Kada to Keaka' 16

1Hupatau mala ma'pattuju illaam penabanna,

sapo' la huanna pessubungam pudu', DEBATA kabuttuanna.

2Ingganna lingka salukatuboanna hupatau malolo situhu' passangainna,

sapo' DEBATA ussangai issi penabanna.

3Lentem palibui pa'palakoammu lako DEBATA,

anna mala sule lako asam pattuju penabammu.

4DEBATA umpadadi ingganna-ingganna sia situhu' la kagunaanna simesa-mesa;

peangga to tameada' napadadi la ullambi' katilakaam.

5Ingganna to malangka' penaba nakabassi ia DEBATA;

mannassa anna tä'i la lappa' dio mai pa'tahungkungam.

6To umpake pangkaha' pa'kamase anna manontom la diampunni kasalaanna,

anna to mengkahea' längäm DEBATA la ungkambela kakadakeam.

7Ianaanna napohäei DEBATA lingka salukatuboanna mesa tau,

iya peangga balinna malapi napasikapiai.

8Aham saidi' pallolongam sapo' diala malolo,

anna la buda sapo' diala malussu.

9Hupatau mala umpattuju lingka salukatuboanna,

sapo' DEBATA untuhoanni lalam la naolanna.

10Tula' buttu di Puang Allataala messubum dio pudu'na tomahaja,

lambi' tä' deem ma'bisaha hempe'.

11Timbangam sola pegantam malolo DEBATA kabuttuanna,

anna ingganna batu timbangam sitonda lambu-lambusanna Ia umpa'tantui mabanda'na.

12Umpogau' gau'na to tameada' nakabassi tomahaja,

aka okkosam kahajaanna tomahaja nasalli' kamaloloam.

13Pudu' umpassubum tula' malolo umpatiala inabanna tomahaja,

anna to untula' tappa' anna sindoho napohäe.

14Aha'na tomahaja sihhapam to la mepakattu sungnga',

sapo' mala ia naoppo' to keaka'.

15Lindo malutena tomahaja umbaba katuboam,

anna kamapiaam penabanna sihhapam gabum umpatuhum uham wattu kulla'.

16Muampuam kakeakasam kedo ia anna la bulabam,

muampuam pikkiham keangga' puha ia anna la muampuam peha'.

17Lingkana to malolo penaba ungkambela kakadakeam,

anna menna-menna unjagai lingkana, ungkambi' sungnga'na.

18Läjä tandu' longkom palasa umpasule katilakaam,

anna malangka' penaba umpakende' kasägängam.

19Aham tau umpopengkadio kale sola to mase-mase,

anna la sola to malangka' penaba umbahe-bahe pamuhunna.

20Menna-menna umpaillaam penaba pepatuduam la silambi' kamapiaam,

maupa' anna katambasam to mahannu längäm DEBATA.

21To keaka' disangai to kepikkiham,

anna to mammi' tadiande tula'na mepakannam sule lako lamba' beluä'.

22Kakeakasam sihhapam kalimbuä tamatti' umpatubo to muampuanni,

sapo' to maho kalebu ia nasussai kamahoanna.

23Pikkihanna to keaka' ungkembuaam tula' kakeakasam,

anna pessubungam pudu'na mepakannam sule lako lamba' beluä'.

24Tula' mellolä minnä' sihhapam duho ma'nini,

umpasundede bua anna umpasule buku.

25Deem lalam nasanga hupatau malolo,

sapo' dio tämpä'na tinanda lako kamateam.

26Issiam tambu' umpatigaha' mesa tau mengkähä,

katamaam bahoko mesasum muasai pala'.

27To takeguna umpa'gahoängam solana,

anna pessubungam pudu'na anggasanna api la meä'bäi.

28To mateko umpakende' kasipengkaam,

anna to ma'pasihuso umpasisalla to sangkalamma'.

29To makahha' kadake ungkeloi padanna,

anna nababai lako lalam kasägängam.

30Menna-menna umpopangka'bi' bulu matanna umpattuju kakadakeam;

menna-menna metaba-taba tumbihim deem pattuju kadakena.

31Ubam sihhapam salokokati palelo bulabam,

dilolongam aka muundu' lalam kamaloloam.

32To ponno sa'baha' keangga' puha ia anna la mesa pa'bahani,

anna to ungkuasai kalena mapia puha ia anna la to ungkatama mesa kota.

33Anna mala diissam lemba'na mesa aka-aka, iya diundi,

sapo' DEBATA ia naissam loppo'um lemba'na ingganna-ingganna sia.

Currently Selected:

Kada to Keaka' 16: BMB

Highlight

Copy

Compare

Want to have your highlights saved across all your devices? Sign up or sign in

Learn More About Bambam