Bụo aRom 16
16
Ịdi mị ripurunaan inyina
1Mị ạma Fiibi umarani phọ ayira, ọpo raḍighi ghan bọ oḍighi ạsiosi phọ ẹpe Kenkria riḍeenaan inyina. 2Ikuraam ni nyọdi loor ẹmhu aḍien Ọmoogh-we phọ, ịdipho ẹkpe bọ dị aweye Ẹnaan koḍighi ghan. Ịloghonaan ni nyọdi ḍịghaagh tọrobo ịyaar lọ ekuom nyọdi, ịdi eḍighi bọ ọdi rꞌaloor ọdi aḍighi ni ogey ọyaghiri ịbadi awe rꞌạmi phọ kẹn ni.
3 #
Iiḍ 18.2
Ipurunaan ịmi Prịsila rꞌẠkuila, bụphe rꞌạmi ọḅoph bọ oḍighi ghan oḍighi phọ ạJizos Kraist, 4kụ ọsighe bọ ghuḍum ạbidi ọphaghan loor ẹmhu ạmi. Mị rꞌoomo ạbuo ạsiosi aruuruen ekpisi kịrokiro phọ ologhoma ni iiḅi phọ bịdi oḍighi bọ. 5Ipurunaan ịmi bụo ạsiosi phọ rookpomoghan ghan bọ kꞌạbidi.
Ipurunaan ịmi Ẹpainitos ooḅi ọyaghiri phọ ạmi, ọpo aḍighi bọ ọḅel oye dị ameeraam Kraist ẹpe eelhe phọ Esia. 6Ipurunaan ịmi Meri phọ ạkparami bọ ḍịghaagh iḍighinaan ghan inyina oḍighi phọ. 7Ipurunaan ịmi Ạndronikos rꞌạJunias, bụphe rꞌạmi oḍighi bọ bụo aJu dị ọrol ikoli eniin amem. Bịdi oḍighi ni riphigh awe esi ogbo abutelhedom mọ. Bịdi momeeraam ni Kraist kụ egbi ọteeny aani ạmi.
8Ipurunaan ịmi Ạmpliatos ooḅi ọyaghiri phọ ạmi esi ạmuḅoph Ọmoogh-we phọ. 9Ipurunaan ịmi Ụbanos, ọpo rꞌayira ọḅophoghan bọ roḍighi ghan oḍighi phọ aKraist, rꞌạStakis ooḅi ọyaghiri phọ ạmi. 10Ipurunaan ịmi Apeles, ọpo mọwa bọ ni omeeraam mọ ọdi esi aKraist ọmiin. Ipurunaan ịmi ọto kꞌẠristobolos. 11Ipurunaan ịmi Hẹrodion, ọpo rꞌạmi oḍighi bọ bụo aJu, rꞌạbuo asiya ọto kꞌạNasisos.
12Ipurunaan ịmi Trifaina rꞌaTrifosa, bụphe roḍighi ghan bọ oḍighi Ọmoogh-we phọ: rꞌaPesis, ooḅi ọyaghiri phọ ạmi, ọpo akumu bọ kꞌịphen kꞌịphen ạngo Ọmoogh-we phọ. 13#Mạk 15.21Ipurunaan ịmi Rụfos, ọpo aḍien phọ ọdi emite bọ ni esi oḍighi Ọmoogh-we phọ, rꞌonhiin phọ ọdi kẹn, ọpo ụpham ghan bọ ịmi ịdipho ọony ọdi. 14Ipurunaan ịmi Ạsinkritos rꞌaFlegon, rꞌaHemis, rꞌạPatrobas rꞌạHemas, rꞌoomo ạbueri phọ ạbuo asiya phọ esi aKraist, bụphe odianaan bọ rꞌạbidi. 15Ipurunaan ịmi Fịlologos rꞌaJulia: Nerios rꞌumarani phọ ọdi: Ọlimpas rꞌoomo awe phọ Ẹnaan odianaan bọ rꞌạbidi. 16Oniin aghurughi ghan nyoniin! Oomo ạbuo ạsiosi kịrokiro phọ aKraist mipuru inyina.
Oroma okureriom
17Bụo asiya, mị rịḅeni ni inyina kạkpaariom mọ igon bụphe rọkom bọ madian phọ koseere odughiom yogh omeeraam awe phọ, bụphe rọgbagharan ghan bọ ịpe mịtughemi bọ inyina. Ịgbatanaan bịdi. 18Aḍita ạbuphe roḍighi yogh bọ ọdo phọ ịphen phọ róḍighi ghan oḍighi kọngo Kraist Ọmoogh-we phọ ayira. Bịdi rọdaph ghan rụuphua ạbidi bịn. Ịma ikpo ọnhu phọ rꞌiphirigba phọ ạbidi reekeleghi ghan weye ịyegheyeghe iloghi. 19Oomo awe mọnaghan ni ịdi nyina mẹnaghanan ooḅi ọghaaph phọ, kụ loor esi ịduon phọ ologhi ạmi ạḅaal li iboom ịlo anyina. Mị rạwa ni mọ ilegheri ịyaar ịlo ịpe ẹnighe bọ, kụ ịlo eru ịkaraph ílegheri aani ghan. 20Kụ Ẹnaan phọ eḍighi bọ zin ẹepho phọ ayira kẹnuun ni ẹezeghi Setan epiemi sịphe aruwol phọ anyina.
Ooḅi ọghor phọ kꞌạJizos Ọmoogh-we phọ ayira ịrolonaan inyina!
21 #
Iiḍ 16.1
ATimoti phọ rꞌạmi ọḅophan bọ roḍighi ghan oḍighi phọ Ẹnaan; rꞌạLusios, rꞌạJesin, rꞌaSosipater, bụphe rꞌạmi oḍighi bọ bụo aJu phọ mipuru inyina.
22Mị aTatios phọ ạge bọ ḍịnya phọ ạḍien rꞌạḍighaagh ạmi akol li ḍien Ọmoogh-we phọ ripuru inyina.
23 #
Iiḍ 19.29; 1 Kọr 1.14;
2 Tim 4.20
ẠGayos uwotu phọ ọpo bụo ạsiosi phọ rookpomoghan ghan bọ kꞌọdi, mipuru inyina. Ẹrastos ọpamam ikpoki ẹmha phọ rꞌạKuatos, ọnyo asiya phọ ayira, mipuru kẹn inyina.
24[Ooḅi ọghor phọ kꞌạJizos Kraist Ọmoogh-we phọ ayira ịrolonaan inyina!]
Mị rakureriom ịiḅereghi oboomiom Ẹnaan
25Itu oboom Ẹnaan! Ọdi kụ kịngo bọ inyina ịnyaam dị nyina ketue ẹmeera zim sịphe omeeraam mọ anyina, ịdipho adom ạmi rꞌooḅi ọghaaph phọ ạJizos Kraist mị rạkaaph bọ ḅịle rꞌịdipho igey phọ ịpe ạaghian bọ kꞌẹḅel egbiom aḅirini phọ kụ meganana bọ. 26Kụ nyịidipho mọtuan ịpe ariil phọ Ẹnaan ọge bọ ọsighe igey phọ ịpe phọ omitiom egaan. Ẹnaan phọ rémugh ghan bọ mẹtooghi mọ ọsighe oḍeenaan weye oomo areelhe phọ, pịdi bịdi omeeraam ọḅile ọnaghanan.
27Eegu phọ ẹtuan bọ Jịzos Kraist ẹrolonaan Egina Ẹnaan phọ ẹmoogh bọ oomo olegheri ịyaar phọ kꞌagee-pọ! Ẹrol li ịdipho!
Currently Selected:
Bụo aRom 16: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
