1 Samuel 15

Amalecita runakunata Saúl asulashqan

1Tsaypita juk kutichömi Saúlta Samuel kayno nirqan: <<Tayta Dios kachamaptinmi umaykiman aceitita winaparqä Israel runakunapa mandaqnin rey kanaykipaq.#1Sam. 10.1. Kananqa shumaq tantiyakuy Tayta Dios nishushqaykita. 2Lapanta mandaq Tayta Dios kaynömi niykan: <Amalecita runakunata ushakätsishaqmi. Paykunata ushakätsishaq Israel runakuna Egiptupita aywaykämuptin markanpa pasananta mana kachapashqanpitami.#Éxo. 17.8-14; Deut. 25.17-19. 3Kananqa soldädukunata pushakurkur aywapäkuy amalecita runakunata asulanaykipaq. Mana kuyapaypa wanutsipäkunki runakunata, warmikunata, wamrakunata y itikunata. Tsaynöla wanutsipäkunki wäkankunata, uyshankunata, cabrankunata, camëllunkunata y bürrunkunata> >>.

4Samuel tsayno niptinmi runakunata Saúl qayatsirqan Telaim markaman. Tsaycho yupaptinmi Israelpita karqan ishkay pachak waranqa (200,000) soldädukuna. Judápitanami karqan chunka waranqa (10,000) soldädukuna.#15.4 Saúl kawashqan witsan Israel nación juklayla kaptinpis ishkay parti kashqantami nipäkurqan. Norti kaq partipa jutinmi karqan Israel y sur kaq partipa jutinmi karqan Judá. 5Nirkurnami paykunawan Saúl aywarqan amalecita runakunapa markanman. Chayaykurnami mayu kuchunman churanakuykur shuyarparqan atacananpaq. 6Nirkurnami tsaycho taq ceneo runakunata Saúl kayno nirqan: <<Qamkunapa unay ayluykikunaqa Israel runakunata kuyaparqanmi Egiptupita shapäkamuptin. Tsayno kashqa kaykaptinqa amalecita runakunapita witikäriy. Mana witikäriptikiqa paykunata wanutsir qamkunatapis wanuykatsï imäman>>.

Tsayno niptinmi ceneo runakuna amalecita runakunapita witikärirqan.

7Tsaypita amalecita runakunata Saúl atacashpanmi wanutsipäkurqan Havilapita qalaykur hasta Shur nishqan partiyaq. Tsayqa kaykan Egipto nación läduchömi. 8Tsaychömi mandaqnin rey Agagta prësu tsarirkur lapan soldädunkunatapis wanutsipäkurqan. 9Agagtami itsanqa mana wanutsipäkurqantsu. Tsaynöpis manami wanutsipäkurqantsu wera kaqtaqa uyshatapis, cabratapis, wäkatapis, turitukunatapis y carnishtapis. Ni imankunatapis ali kaqkunataqa manami rupatsirqantsu. Uyu kaqkunatami itsanqa lapanta wanutsipäkurqan.

Saúl rey kananta Tayta Dios mana munashqan

10Tsaypitami Samuelta Tayta Dios kayno nirqan: 11<<Maläyämi rey kananpaq Saúlta churashqäpita. Manami nishqäkunata cumplishqatsu>>.

Tsayno niptinmi Samuel lakikushpan waraylata Tayta Diosta manakur waqarqan. 12Waraynin#15.12 Wakin runakunaqa warantin nipäkun. tutanami tsaka tsakala Samuel aywarqan Saúlwan tinkunanpaq. Aywaykaptinmi wilapäkurqan Carmelman chayaykur wankata Saúl ichitsishqanta y tsaypitana Gilgalman aywashqanta.

13Tsaypita Saúl kaqman Samuel chayaykuptinmi Saúl kayno nirqan: <<Tayta Dios yanapaykuläshunki, tayta. Pay nimashqantaqa lapantami rurashqä>>.

14Tsayno niptinna Samuel kayno nirqan: <<Tsawraqa ¿imanirtaq uyshakuna y cabrakuna waqamushqanta y törukuna jüyamushqanta mayaykä?>>

15Tsayno niptinmi Saúl kayno nirqan: <<Waqamushqan uyshakuna, cabrakuna y jüyamushqan törukunaqa amalecita runakunapami kaykan. Alinnin kaqkunatami soldädukuna apapäkamushqa sacrificiuta Tayta Diospaq rupatsipäkunäpaq. Tsaypita wakin kaqtaqa lapantami wanutsipäkushqä>>.

16Tsawraqa Samuel kayno nirqan: <<¡Upälakuy! Kanan wilashayki Tayta Dios shipshi imata nimashqantapis>>.

Tsayno niptinmi Saúl kayno nirqan: <<Mä wilaykalämay, tayta>>.

17Tsawraqa Samuel kayno nirqan: <<Mana väliq kashqaykita yarpaptikipis Tayta Diosmi churashushqanki Israel nacionpa mandaqnin rey kanaykipaq. 18Tsaymi jutsasapa kashqanpita amalecita runakunata uywantinta lapanta ushakätsinaykipaq Tayta Dios kachashurqayki. 19Tsayno niykäshuptikiqa ¿imanirtaq pay nishushqaykita mana rurashqankitsu? ¿Imanirtaq Tayta Diosta rabyanätsir amalecita runakunapa imaykantapis apamushqanki?>>

20Tsayno niptinmi Saúl kayno nirqan: <<Tayta Dios nimashqantaqa lapantami rurashqä. Amalecita runakunapa mandaqnin rey Agaglatami prësu apamushqä. Tsaypita kaqtaqa lapantami wanutsishqä. 21Pelyaq aywaqkunami itsanqa alinnin kaqta uyshata, cabrata y wäkatapis apakamushqa Tayta Diosta adorar Gilgalcho sacrificiuta rupatsipäkunäpaq>>.

22Tsayno niptinmi Samuel kayno nirqan: <<Tayta Dios ¿mayqantataq munaykan: sacrificiukunata rupatsinantsitaku o pay nishqanta wiyakunantsitaku?

<<Sacrificiuta rupatsishqantsipitapis payta wiyakushqantsimi mas ali kaykan.

Tsaynöpis carnipa wiranta rupatsishqantsipitapis pay nishqanta chaskikushqantsimi mas ali kaykan.#Prov. 21.3; Ose. 6.6; Amós 5.22-24.

23Diosta mana cäsukuq runakunaqa brüjunömi karkaykan.

Mana wiyakuq runakunaqa ïdulukunata adoraqkunanömi karkaykan.

Tayta Diosta mana cäsushqaykipitami kanan qamtapis mana cäsushunkipaqnatsu.

Tsaymi rey kaykashqaykipita qarqushunkipaq>>.

Perdonananpaq Samuelta Saúl ruwakushqan

24Tsayno niptinmi Saúl kayno nirqan: <<¡Kaychi kaylaqa, rasunpami jutsata rurashqä! Runakunapa shiminta chaskirmi Tayta Dios nimashqantapis ni qam yätsimashqaykitapis mana cäsukushqätsu, tayta. 25Tsayno jutsata rurashqäpita perdonaykalämay. Nirkur yanaqämay Tayta Diosta adoraq aywaptï>>.

26Tsayno niptin Samuel kayno nirqan: <<Qamwanqa manami aywashaqtsu. Tayta Dios nishushqaykita qamqa manami cäsushqankitsu. Tsaynöpis Tayta Dios manami munannatsu Israel nacionpa mandaqnin rey kanaykita>>.

27Samuel aywakunanpaq tikraptinmi Saúlqa aptakurkurqan tünican kuchunpita. Tsutaptin tünican rachikäkuptinmi 28Samuel kayno nirqan: <<Tünicäta rachir pedäzuta jorqushqaykinölami qamtapis Tayta Dios jorqushushqanki Israel nacionpa mandaqnin rey kashqaykipita. Qampa trukaykimi qampita mas ali runatana rey kananpaq churanqa. 29Nishqätaqa rasunpami Tayta Dios cumplinqa. Israel runakunata kuyaq Tayta Diosqa manami lulakuntsu. Payqa manami runatsu kaykan lulakunanpaq>>.

30Niptinnami Saúl kayno nirqan: <<Lutantami rurashqä, tayta. Tsayno kaptinpis Tayta Diosta adoraq aywaptï yanaqaykalämay. Noqawan mana aywaptikiqa ¿imataraq yarpanqa mayor runakuna y wakin runakunapis?>>

31Tsayno ruwakuptinmi Samuelqa Saúlwan aywarqan. Chayaykurmi Tayta Diosta Saúl adorarqan.

Rey Agagta Samuel wanutsishqan

32Nirkurmi Samuel kayno nirqan: <<Kayman pushamuy amalecitapa mandaqnin rey Agagta>>.

Pushaptinmi Agag kushishqa aywarqan manana wanunanpaq kashqanta yarpar. 33Chayaykuptinmi Samuel kayno nirqan: <<Warmikunapa wawankunata wanutsiptiki wawaynaq rikakushqannömi kanan qampa mamaykipis wawaynaq rikakunqa>>.

Tsayno nishpan Tayta Diospa nawpancho Agagta Samuel wanuratsir pedäzu pedäzu kutsurqan.

34Tsawraqa Samuel Ramáman aywakuptinnami Saúlpis Gabaaman kutikurqan. 35Tsaypita patsa Saúlwan Samuel mananami yapay tinkurqannatsu. Rey kananpaq Saúlta churashqanpita Tayta Dios maläyaptinmi Samuel pasaypa lakikur waqarqan.

Currently Selected:

1 Samuel 15: qvmB

Highlight

Copy

Compare