Matewuzhu 21

Ovira wa Yinsa Yeruzaleemu

1Wakathi aattameliyeevo Yeruzaleemu, khufiya Betifwaaje, vamwaako Oluveera, Yinsa khuwaaruma anakhiyoni awe awiri awoozaka yoori: 2“Mwilawe nti opo mwinoonaaye omaasho weenu okho, mwinlawa mwansikane mwaana wa puuru weekha afukeleliwe vahali vamote na weelume. Mwiwaafukule mwikitiisele. 3Amana apuwa ntthu awuuzelani, mwimuuze yoori Mbwana ontta owaatakha, ontta owaarutisa nasaapi.”

4Vitthu epo zarettikhana yoori emarisele etile alupiyeeyo napiyu araka:

5“Muuze sitati ya Siyoni yoori: ‘Omoone, mfwalume awo ontta wuuteela woojipushuwisavo, aweliye va mwaana wa puuru, mwaana wa nyama yoopakhira.’ ”

6Anakhiyoni khulawa na khuretta etile aarumiweeyo ti Yinsa. 7Khuntiisa puuru yeekha na mwaana aya nttitthiiru, aphano khutthiiwavo kuwo zawe, Yinsa khuwelavo. 8Atthu awaatta khusala attattikha kuwo zaya ntarikhi, akina khusala ashija virapi za miitthi na ottattikha ntarikhi. 9Apale aalokoziyeeyo na apale aari onlottaaye eetta onyakula araka:

“Ozaana khwa mwaana wa Daawuuda!

Wooparikhiyiwa ti otule antaaye khwa nzina la Mbwana!

Ozaana wa pinkuuni.”

10Wakathi Yinsa aviriyeevo Yeruzaleemu, sitati yooshi khutapanyeya, atthu khusala oozeliwa yoori: “Otu aya paani?” 11Atthu khusala ajipu yoori: “Otu ti Yinsa, napiyu wa Nazareeti ya Kalileya.”

Otwahareshiwa wa Nyuupa Yoosifwiwamo

12Yinsa khuvira Nnyupa Woosifwiwamo, khuwiikaramo ooshi apale aari wuuzanyisaaye na apale aari wuuzanyaaye. Khukurumula meeza a anamapatilisa nzurukhu na khateera za apale aari wuuzanyisaaye jiwa. 13Khuwooza araka: “Yaatikhiwa yoori: ‘Nyuupa yaka enttela wiitthiwa nyuupa yoolompiwamo’, ila mweeyo mwaretta wiiya puuro ya manantarawu.”

Yinsa ontta ovonisa Nnyupa Woosifwiwamo

14Ananhooni na anamarakala khumwaattama Yinsa Nnyupa Woosifwiwamo, ye khuwaavonisa. 15Ila, wakathi mahaakhimu a tiini na anamanozela a kano ooniyeevo vitthu epile zootikinisa Yinsa aari orettaazo na aasimana akhuwaka araka: “Ozaana mwaana wa Daawuuda!” Khushanka khusala oozela yoori: 16“Onsiila epi anlupaazo asimaana apa?” Yinsa khuwaajipu yoori: “Aaa; mweeyo khamwinasome yoori: ‘Khwa milomo za asimaana na apale anaamwaaye enlankhamo siifwa khaamili’?” 17Yinsa khuwaalikha, khulaamo nsitati mphule khulawa Betaaniya ottuukho aalaliiyeewo.

Mfikeera woohiina mishumo

18Mmeesho mwaya supuyeene, arutelaka ositati, Yinsa khunkhola jala. 19Khoona muutthi wa mfikeera nshini wa tarikhi, khwaattama ila khuhisikanani hatha mishumo, khusikanamo mathaparu paasi, aphano khuri: “Weeyo khunteela wiima theenya mishumo!” Mfikeera opule khuuma nasaapiru. 20Anakhiyoni awe ooniyeevo epile zaarettikhaniyeeyo, khwiiya ooshanka na ootikinisiwa alupaka yoori: “Wooma toovi nasaapiru mfikeera opu?” 21Yinsa khujipu yoori: “Kiniwuuzani khweele yoori, amana mwiiyana amini na woohiina nshikili, mwinttela oretta woohiiyi epi zirettikhaniyeeyo khwa mfikeera opu paasi, ila hatha wuuza mwaako opu yoori: ‘Okhuleye ojeeselele mpahari’, zintta orettikhana. 22Amana mwiiyana amini mwinpwekhera zooshi mwinttelaaye oveka khwa lompa.”

Ofwalume wa Yinsa ontikinisa

23Paata ya Yinsa ofiya Nnyupa Woosifwiwamo, eettaka osomisa, mahaakhimu a tiini na attunkhulu a tiini khumwaattama khumuuzela yoori: “Vitthu epi onrettana ofwalume ni? Wala ti paani awinkhiyeeyo ofwalume aya opu?” 24Yinsa khujipu yoori: “Miiyo kintta owuuzelani theenya; amana mwikijipu, kintta owuuzani ofwalume kinrettanaaye vitthu epi. 25Woosa wa Yaahaya waari wa vayi? Wa pinkuuni ama wa anaatamu?” Yo khusala akheetisana atthaapo ru araka: “Amana niri waari wa pinkuuni, ye ontta onuuzela yoori ‘khi mwaasa aya niini mwihikhupalelaka?’ 26Ila amana nilupa yoori waari wa anaatamu, niniwoova atthu, maana ankhupalela yoori Yaahaya napiyu.”

27Yo khunjipu Yinsa yoori: “Khanijuweeni.” Ye khuwooza theenya yoori: “Hatha vattitthiiru akiniwuuzani owahi kinrettanaaye vitthu epi.

Nlikaniso wa aana awiri

28“Mwinoona toovi? Aarivo mwinyi mmote aariina aana awe awiri. Khumweettela otule wa mwanzo khumuuza yoori: ‘Mwanaka, etta wakhole khaazi leelo omashapa.’

29“Khujipu yoori: ‘Akeepu!’ Ila khufikhiri khulawa okhola khaazi etile ooziweeyo.

30“Paapa otule khumwettela mwanawe otule nkina khumuuza nkhama etthiipo aamuziyeeyo otule nkina. Mwaana otule khujipu yoori: ‘Kintta olawa mbwanaaka!’ Ila khuhilawi.

31“Khwa aana apale awiri ti tuuvi arettiyeeyo matakhelo a papaawe?” Khujipu yoori: “Otule wa mwanzo.” Yinsa khuwooza yoori: “Kiniwuuzani khweele yoori, anamariphisa lumpuru na amalempe antta weetta muufwalume wa Nluku mweeyo mwihineettemu. 32Maana Yaahaya ata yoori oothonyezeni tarikhi ya shariya, mweeyo khuhinkhupaleli, ila anamariphisa lumpuru na amalempe ankhupalela. Mweeyo moona vitthu epile khuhithupwiyi na wala khuhinkhupaleli.

Nlikaniso wa anamalima ootakhala rooho

33“Mwisiile nlikaniso nkina. Mwinyi mmote khuzala miitthi za wuuva, khujekelela khwiiya nkatthi, khuthipa kulaathayini yoori asala atthaamo wuuva na khujeka korofwa. Paata ya toole khurentterisa nshapa khwa anamalima awe ye khusaafiri. 34Ofiyeevo wakathi wa wuurula, khuwaaperekha akarumeya awe khwa anamalima apale, yoori enkhiwe mishumo zawe. 35Anamalima khuwaakhola akarumeya a mweenyewe nshapa apale; mmote khunvulalisa, nkina khumuula, wa ttaatthu khunvonya na mawe. 36Aphano khuwaaperekha akarumeya awe akina awaatta, anamalima apale khuwaatthantta nkhama etthiipo awaatthanttiyeezo apale akina. 37Omwiisho khumperekha mwanawe alupaka yoori: ‘Mwanaka otu antta onshitahi.’ 38Ila anamalima amoniyeevo mwaana otule, khulupa yoori: ‘Otu namarithi. Mwite, nimuule nithuule erathi yawe.’ 39Attaaphale yo khunkhola khumweeselela othetekele wa nshapa khumuula. 40Nakataalikha, amana ata mweenyewe nshapa, onttela owaarettela niini anamalima apale?” 41Yo khujipu yoori: “Wekhweele ontta owoola anamalima apale ootakhala rooho na awenkhe anamalima akina nshapa laya. Apo nka amwinkhaka phantte ya mishumo wakathi wa wuurula.”

42Yinsa khuwoozela yoori: “Khamwinasome Zawaatikhiwa Ttakatthiifu yoori:

“ ‘Liwe anamajeka akatthaliyeeyo,

nttho laya laretteya wiiya liwe linkhomaazaaye;

eto enta wa Mbwana,

na etthu yooshapweya khwa fweeyo.’

43Paata ya toowo kiniwuuzani yoori Ofwalume wa Nluku mwinttela onyakanyiwa enkhiwe apale aniimaaye mishumo za Ofwalume. 44Otule anttelaaye okwela liwe laya nttho ontta othapateya, na otule linttelaaye onkwela ontta othatuwa lifufu.” 45Mahaakhimu a tiini na mafwarizeewu, asiiliyeevo milikaniso za Yinsa, khuweeleya yoori aari ottakhula monkoni wa yo. 46Khusala eekesa nanna ya onkhola ila khusala awoova atthu, maana aari ontthantta nkhama napiyu.

Currently Selected:

Matewuzhu 21: eko

Highlight

Compare

Copy