Arooma 12
12
Ohaayi mpheya
1Nakataalikha, attwiizaku, kinuuvekelani khwa tthakaraka ya Nluku yoori mwinkhe mwiili enu nkhama twaha haayi, ttakatthiifu na yontuvela Nluku; eto ti aputu yenu mweeyo yoolikana. 2Mwihijilipisane menttezi a olumwenku opu, ila mwizukuliseye khwa ozukuluwa wa akhili zenu, yoori mwiiyane makhaamu aweezelela na wootela yooshapweya, otuva na khaamili niiya ya Nluku.
3Tiito, khwa rehema kinkhiweeyo, kiniwuuzani mooshi mweeyo yoori: Ahiiyevo aniiyanaaye khwa mweenyewe shawuri zooziti epile anwahaaye wiiyana; ila, olikha toowo, eeyane shawuri zoolipalipa nkhama etthiipo khiima ya amini Nluku amwinkhiyeeyo. 4Nkhama etthiipo wakhula mmote wa fweeyo nina mwiili mmote oriina phantte zawaatta na phantte zaya epo zooshi zinkhola khaazi zoofwarikhana. 5Etthiipo theenya fweeyo niiyiyeeyo awaatta, naretteya wiiya mwiili mmote khwa Al-Masiihu, na wakhula phantte yaluttana na phantte kiina zaya zooshi. 6Ninaaye tthuvo zoofwarikhana, khwa rehema ninkhiweeyo. Nkhama ntthu onaaye tthuvo ya ohupiri, arumeyele khwa amini ariinaaye. 7Nkhama tthuvo yawo ti ya orumeya, orumeye; nkhama ti ya osomisa, osomise; 8nkhama ti ya owaalipisela azaawo, owaalipisele. Nkhama ti ya winkha, winkhe wahurumavo; nkhama ti ya olokozela, olokozele na phoole; nkhama ti ya othoonyeza tthakaraka, othoonyeze na furaha.
Opheta
9Pheta yenu mweeyo ena ya wiiya ya khweele. Ewiiphireni zootakhala; mwikholelele epile ziiyiyeeyo zooshapweya. 10Mwijinkhe mmote na nzeenu nkhama pheta ya ntthu na ttwiiye. Mwihithari owaakhirimu azeenu zayita mweeyenaru. 11Mwikhole khaazi na niiya mwihiiye anamaviliwa. Mwinrumeyele Mbwana na rooho ya nthiti. 12Mwifurahele nroromelo mwiriinaaye, mwiiye oovilela miswipa, na olompa woohilikheleli. 13Mwisala mwiwaameela attakatthiifu apale othowiwa epile mwiniiyanaaye, na owaapokherela aletto vaje venu.
14Mwiwaaparikhiye apale anuulupatthanini; mwiwaaparikhiye, na mwihiwaalaani. 15Mwifurahi na apale anfurahaaye; mwilile na apale anlilaaye. 16Mwiiyane osiilana na azeenu. Mwihiiye atthu oojikhupali, ila mwiiye oolikana khwa okusanyeya na atthu apale ohoonelewi vahali. Mwihijoone wiiya ajuwi.
17Mwihinriphe ntthu yootakhala khwa yootakhala. Mweekese oretta vitthu zoolotteya vakatthi wa atthu ooshi. 18Mwirette thenke ya weekesa wiikhala na heeri khwa atthu ooshi. 19Aphetani aka, mwiheekese ojiripha, ila mwinlikhele Nluku katapu yaya eto, maana yaatikhiwa yoori:
“Ojiripha pi waka,
kinteela oretta hisapu na yo,
Mbwana ti alupiyeeyo.”
20Olikha toowo:
“Amana atuwi awo enkhola jala, omwinkhe etthu yoojiwa,
amana linkhola nnyottha, omwinkhe maati anywe;
amana oretta toowo
onuukela makhala ookholela veeshwa vawe.”
21Mwihijilikhelele oshinttiwa pi zootakhala, ila mweeyo mwishintte zootakhala khwa zooshapweya.
Currently Selected:
Arooma 12: eko
Highlight
Share
Compare
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
