Matewuzhu 19

Monkoni wa Waashana

1Yinsa eeshiyeevo olupa mattakhuzi apale, khulaawo Kalileya khweetta Yudeya kaapu kiina ya muuttho Yorotaani. 2Khuntti khuluyeene khusala enlotta, atthaapale ye khuwaavonisa alwele.

3Mafwarizeewu akina khuta aphale aariivo Yinsa yoori amweeze khumuuzela araka: “Halaali nlume omwaasha muukhaawe khwa wakhula kiiswa?” 4Yinsa khuwaajipu araka: “Mweeyo khamwisomeeni yoori omwanzo, Nluku amumpa nlume na muukha, 5na khulupa yoori: ‘Tiito, nlume oninlikha papaawe na mamaawe khujikusanya na muukhaawe, oowiiri khuretteya wiiya mwiili mmote’? 6Khwa etthiipo khaniiya awiri ila aniiya mwiili mmote. Aphano, etile Nluku akusanyiyeeyo ahiiyevo antakhaaye ophakula.”

7Mafwarizeewu apale khumuuzela theenya yoori: “Aphano mwaasa aya niini Munsa enkhaka ruhusa ya nlume omwinkha talakha muukha awe khumwaasha?”

8Yinsa khuwaajipu yoori: “Munsa aruma yoori mweeyo mwimwaashe muukha enu mwaasa wa wuuma wa rooho zenu. Ila khazaari toowo omwanzweene. 9Miiyo kiniwuuzani yoori: wakhula otule animwaashaaye muukha awe, woohiiyi mwaasa wa khaapa twayifu, khunrala muukha nkina ontta oraruwa.”

10Anakhiyoni a Yinsa khuri: “Nkhama pi etthiipo khwa muukha na nlume, afwataali ohilooli.” 11Yinsa khujipu yoori: “Khiriweeni atthu ooshi eetta wiiyana makhaamu ookhupalela mattakhuzi aya apa, ila otule enkhiweeyo paasi. 12Alume akinoko afwa nkuwo, maana avokoliwa etthiipo; akinoko arettisiwa pi atthu azaaya; akina eetta ojirettisa mwaasa wa ofwalume wa pinkuuni. Otule anwahaaye okhupalela vitthu epi, ti akhupalele.”

Yinsa na Asimaana

13Paata ya vitthu epile, atthu akina khusala awaathuula asimaana nontanela Yinsa yoori awaattheele makhono na awaalompele. Ila anakhiyoni awe khusala awaamaruwela. 14Aphano Yinsa khuri: “Mwiwaalikhe asimaana akiteele miiyo wala mwihiwaakhattaze, maana ofwalume wa pinkuuni pu wa apale eeyiyeeyo nkhama atthaapo.” 15Paata ya owaattheela makhono, khulaavo aphale vaya.

Shaapu woothaajiri

16Ntthu nkina khumwaattama Yinsa khumuuzela yoori: “Mwaaliimu, kirette niini yooshapweya yoori kipatthe ohaayi wa mileele?” 17Yinsa khunjipu yoori: “Mwaasa aya niini weeyo okuuzelaka etthu yiiyiye yooshapweya? Owaapho ntthu mmote paasi eeyiyeeyo wooshapweya. Nkhama weeyo ontakha weetta muuhaayi wa mileele, oshututele oruma.” 18Ntthu otule khumuuzela Yinsa yoori: “Puuvi?” Yinsa khunjipu araka: “Ohuule, ohiraruwe, ohiiye, ohilaze oshaahiti woovonyeya, 19onshitahi papaawo na mamaawo, na omphete namwaattamanana awo nkhama etthiipo onjiphetaazo omweenyewe.”

20Shaapu otule khujipu yoori: “Miiyo kishututelaka oruma wooshi opu. Khi niini enikisaleelaaye nalelo?”

21Yinsa khunjipu yoori: “Nkhama weeyo ontakha wiiya khaamili, olawe woozanyise zooshi oriinaaye, nzurukhu aya owenkhe asikhini, orettaru toowo ontta wiiyana njuju pinkuuni. Nawiisha, ote okilotte.”

22Noosiila mattakhuzi apale shaapu otule khususa ari woohuzunikha, maana aarina maali zawaatta.

Ajali ya Maali

23Aphano Yinsa khuwooza anakhiyoni awe araka: “Kiniwuuzani khweele yoori, ti yoolipa thaajiri weetta muufwalume wa pinkuuni. 24Na kiniwuuzani theenya yoori, ti yookhweya enkamiiya ovira valiphotto la sikano zayita thaajiri weetta muufwalume wa Nluku.”

25Anakhiyoni a Yinsa asiiliyeevo mattakhuzi apale, khwiiya ooshanka na khumuuzela yoori: “Khwa nanna nkhama eto paani anttelaaye wuusurukha?”

26Yinsa khuweekesa na khuwaajipu yoori: “Khwa pinaatamu khinwaheya, ila khwa Nluku vitthu zooshi zinwaheya.”

27Aphano Pheeturu khujipu yoori: “Woone! Fweeyo nalikha zooshi yoori nuulotte. Fweeyo ninttela wiiya a niini?”

28Yinsa khuwooza araka: “Miiyo kiniwuuzani khweele yoori, amana ofiya wakathi Nluku anttelaaye waattala zooshi opheeya na Mwaana wa Pinaatamu eekhala va khukulu ya siifwa zawe, mweeyo mwinikilottaaye mwinttela wiikhalela khukulu khumi na piiri yoori mwiphuke mahimo khumi na mawiri a Ezirayiilu. 29Ooshi apale alikhiyeeyo vaje vaya, attwi zaya, alupu aya, papaaya, mamaaya, aanaaya ama mashapa aya, mwaasa wa miiyo, anlawa apwekhere swaafu miiya na orithi ohaayi wa mileele. 30Khwa etthiipo, enkeene apale amwanzo anttela wiishela, na enkeene apale awiishela anttela wiiya amwanzo.

Currently Selected:

Matewuzhu 19: eko

Highlight

Compare

Copy