1 Corintios 2

Jesucristo cruzcho wanushqanta Pablo wilakushqan

1Wawqi panikuna, qamkuna kaqman shamur manami yachaq runakuna parlashqannötsu ni paykuna yarpashqannötsu Tayta Diospa wilakuyninta yachatsirqä. 2Tsayno yachatsinäpa trukanqa Jesucristo noqantsi rayku cruzcho wanushqalantami yachatsirqä.

3Qamkunaman chayamur mana tantiyatsinäpaq kashqanta yarparmi fiyupa lakikurqä. 4Yachaq runakuna parlashqanno y yarpashqanno yachatsinäpa trukanqa Espíritu Santupa munayninwanmi yachatsirqä. 5Tayta Diospa munayninwan yachatsiptï manami runakuna yachaq kashqanmantsu yärakurkaykanki, sinöqa Tayta Diosmanmi.

Tayta Dios yarpashqankunata Espíritu Santu tantiyatsishqan

6Yachaq runakuna yarpashqanno mana yachatsirpis Tayta Diospa wilakuyninta shumaq tantiyakurmi payman yärakuqkunata yachatsï. Tayta Diospa wilakuyninqa manami yachaq runakuna ni munayniyuq runakuna yarpashqannötsu kaykan. Tsay runakunaqa ushakaqlami kaykan. 7Diospa yachayninta yachatsishqäqa runakuna mana musyashqanmi kaykan. Tsay yachaynintami imapis manaraq kaptin Tayta Dios churarqan gloriacho kushishqa kawanantsipaq. 8Kay patsacho mandaqkunaqa manami mayqanpis tsayta tantiyapäkurqantsu. Tantiyarqa manami munayniyuq Señor Jesucristuta cruzcho wanutsinmantsu karqan. 9Mana tantiyapäkushqantami Tayta Diospa palabranchöpis kayno qelqaraykan:

<<Pipis mana rikashqanta

ni mana mayashqanta

ni mana yarpashqantami

kuyaqninkunapaq Tayta Dios kamarishqa>>.#Isa. 64.4.

10Tsay kamarishqantaqa Espíritu Santuwanmi Tayta Dios musyatsimashqantsi. Espíritu Santu lapanta musyarmi Tayta Dios yarpashqankunatapis musyan. 11Runa imata yarpashqanta shonqun musyashqannömi Espíritu Santupis Tayta Dios imata yarpashqantapis musyaykan. 12Noqantsiqa manami kay mundupa espïrituntatsu chaskishqantsi#2.12 Tsayno nirqa Pablo kaynömi nirqan: Manami Diosta mana chaskikuq runakuna yarpashqannötsu yarpantsi ni paykuna kawashqannötsu kawantsi., sinöqa Tayta Dios kachamushqan Espíritu Santutami. Tsaynöpami musyantsi Tayta Dios salvamashqantsita.

13Qamkunataqa manami runakunapita yachakushqätatsu wilapaykä, sinöqa Espíritu Santu tantiyatsimashqantami. Tsaymi Espíritu Santuta chaskikärishqa kaptiki paypa yarpayninkunata tantiyaykätsï. 14Espíritu Santuta mana chaskikuqkunaqa paypa yarpayninkunata manami chaskikärintsu. Paykunapaqqa upa yarpaymi kaykan. Espíritu Santu mana tantiyatsiptinmi tantiyayta mana kamäpakärintsu. 15Espíritu Santuta chaskikuqkunami itsanqa yachatsishqankuna ali kashqanta tantiyar chaskikärin. Imanir chaskikärishqantapis wakin runakunaqa manami tantiyapäkuntsu. 16Tayta Diospa palabranchöpis kaynömi qelqaraykan:#2.16 Kay textuta yarpätsir Pablo kaynömi tantiyatsirqan: Tayta Diosta runakuna juzgayta mana puëdishqannömi pay munashqanno kawaq runakunatapis juzgayta mana puëdipäkuntsu. Tsaynölami Jesucristupa wilakuyninta wilakushqäpita noqatapis mana juzgamanmantsu.

<<Tayta Dios yarpashqankunata ¿pilaqa musyantsuraq?

Yachaq kananpaq ¿pilaqa payta yachatsintsuraq?>>#Isa. 40.13; Rom. 11.34.

Noqantsipa yarpaynintsimi itsanqa Jesucristupa yarpayninno kaykan.

Currently Selected:

1 Corintios 2: qvmB

Highlight

Copy

Compare