Luuka 7
7
Amini ya namalokozela wa anajanka
1Eeshiyeevo mattakhuzi apale aari owoozaaye atthu, Yinsa khulawa sitati ya Kafwaranaawu. 2Ottuukho aariwo namalokozela mmote wa anajanka wa rooma, aariina karumeya awe wompheta aari olwaaziwaaye khusala asaleela ofwa. 3Wakathi namalokozela wa anajanka otule asiiliyeevo monkoni wa Yinsa, khuwaaperekha attunkhulu akina a mayaahuuti yoori anvekele Yinsa ate anvonise karumeya awe. 4Yo nonsikana khunvekela wookhanyarelavo araka: “Mwinyi oto onsuhi waawuniwa, 5mwaasa yoori apheta khapila yeetthu na anijekela sinakooka.”
6Aphano Yinsa khulankha khusala alawa vamote na yo, asaleelaka ofiya, namalokozela otule khuwaaruma ashirikha awe olawa omuuza yoori: “Mbwana, ohijantipu, miiyo akinsuhi wuupokherela vaje vaka. 7Tiito miiyo kinoona yoori akinsuhi okutthanana weeyo, ila olupe nttakhuzi limote paasi, karumeya aka ontta ovona. 8Maana na miiyo ki ntthu kiriiye vathi wa ofwalume na ki nlokozi wa anajanka. Kinimuuza mmote yoori: ‘Olawe,’ khulawa; khumuuza nkina yoori: ‘Ote,’ ye khuta. Kinimuuza karumeya aka yoori: ‘Orette khata,’ ye khuretta.” 9Yinsa noosiila epo, khwiiya wooshanka, khuzukuluwa khuwooza atthu apale aari omperekhaaye yoori: “Hatha Ezirayiilu ottuukho akooneeniwo amini nkhama eti.” 10Ashirikha apale aarumiweeyo khurutela owawe namalokozela otule, khunsikana karumeya otule avoniye.
Yinsa oninsisimula mwaana wa nunu mmote woofweliwa ti mannawe
11Mmeesho mwaya Yinsa khulankha khusala alawa sitati ya Nayiimu, anakhiyoni awe na khuntti ya atthu awaatta khusala enlotta. 12Asaleelaka ofiya vanlako wa sitati etile, khusaruwa atthu aari weettelaaye ozikha. Otule aari weettelaaye ozikhiwa aari mwaana mmote paasi wa nunu woofweliwa ti mannawe; atthu awaatta a nsitati mphule aari olawa vamote na ye. 13Wakathi Mbwana Yinsa amooniyeevo nunu otule, khumoonela huruma, khunkhuwela khumuuza yoori: “Ohilile!”
14Aphano khuwaasusela khusapa janaayiza, apale aathuuliyeeyo khweemela. Yinsa khulupa araka: “Shaapu! Miiyo kinuuruma yoori olankhe!” 15Shaapu otule khulankha khwiikhala khusala attakhula; Yinsa khumwinkha mamaawe.
16Atthu ooshi khwiiya awoova khunsifu Nluku araka: “Napiyu nwulu aniteela!” Na “Nluku aateeliye owuusuru atthu awe!” 17Hapari epile za Yinsa khumwazeyela Yudeya yooshi mpakha miti epile zaattamananiyeeyo.
Yaahaya oniwaaruma anakhiyoni awe wa Yinsa
18Yaahaya khuuziwa pi anakhiyoni awe vitthu epile zooshi. Ye khuwaakhuwela awiri, 19khuwaaruma yoori alawe amuuzele Mbwana yoori: “Weeyo ti otu naari onwejaaye ama ninweje nkina?”
20Yo khulawa mpakha ottuukhule aariiwo Yinsa khumuuza yoori: “Neetta orumiwa ti Yaahaya yoori nite niwuuzele nkhama otule naari onwejaaye ti weeyo, ama nivire ninwejaka nkina?” 21Wakathi otthuupule Yinsa khuwaavonisa atthu awaatta aarina vitthu zootakhala, marati awoopisa, na masheethwani, na khuwaafunula maasho atthu awaatta ahaari woonaaye. 22Yinsa khuwaajipu araka: “Mwiruti mwamuuze Yaahaya epi mwinsiilaaye na mwinoonaaye: ananhooni anoona, anamarakala aneettetta, anamaaharaja antta otwahareshiwa, ananhisiili ansiila, ananfwa ansisimuwa, na hapari zooshapweya antafusireliwa asikhini. 23Wooparikhiyiwa ti otule ahinkwakwattuwaaye mwaasa wa miiyo.”
24Anakhiyoni a Yaahaya noolaavo, Yinsa khusala awooza atthu monkoni wa Yaahaya yoori: “N'yaara mweetteliye woona niini? Tteketthe yiinisiwaka ti pheevo? 25Ama moona niini? Mwinyi mmote awaliye kuwo zooshapweya? Moone, apale anwalaaye kuwo zootafikhana aniiya nraaha na aniikhala mmanyupa wa afwalume. 26Nka kuuzeni, mweetteliye woona niini? Napiyu? Wekhweele, miiyo kiniwuuzani yoori anziti napiyu. 27Otu ti otule yaatikhiweeyo monkoni wa ye yoori:
“ ‘Moone, kinlawa kamperekhe karumeya aka omaasho wawo
yoori atthenkeze tarikhi yawo.’
28“Miiyo kiniwuuzani yoori vakatthi wa apale avokoliweeyo pi aakha, khina mmote anzitiyeeyo Yaahaya; ila otule woopushuwa muufwalume wa Nluku, nwulweene zayita ye.”
29Atthu ooshi mpakha anamariphisa lumpuru noosiila mattakhuzi a Yinsa. Yo khukhupalela yoori tarikhi ya Nluku shariya, paata ya woosiwa ti Yaahaya. 30Ila mafwarizeewu na anamanozela a kano khukhijilela matakhelo a Nluku khwa yo, khuhoosiwi ti Yaahaya.
31“Anaatamu apa a leelo eti kiwaalattisane niini? Yinsa khurutela theenya yoori, wala alattanana niini? 32Alattanana khuntti ya asimaana eekhaliye vaparasa akhuwelanaka araka:
“ ‘Fweeyo noovumiselani phivi za vaharusi, mweeyo khuhiini;
khwiipa liipo la huzuni, ila mweeyo khuhilili.’
33Khuta Yaahaya Namoosa woofuka na ahinnywaaye viinyu, mweeyo mwinri: ‘Ye onaaye masheethwani.’ 34Ata Mwaana wa Pinaatamu onja na onnywa, mweeyo mwinri: ‘Mmoone nsokho otu! Namanywa, nshirikha wa anamariphisa lumpuru na anatwampi!’ 35Apale anlottaaye ojuwa wa Nluku, anthoonyeza yoori pi wookhweele.”
Natwampi aavaaziyeeyo mafuttha moolu a Yinsa
36Mfwarizeewu mmote anvekeliye Yinsa yoori alawe aje owawe. Noofiya Yinsa khuvira nnyupa khwiikhala yoori aje. 37Muukha mmote natwampi wa sitati ethiitile, noojuwa yoori Yinsa ontta oja wa mfwarizeewu, khuthuula suupha yawe ya mafuttha oonukhela. 38Khulawa khweemela onyoko wa Yinsa nshini wa moolu awe, khusala alila. Mishozi zawe khusala zittonkela moolu a Yinsa. Khusala akukuttha na nyuuli zawe na opejari moolu a Yinsa avaazaka mafuttha oonukhela.
39Aphano mfwarizeewu otule nawoona vitthu epile khusala alupa nroho mwawe araka: “Otu eriwaka aari napiyu, eetta ojuwa yoori mwanankha otu aninsapaaye natwampi.”
40Yinsa khumuuza Simawu yoori: “Kintakha owuuza etthu.”
Simawu khujipu yoori: “Kuuzeni mwaaliimu.”
41Yinsa khumuuza yoori: “Atthu awiri eetta wiiliwa nzurukhu ti mwinyi mmote aari wiipaashisakaaye, otu mmote aari wiiliwa miiya thaanu, otu nkina aari wiiliwa hamusiini. 42Ila oowiiri khuhiivo mmote aawahiyeeyo onripha, ye khuwaaswaamihi oowiiri. Atthu apa awiri amphetachiyeeyo ti tuuvi?”
43Simawu khujipu araka: “Kinoona yoori ti otule aswaamihiweeyo wa waattavo.”
Yinsa khumuuza yoori: “Walikanisa.”
44Ye khumuuza Simawu anthoonyezaka muukha otule araka: “Onimoona mwanankha otu? Miiyo kata vaje vawo apha khuhikinkhi hatha maati yoori koose moolu aka, ila ye oosa moolu aka na mishozi zawe khukukuttha na nyuuli zawe. 45Khukipokhereleeni na peeju, ila ye khalikheleleeni opejari moolu aka. 46Khukivaazeeni mafuttha oonukhela mmwishwa mwaka, ila otu avaaza mafuttha moolu aka. 47Tiito kiniwuuzaaye yoori twampi zawe epile zawaatta ariinaazo zaswaamihiwa; mwaasa woophetacha wawe. Ila otule aswaamihiweeyo vattitthiiru, opheta wawe vattitthiiru.”
48Aphano Yinsa khumuuza mwanankha otule yoori: “Twampi zawo zaswaamihiwa.”
49Apale akharipwishiweeyo khusala oozelana yoori: “Otu paani anwahaaye oswaamihi twampi za atthu?”
50Ila Yinsa khumuuza muukha otule yoori: “Waamini wawo wa wuusuru; olawe na heeri.”
Currently Selected:
Luuka 7: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.