#21.19 Tsayno wilaparmi Pablo tantiyatsirqan Jesucristuta chaskikärinanpaq mana Israel runakunata Tayta Dios tantiyatsishqanta, runakunata aliyätsishqanta y supaykunata qarqushqanta.

20Tsayta mayaykurmi Tayta Diosta kushishqa agradëcikärirqan. Nirkurmi Pabluta nipäkurqan: <<Wawqi Pablo, musyankimi waranqanpa Israel runakunapis Jesucristuman yärakuykashqanta. Paykuna lapanpis nipäkun Moisés qelqashqan leykunata cäsukunantsipaq kashqantami. 21Paykunatami runakuna kayno wilaparkaykan: <Pabluqa jäpa markacho taq Israel mayintsikunatami yachaykätsin Moiséspa leyninkunata mana cumplipäkunanpaq. Manami munantsu wamrankunata señalatsinanta ni costumbrintsikunata cumplinantapis>. 22Kanan ¿imatataq rurashun? Chayamushqaykita mayaykurqa [tsaytsika runachari juntakanqa].

23<<Kanan nishayki imata ruranaykipaqpis. Kaychömi chusku runakuna Tayta Diosta promitishqanta cumplirkaykan. 24Tsay runakunawan templuman aywar purificakäriy. Aqtsankunata rutukärinanpaq gastunkuna kamaripay.#Núm. 6.13-21. Tsaynöpami lapanpis tantiyapäkunqa contrayki parlaqkuna manakaqkunata parlarkaykashqanta. Tsaynölami tantiyapäkunqa qampis Moisés qelqashqan leykunata cumpliykashqaykita.

25<<Jesucristuman yärakuq mana Israel runakunamanqa maynami cartata apatsishqantsi. Tsay cartachömi nishqantsi [tsay leykunata mana cumplirpis] ïdulukunapa jutincho pishtashqan aytsata, uywapa yawarninta y wanushqa uywakunapa aytsanta mana mikupäkunanpaq y fornicación jutsata mana rurapäkunanpaq>>.#Hech. 15.29.

26Tsawraqa wilanakushqannölami jukaqnin tuta tsay chuskun wawqikunawan Pablo aywarqan. Waqtacho purificakurirmi templuman yaykur cürakunata wilarqan ofrendankunata churar Tayta Diosta promitishqanta imay cumplinanpaq kashqantapis.

Pabluta prësu tsarishqan

27Qanchis junaqta cumplirkaykaptinnami Asia provinciapita shamuq Israel runakuna rikarqan templucho Pablo kaykaqta. Tsawraqa Pabluta tsarirkur 28fuertipa kayno nipäkurqan: <<¡Israel mayikuna, yanapamay! ¡Kay runami maytsay markakunapa purin contrantsi parlar! ¡Tsaynömi lutanta yachatsir leynintsita y templuntsitapis manakaqman churaykan! ¡Sagrädu templuntsita mana respitashpanmi mana Israel runakunata yaykatsimushqa!#Eze. 44.7-9.>>

29(Tsayno nipäkurqan Trófimuta y Pabluta cällicho puriykaqta rikashqa karmi. Trófimuqa Éfeso markapita mana Israel runami karqan.)#Hech. 20.4.

30Tsayno niptinmi lapan runakuna fiyupa rabyashqa cörriyla shamur Pabluta waqta patiuman qarachaypa jorqurirqan. Nirkurmi templu ruri patiu punkunkunata wichqarkurqan. 31Tsaychömi Pabluta wanutsiyta munar maqapäkurqan. Roma soldädukunapa comandantin tsayta mayarmi 32capitankunata y soldädukunata pushakurkur cörriyla aywapäkurqan Pabluta maqarkaykashqan kaqman. Soldädunkunawan comandanti chayaykaqta rikaykurmi Pabluta kachariykärirqan. 33Comandantinami Pabluta prësu tsaritsir ishkay cadinawan watatsirqan. Nirkurmi runakunata tapurqan kayno nir: <<¿Pitaq kay runa? ¿Imatataq rurashqa?>>

34Pichuypa pichur parlapäkuptinmi ima pasashqantapis mana tantiyar Pabluta cuartilman apatsirqan. 35Qepanpa aywar runakuna maqayta munaptinmi grädaman chayaykatsir soldädukuna Pabluta wintuypa cuartilman witsätsirqan. 36Paykunatami atska runakuna qatirparqan <<¡wanutsun!>> nipäkushpan.

Runakunapa nawpancho Pablo wilakushqan

37Cuartilman yaykatsinanpaq kaykaptinnami comandantita Pablo kayno nirqan: <<Tayta, rätula parlarkushun>>.

Niptinmi Pabluta kayno nirqan: <<¿Griego parlayta yachankiku? 38Qamqa Egipto runami kanki, ¿aw? ¿Manaku qam gobiernupa contran sharkuq kaykanki? ¿Manaku chusku waranqa (4,000) wanutsikuq runakunata pushashqa chunyaq jirkapa puriq kaykanki?>>

39Tsawraqa Pablo kayno nirqan: <<Noqaqa Cilicia provinciapa capitalnin Tarso markacho yuriq Israel runami kä. Israel mayïkunawan rätula parlarkunäpaq ruwakuläshayki, tayta>>.

40Tsayno ruwakuptinmi comandanti awnirqan. Tsawraqa grädacho ichiykur makinwan Pablo sëñarqan runakuna upälakunanpaq. Lapanpis upälakäriptinmi hebreo idiömapa parlapar kayno nirqan:

Currently Selected:

Hechos 21: qvmB

Highlight

Copy

Compare