1 Timoteo 6
6
Patronninta ashmaykuna respitananpaq yätsishqan
1Ashmaykuna patronninta shumaq respitapäkutsun. Tsaynöpami Tayta Diosta ni wilakuyninta pipis manakaqman churaykanqatsu. 2Patronnin yärakuq mayin kaptinpis ama yarpätsuntsu mana respitananpaq kashqanta, sinöqa yärakuq mayin kaptin masraq respitatsun. Tsayno kananpaq ashmaykunata shumaq yachatsiy.
Imantsipis kashqalanwan kushishqa kawanantsipaq yätsishqan
3Pipis Señornintsi Jesucristupa ali wilakuyninta yachatsinanpa trukan y Tayta Dios munashqanno kawanantsipaq yachatsinanpa trukan lutanta yachatsirqa 4yachaq tukärinmi. Tsay runakunaqa senqan maycho kashqantapis mana musyarmi manakaq yachatsikuykunalapita rimanakurkaykan. Tsaykunata chaskirmi runakuna chikinakur, rimanakur, qayapänakur y jaqayätsinakur kawapäkun. 5Lutan yachatsikuqkunaqa kikinpurapis manakaqkunalapitami rimanakun. Lutan ruraykunaman uman churakashqa karmi Jesucristupa wilakuynin imano kashqantapis mana tantiyapäkuntsu. Tsaynöpis yarpapäkun Diosta sirvir rïcuyänanpaq kashqantami. [Paykunawanqa ama juntakaytsu.]
6Imantsipis kashqalanwan contentakurqa y Tayta Dios munashqanno kawarqa rïcu runapitapis mas alimi kawantsi. 7Jinaylami kay patsacho yurishqantsi. Wanurpis jinaylami aywakushun.#Job 1.21; Sal. 49.17; Ecl. 5.15. 8Tsayno kaptinqa mikunantsipaq y jatikunantsipaq kashqalanwan kushishqa kawakushun.
9Rïcu kayta munaqkunaqa toqlaman#6.9 Wakin runakunaqa tsiklaman nipäkun. ishkiqnömi lutan ruraykunaman jatikar yarquyta kamäpakunnatsu. Tsayno kashqanpitami fiyupa nakapäkunqa. 10Qellaylapaq wanuqkunaqa imayka jutsatami rurapäkun.#Heb. 13.5. Wakin wawqi panikunapis rïcuyaylapaq yarpachakurmi Jesucristuman mana yärakärinnatsu. Nirkurmi cuchilluwan tuksikuqnöraq fiyupa nakapäkun.
Tayta Dios munashqanno kawananpaq yätsishqan
11Timoteo, Tayta Diosta sirviq kaykarqa qellaylapaq ama wanuytsu. Tsaypa trukanqa Tayta Dios munashqanno imaypis kaway, payman yärakuy, runa mayikita kuyay, pacienciakuy y pitapis ali shimilaykipa parlapay.
12Guërracho soldädukuna mana ajayaypa pelyashqanno qampis mana ajayaypa Jesucristuman yärakuy. Mana ushakaq kawayta chaskikunaykipaq Tayta Dios qayaykäshuptikiqa imaykanöpapis pay munashqanno kaway. Tsayta tantiyakurmi Jesucristuman yärakushqaykita wawqi panikunapa nawpancho wilakushqanki.
13Musyankimi Poncio Pilatupa nawpancho Jesucristo mana mantsakuypa wilakushqanta.#Juan 18.37. Tsaymi Jesucristupa jutincho y lapantapis kamaq Tayta Diospa jutincho qamta nï: 14Señor Jesucristo kutimunanyaq kay cartacho nishqäkunata lapantapis mana qonqaypa cumpliy. 15Tiempu cumplirkuptinnami Jesucristuta kay patsaman Tayta Dios kachamunqa. Tayta Diosqa lapan reykunapa y mandaqkunapa mandaqninmi kaykan. 16Pay japalanmi imayyaqpis kawaq kaykan y pasaypa chipchipyaykaqchömi kaykan.#Sal. 104.2. Payta manami pipis rikashqatsu ni rikaytapis kamäpakuntsu. ¡Lapan runakuna imayyaqpis payta alabaykulätsun! ¡Paypa makincho imayyaqpis kaykulätsun! Amén.
17Rïcu kaq wawqi panikunata niy orgullösu mana kananpaq y riquëzankunaman mana atiënikärinanpaq. Riquëzakunaqa ushakaqlami kaykan. Riquëzankunaman atiënikunanpa trukanqa [imayyaqpis kawaq] Tayta Dioslaman yärakäritsun. Paymi imaykatapis kamaripämantsi kushishqa kawanantsipaq.
18Tsaynöpis rïcukunata yachatsiy alikunata imaypis rurar wakin runakunata riquëzankunawan yanapananpaq. 19Tayta Diosman yärakur alikunata rurarqa mana ushakaq kawaytami tarinqa. Tsaynöparaqmi rasunpa ali kawayta taripäkunqa.
Carta ushanan
20Timoteo, wilakuyninta wilakunaykipaq Tayta Dios churaykäshuptikiqa lapan nishqäkunata shumaq cumpliy. Lutan yachatsikuqkunataqa ama chaskipaytsu. Tsay runakunaqa yachaq kashqanta yarparpis manakaqkunalatami yachaykätsin. 21Wakinkunaqa lutan yachatsikuqkunata chaskiparmi Tayta Diosman yärakuykashqanpita qepaman kutikärishqa.
Qamta y qamwan kaykaqkunata Tayta Dios imaypis yanapaykuläshunki. [Amén.]
Currently Selected:
1 Timoteo 6: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.