ABDÍAS 1
1
Edom shuti llactapi causajcunatami, Diosca pingaichishca
1Abdías shuti runaguca, muscuipishnami ricushca. Mandaj Jatun Diosca, Edom shuti llactapi causajcunamandaca, cashnami nirca: Mandaj Dios villashcataca uyarcanchimi. Shuj villajtami, tucui llactacunapi causajcunaman villachun cachamurca. Chai villaj runaca: “Edom llactapi causajcunahuan macanajungapaj jatarichi, tucuicuna jatarishunchi” nircami.
2“Ricui, candaca cai pachapi tiaj llacta puramandaca, ashtahuan uchilla llactatami rurarcani. Ninandapacha ñavita urai cumuchi tucushcami cangui. 3Cambaj shungupi jariyajushcashnallatami, candaca umachirca. Jaca jahuacunapi tiaj jatun rumi chaupicunapimi causangui. Shina causashpami, cambaj shungupica: ‘¿Pita caimandaca, pambaman urmachihuangayari?’ yajungui. 4Jatun angashna jahua huairata jatarishpa rijujpipash, luzero chaupicunapi tazinda rurajpipash, chaimandapash urmachishallami” ninmi Mandaj Diosca.
5“Shuhuacuna cambajman tuta shuhuangapaj shamushpaca, ¿nachu paicuna apai ushashcatalla shuhuanman? Uvasta pallajcuna pallashpapash, ¿nachu asha pallajunatallapash saquinman? (¡Llaquinayaitamari tucuchi tucushcangui!) 6¡Esaú imatalla charishcataca, chashnamari callarimanda mascanajushca! Pai juyailla charishcacunata pacashcatapashmi mascanajurca. 7Cambaj ali cumbacunallatami candaca umachirca. Candaca, shuj llacta linderocunacamanmi pusharca. Canhuan casilla aliguta causajcunallatami, candaca fiñashpa llaquichirca. Canhuan micujcunallatami can urmachun, lazuta churanajurca. Paicunaca, ima ali yuyaitapash na charinllu” ninmi.
8Mandaj Diosca, cashnatapashmi nin: “Chai punllapica, ¿nachu Edom llactapi causaj alipacha yachajushca runacuna chingachumbashmi saquisha? ¿Nachu Esaupaj urcupi causanajuj aligutapacha yarishpa purijcuna, huañuchumbash saquisha? 9Temán shuti pueblolla, cambaj shinlli soldadocunapash, manllashpa chujchunajungami. Esaupaj urcupi causanajuj runacunapash, ninanda llaquichijpimi huañunajunga.
10Cambaj huauqui Jacobota nalicachishpa, ninanda rimashcamandami, pingaichi tucushpa causaita causaicaman chingachi tucungui. 11Cambaj huauquipaj ñaupajpi can shayajui punllallatami, paipaj soldadocunataca, na rijsishca runacuna prezu apanajurca. Jerusalén pueblo pungucunatapash, na rijsishca runacuna faquishpa yaicushpami, ima tiajtapash suerteta rurashpa chaupirinajurca. Cambash chai llaquichij purashnami tucurcangui. 12Cambaj huauquita llaquichijui punllapica, na ricujunallachu carcangui. Judá llactapi causajcuna chingajui punllapica, na cushijunachu carcangui. Paicuna jatun llaquita apajui punllapica, na cushijushpa asijunachu carcangui. 13Pai llaquita apajui punllapica, ñuca agllashcacunapaj pueblo pungutaca na yaicunachu carcangui. Pai llaquita apajui punllapica, chai jatun llaquicunataca napacha ricujunallachu carcangui. Paita ninanda llaquichijui punllapica, pai imatalla charishcatapash, napacha japinachu carcangui. 14Huañunamanda pacajushpa rijcunatapash, ñan cruzarijuj esquinacunapi chapashpa, na huañuchinachu carcangui. Chai jatun llaqui punllapica, pacajushpa puchushcacunatapash, na chai llaquichijcunaman cunachu carcangui.
Israelcuna jatumbi churai tucunatami villajun
15Mandaj Dios tucui llactacunata ninanda llaquichina punllapash ñami chayamujun. Imashnami shujcunata ninanda llaquichircangui, chashnallatami candapash llaquichinga. Can llaquichishcamandaca, cambash japinapachami cangui. 16Imashnami cangunaca, ñucapajlla urcupi ufianajurcanguichi, chashnallatami shuj llactapi causajcunapash, na samashpa ufianajunga. Shina ufiashpa ashtacata langashpapash, imapash na tiashcashnallatami tucunga. 17Ashtahuangarin Sion shuti urcupica, quishpirishpa huaquinguna puchushca tiangarami. Chai urcuca, Diospajlla shicanyachishcami canga. Jacobopaj miraicunapash, paicunapaj alpacunataca cutinmi japinga. 18Jacobopaj miraicunaca, ninashnami canga. Josepaj miraicunaca, rupajuj ninashnami canga. Esaupaj miraicunaca, jupashnami canga. Shinamandami rupachishpa tucuchinga. Esaupaj miraicunamandaca, ashagullapash na puchungachu” ninmi. Mandaj Diosmi chashna nishpa villarca.
19Neguev llactapi causajcunaca, Esaupaj miraicuna causana urcutami japinajunga. Sefela shuti pambapi causajcunaca, filisteocunapaj llactatami japinajunga. Efraín llactatapash, Samaria llactatapashmi japinajunga. Benjaminbaj miraicunaca, Galaad llactatami japinajunga. 20Prezu apai tucushcamanda tigramushca Israel soldadocunaca, cananeocuna causanajuj llactamandaca, Sarepta shuti pueblocamanmi japinajunga. Jerusalenmanda prezu apajpi, Sefarad shuti pueblopi causajcunaca, Neguev pambapi tiaj pueblocunatami japinajunga. 21Esaupaj urcupi causajcunata llaquichingapajmi, quishpichijcunaca Sion urcuman vichai rinajunga. Chashnami mandanapash, Mandaj Diospajlla canga.
Currently Selected:
ABDÍAS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.