1 Corintios 15
15
Jesucristo kawarimushqan
1Wawqi panikuna, Jesucristupa wilakuyninta wilapashqäta yarpapäkuy. Wilapashqäta chaskikurmi Tayta Diosman yärakurkaykanki. 2Tsay wilapashqäno kawarqa salvakärinkimi. Tsayno mana kawarqa manakaqlapaqmi chaskikärishqanki.
3Yachakushqalätami nawpatapis qamkunata yachatsirqä. Tsay yachatsishqä kaynömi niykan: Tayta Diospa palabran nishqannölami#Isa. 53.5-12. jutsantsipita perdonamänantsipaq Jesucristo wanurqan. 4Tsaynöpis nishqannölami#Sal. 16.8-10; Mat. 12.40; Hech. 2.24-32. Jesucristo wanur pamparashqanpita kimsa junaqta kawarimurqan. 5Kawarirkamurnami Cefasta#15.5 Cefasqa Simón Pedrupa jukaq jutinmi kaykan.#Luc. 24.34. yuriparqan. Tsaypitanami chunka ishkay apostolninkunata yuriparqan.#Mat. 28.16-17; Mar. 16.14; Luc. 24.36; Juan 20.19. 6Tsaypitanami pitsqa pachak (500) wawqi panikuna juntakashqa kaykaqtapis yuriparqan. Tsayno yuripashqanta rikaq wawqi panikuna juk ishkay wanushqana kaptinpis wakinqa kawarkaykanraqmi. 7Santiaguta yuriparkurnami wakin apostolninkunatapis yuriparqan. 8Tsaypitaraqmi shuluno mana väliq kaykaptïpis noqata yuripämarqan.#Hech. 9.3-6.
9Manaraq yuripämaptinmi Tayta Diosman yärakuqkunata qatikacharqä.#Hech. 8.3. Tsayno rurashqa karmi wakin apostolkunaman mana tinkütsu. Apóstol kanäpaqpis manami merecïtsu. 10Tsayno kaykarpis Tayta Dios kuyapämaptinmi apóstol kaykä. Wakin apostolkunapitapis masraq Jesucristupa wilakuyninta wilakurmi tantiyakü Tayta Dios alipaq kuyapämashqanta. Imano kaptinpis Tayta Dios yanapamaptinmi wilakuykä. 11Mayqanï wilakurpis Jesucristupa wilakuynintami wilakurkaykä. Wilakushqäta mayarmi qamkunapis Jesucristuta chaskikärishqanki.
Wanuqkuna kawarimunanpaq kashqanta yachatsishqan
12Jesucristo kawarimushqanta wilakurkaykaptïqa ¿imanirtaq wakinniki nirkaykanki wanushkuna mana kawarimunanpaq kashqanta? 13Wanushkuna mana kawarimunanpaq kaptinqa Jesucristupis manami kawarimunmantsu karqan. 14Mana kawarimushqa kaptinqa manakaqlapaqmi wilakuynintapis wilaküman. Tsayno kaptinqa Jesucristuman manakaqlapaqmi yärakärinkiman karqan. 15Wanushkuna mana kawarimunanpaq kaptinqa Jesucristuta Tayta Dios kawaritsimushqanta wilakurpis lulakurmi puripäküman.
16Wanushkuna mana kawarimunanpaq kaptinqa Jesucristupis manami kawarimunmantsu karqan. 17Y Jesucristo mana kawarimushqa kaptinqa payman yärakushqaykipis manakaqlapaqmi kanman. Jutsata rurashqaykipitapis manami perdonashqatsu kaykankiman. 18Tsayno kaptinqa Jesucristuman yärakuykar wanuqkunapis wanushqalanchömi usharanman. 19Jesucristo kay vïdalacho yanapamänantsipaq kashqanta criyirqa lapan runapitapis mas kuyapaypaqmi kaykantsi.
20Itsanqa Jesucristo rasunpami wanushqanpita kawarimushqa. Pay puntata kawarimushqa kaptinmi musyantsi noqantsipis kawarimunantsipaq kashqanta. 21Juk runala#15.21a Tsay runaqa Adánmi karqan. jutsata rurashqanpita lapantsi wanunantsipaq kashqantsinölami juk runala#15.21b Tsay runaqa Jesucristumi kaykan. kawarimushqanpita lapantsi kawarimunantsipaq kaykantsi. 22Jutsata Adán rurashqanpitami lapantsipis wanukuqla kaykantsi. Jesucristo kawarimushqanpitami itsanqa lapantsi kawarimunantsipaq kaykantsi.#Rom. 5.12-18.
23Kawarimurqa Tayta Dios kamakätsishqannömi kawarimushun. Puntataqa Jesucristutami Tayta Dios kawaritsimushqa. Jesucristo kutimuptinraqmi payta chaskikuqkunata kawaritsimunqa. 24Tsaypitanami juiciu final kanqa. Tsaychönami Satanásta y lapan supaykunata Jesucristo ushakätsinqa. Nirkurnami Tayta Diospa munayninman lapanta churanqa. 25Contrankunata vincishqanyaqmi lapantapis Jesucristo makincho tsararanqa. 26Vinciykurnami wanuytapis vincinqa.
27Tayta Diospa palabranchöpis Jesucristupaq kaynömi niykan: <<Paypa makinmanmi lapantapis Tayta Dios churashqa>>.#Sal. 8.6.
Paypa makinman lapanta churashqanta nirpis manami kikin Tayta Dios paypa makincho kashqantatsu niykan. Tsaypa trukanqa Tayta Diosmi Jesucristupa makinman lapanta churashqa. 28Paypa makinman lapantapis churashqana kaptinmi Tayta Diospa makinman lapanta kutitsinqa. Tsaynöpami Tayta Dios lapan imaykatapis makincho tsararanqa.
29Wawqi panikuna, ¿imanirtaq yarparkaykanki wanushkuna mana kawarimunanpaq kashqanta? Wanushkunata Tayta Dios mana kawaritsimunanpaq kaptinqa ¿imalapaqtaq wanushkunapa jutincho wakinniki bautizakunkipis?
30Tsaynöpis wanushkuna mana kawarimunanpaq kaptinqa ¿imalapaqtaq wanuy kawaypis wilakur purirkaykäman? 31Wawqi panikuna, waran waranmi wanutsimayta munarkaykan. Tsayno kaptinpis Señor Jesucristuta chaskikärishqaykipitami kushikü. 32Éfeso markachöpis chikimashpan fiyu animalnömi runakuna wanutsimayta munapäkurqan. Wanushkuna mana kawarimunanpaq kaptinqa ¿imalapaqtaq tsayjinanpa chikimaptinpis purïman? Tsaypa trukanqa kaynömi nïman: <<Kawashqantsiyaq mikushun upushun. Wanurqa pachantsitami apashun>>.#Isa. 22.13.
33Lutanta ama yarpapäkuytsu: mana ali amïgukunaqa ali runakunatapis mana ali ruraykunamanmi inkitan. 34Shumaq tantiyakur jutsa ruraykunata kachariyna. Wakinnikiqa Tayta Diospa wilakuyninta manami shumaqtsu tantiyarkaykanki. Tsayno kapäkushqayki penqaypaqmi kaykan.
Kawarimur cuerpuntsi imano kananpaq kashqan
35Wanushkuna kawarimunanpaq kashqanta mana criyirmi wakinniki kayno nirkaykanki: <<¿Imanöpanashi wanushkuna kawarimunman? Kawarimuptin ¿imanöraq cuerpun kanqa?>>
36Tsayno yarparqa ¡tsaki toqshumi karkaykanki! Imatapis murur mana pampaptintsiqa manami winamuntsu. 37Tsaynöpis manami yörantatsu muruntsi, sinöqa trïgu kaptinpis o mayqan tsaki mikuy kaptinpis murutami muruntsi. 38Murushqana kaptinqa Tayta Diosmi winatsimun. Cada casta murupitami Tayta Dios munashqannöla yöranta winatsimun.
39Runapis, uywapis, päriqpis y pescädupis jukniraq jukniraqmi kaykan. 40Jana patsacho kaqkunapis manami kay patsacho kaqkunanötsu kaykan. 41Tsaynölami intipis, killapis y qoylarkunapis jukno jukno atsikyapäkun.
42Tsaynölami runa wanushqanpita kawarimuptin cuerpun mushuqna kanqa.
Pampashqan kaqqa ushakanqami.
Kawarimuq kaqmi itsanqa mana ushakanqanatsu.
43Pampashqan kaqqa ismunqami.
Kawarimuq kaqmi itsanqa kuyaylapaq kanqa.
Pampashqan kaqqa elqanqami.
Kawarimuq kaqmi itsanqa mana elqanqatsu.
44Yurishqantsi cuerpuqa kay patsacho kawanalantsipaqmi kaykan.
Kawarimuq cuerpumi itsanqa mushuq patsacho kawanantsipaq kanqa.
Kay patsacho kawanantsipaq kaq cuerpupis kanmi y mushuq patsacho kawanantsipaq kaq cuerpupis kanqami.
45Tayta Diospa palabranchöpis kaynömi qelqaraykan: <<Punta kaq Adántami kawaq runa kananpaq kamarqan>>.#Gén. 2.7.
Qepa kaq Adántami#15.45 Qepa kaq Adánqa Jesucristumi kaykan. itsanqa kawatsikuq espíritu kananpaq kawaritsimushqa. 46Manami mushuq patsacho kawanantsipaq kaq cuerputatsu puntata chaskintsi, sinöqa kay patsacho kawanantsipaq kaq cuerputami. Tsaypitaraqmi mushuq patsacho kawanantsipaq kaq cuerputaqa chaskintsi. 47Punta kaq runaqa alpapitami karqan. Qepa kaq runa [Señor Jesucristumi] itsanqa jana patsapita kaykan. 48Kay patsacho kawanantsipaq kaq cuerpuntsiqa alpapita rurashqa Adánpa cuerpunnölami kaykan. Mushuq patsacho kawanantsipaq kaq cuerpuntsimi itsanqa jana patsacho taykaq Jesucristupa cuerpunno kanqa. 49Kananqa alpapita rurashqa Adán niraqlami kaykantsi. Tsaypitanami jana patsacho taykaq Jesucristunöna kashun. 50Wawqi panikuna, shumaq tantiyakäriy. Aytsantin tuluntinqa manami pipis Tayta Dios mandaykashqanman chayanqatsu. Ushakaq cuerpuntsiqa manami mushuq patsacho kawanantsipaqtsu kaykan, sinöqa kay patsacho kawanalantsipaqmi.
51Tayta Dios pitapis mana musyatsishqanta musyapäkunaykitami munä: Manami lapantsiraqtsu wanushun. Itsanqa lapantsitami mushuq cuerputa Tayta Dios qomäshun. 52Mushuq cuerpuyuqqa elaqpita tikrashun ultimu kaq cornëtata tukaramuptinmi. Tsay junaqmi mana ushakaq mushuq cuerpuyuqna wanushkuna kawarimunqa. Tsaynölami noqantsi kawaykaqkunapis mushuq cuerpuyuq rikakushun.#1Tes. 4.15-17. 53Ushakaqla kashqantsipitami mana ushakaqna tikrashun. Wanuqla kashqantsipitami mana wanuqna tikrashun.
54Ushakaqla cuerpuntsi mana ushakaqmanna tikraptinmi y wanuqla kashqantsipita mana wanuqna tikraptintsimi Tayta Diospa palabran kayno nishqan cumplikanqa:
<<¡Wanuyqa vincishqanami kaykan!#Isa. 25.8.
55Wanuy, ¡maychötaq munayniki kaykan!
Sepultüra, ¡maychötaq mikukuq kayniki kaykan!>>#Ose. 13.14.
56Wanuy ushakätsimantsi jutsata ruraptintsimi. Jutsapis Tayta Diospa leyninkunapitaraqmi tunitsimänantsipaq munayninta chaskin.#Rom. 7.7-25. 57Tsayno kaptinpis Señor Jesucristuta kawaritsimurmi wanuypita Tayta Dios salvamantsi. Tsaypita imaypis payta agradëcikushun.
58Tsayno kaykaptinqa, kuyay wawqi panikuna, mana qelanaypa y mana ajayaypa Señor Jesucristuta imaypis sirvipäkuy. Musyashqaykinöpis payta sirvishqayki manami manakaqlapaqtsu kaykan.
Currently Selected:
1 Corintios 15: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
