Zẹfanaya 3
3
Ịkaraph aJeruselem rꞌọtagharan phọ
1AJeruselem maphe, ẹmha ạḍikaraph ạdol rꞌọḅaar ẹmhu rꞌọkpiloghom ghan aweye ạbidi. 2Ọdi kọ̋naghanan Ọmoogh-we phọ, ḅịle kőmeeraam mạlhiom. Ọdi kọ̋kpasi oḍuom ologhi ọdi esi Ọmoogh-we phọ, kọ̋lhom ọdi ọloghonaan ạḍighaagh. 3Awe iiḍighi ọdi ọkigh ạnam-dịka dị remeephaghuan, abuugboom ịiruen phọ ọdi ọkigh ilhom ịnam dị ọkoony rasiph, esiphom dị kótue osugheeny rꞌọḅarara tụtu ẹteeny ḍịroor. 4Ariil phọ ụ́logha siloor eegu kụ ọpomoghian iigbegheḍiom; ariil ạrikia phọ rọopu ghan ịyaar lọ eḍighi ẹlo iigbia, kụ okiton ologh phọ Ẹnaan otene ịlo ạsuo ạbidi. 5Kụ ọlo Ọmoogh-we phọ odi ni sịphe ẹmha phọ; ọdi raḍighi ghan ni ịlo ẹnighe, kị́lo eeph. Tọrobo ạḍiroor ọdi rạ́piom ghan, ọdi rạngo ghan iiḅi ịiruen weye ọdi. Kụ ghạlamo rꞌịduon phọ, awe ạsipioghom lọ odi roḍighi ni ịkaraph phọ kụ umugholoor ósiph.
6Ọmoogh-we phọ ạḅem mọ, “Mị maphiemi ikpom areelhe; mị maagulemi rạmha phọ ạbidi kụ iikpe aruutu eedanien phọ ạbidi meegulaan. Rạmha phọ awe mosumughu; areten ogbo ẹmha phọ mepokoro — rꞌoye ósugha. 7Mị ugbi mọ mem mọ ọpo phọ awe phọ ạmi kụlogh ni ịmi eegu kụ omeeraam mem lọ mị aalemi ọpioman ạbidi, ḅịle mọ bịdi kóbula ịtughemi lọ mị ạtughemi. Kụ íbia bịn bịdi mọḅile ọtol ịdipho ọrol bọ kꞌemiighom mọ.
8“Ikori kụ,” Ọmoogh-we phọ ạḅem, “Ikori ḍio phọ mị kaḅetenu bọ ọkpalham areelhe phọ. Mị mạnya ookpomoghi areelhe rꞌạramar kịrokiro, ọbo bịdi ologhoma ịdi ạnian ophin ologhi phọ ạmi ạrol. Oomo ade phọ kopiemiom nịan ophin ologhi ạmi.
9“Kụ mị kanme weye areelhe phọ, kụ bịdi ụuḅereghi ghan ịmi bịn, kị́non ạrumugh. Oomo ạbidi kụnaghanan ghan ịmi. 10Ghạlamo kꞌẹpe ịikela arikpisi Ẹtiopia awe ạmi ọwalala bọ kụngo ghan ịmi ruunmo. 11Mem mọ ọpo, nyina awe phọ ạmi kẹ́moogh mun umugholoor mọ nyina ẹḅaar ẹmhu esi ạmi. Mị kạgbole tọrobo oye lọ aphoophe loor rꞌeboom ekpom, kụ nyina kẹ́ḅaar mun ẹmhu esi ạmi ạnyu eegbolom iigbia phọ ạmi. 12Mị kaseere sịphe we lọ osooromi loor kụ ọmoogh ẹepho, bụdi kotu esi ạmi ọwa ạpeleeny. 13#Ogon 14.5Awe Ịzirel lọ osugha kọ́pioman mun esi oye, ọkpe kọ́gba, ḅịle oye kóokeleghi. Bịdi kọmoogh ẹelha kụ ịyaar kẹ́ḅogh, oye kókiilaan.”
Ạḍuor iboh
14Ịmoor sụor, ẹlo rꞌọḅaal ologhi, weye Ịzirel!
Ịmoogh iboh rꞌoomo ologhi anyina, ẹmha aJeruselem!
15Ọmoogh-we phọ makunughi ọliom anyina;
Ọdi mạgbole oomo ạbumulogh-ḍien anyina.
Ọmoogh-we phọ, ọdaam mọ Ịzirel, odianan rꞌanyina;
Ịyaar ọtuan kụ oghiilaan ílho mun.
16Amem mọ retu ni dị bịdi kọḅeni Jeruselem mọ,
“Kékiilaan, ẹmha phọ ạZayon!
Kémeera ạraghaagh anyina edugh!
17Ẹnaan phọ anyina, Ọmoogh-we phọ odianan rꞌanyina;
ịikpo phọ ọdi kụ rịngo inyina ọkpar-opu.
Ọmoogh-we phọ kạmoogh ni ḍịḅeeraan esi anyina,
kụ esi ẹphomoghian ọdi kụ ẹdi ọdi kịngo inyina kumoom aghuḍum.
Ọdi kạmoor sụor kụ ạmoogh iboh esi anyina
18rꞌibo ịdipho awe dị role ẹyaal.”
Ọmoogh-we phọ ạḅem mọ,
“Mị makunughi ịpaaran ịiḅaghami
ạḅile ạsighe umugholoor esi anyina.
19Amem mọ retu ni!
Mị kạliom bụlo rịkpiloghom inyina;
Mị kạtagharan oomo ạbuo ạraagha
kụ mị ạsighe bụphe ọrol bọ iiruen arikpisi phọ atighelom.
Mị kakiton umugholoor ạbidi eḍighi rughuenian,
kụ oomo aḅirini phọ oboom bịdi.
20Amem mọ retu ni!
Mị kạsighe weye phọ anyina ọwalala bọ atighelom;
Mị kaḍighi ịdi nyina kemitiom ḍien oomo aḅirini phọ
kụ ạḅile kẹn iḍume inyina.”
Ọmoogh-we phọ kụ mạḅem.
Currently Selected:
Zẹfanaya 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
