Ạsuor 89
89
Ạḍuor amem dị ịiḅaghami edi eelhe
1Ọmoogh-we, mị kạmoorom ghan sụor ịlo ẹphomoghian phọ ạna rémuneen ghan bọ
mị kagbeelom ghan mabi-ólho phọ ạna kꞌagee-pọ.
2Mị alegheri ni mọ ẹphomoghian phọ ạna kẹtol oomo amem,
mọ amabi-ólho phọ ạmeera bịn ịdipho okuaḍio.
3Nạ ụḅem: “Mị maghiran ịyo rꞌoye phọ mị ạsaḅar bọ;
mị maghunya ạngo otelhedom mọ ạmi Devid mọ,
4 #
2 Sạm 7.12-16; 1 Krọ 17.11-14; Ạsuo 132.11; Iiḍ 2.30 ‘Ẹemara ẹemara ạna kụ keḍighi ghan ọdaam;
mị kạmaar ri ạpam ẹemara ẹemara ạna kꞌagee-pọ.’”
5Ạsike phọ rẹmoorom oḍighi ịiḍaany phọ nạ raḍighi bọ;
rẹmoorom mabi-ólho phọ ạna, Ọmoogh-we.
6Rꞌoniin ólho kꞌạke dị ạghigh nyịna, Ọmoogh-we;
rꞌoniin sịphe ạruukpaany phọ odi bọ kꞌạke óoleeny nyịna.
7Roghiilaan ni nyịna sịphe ookpomoghan ạbuo ạdol iigbia phọ;
ḅịle oomo ạbidi ọlogh nyịna eghuan.
8Ọmoogh-we Ẹnaan Oomo Ịikpo, oye ólho dị ạbugh aaleeny nyịna;
esi oomo ạraraar nạ ọ́moogh mabi.
9Nạ kụ ụda rịphiiny phọ ẹmoogh bọ ni ịnyaam;
nạ kụ rạpoomi ghan mem lọ oologh ramite.
10Nạ ạgur nonom mọ oghol bọ mọ Rehab aghiigh;
rꞌiboom mọ ịikpo phọ ạna nạ ạkpar apu bụmulogh-ḍien ạna.
11Ạke phọ ọlo ạna, rꞌade phọ kẹn;
nạ kụ ụlhem aḅirini phọ rꞌoomo ạraraar phọ edi bọ.
12Nạ kụ ụlhem ephunom rꞌesoorom;
Eegum aTabor rꞌEegum ạHermon ẹmoor sụor iboh ịlo oboomiom ạna.
13Nạ ạmoogh ni iboom ịikpo;
ịikpo phọ ạna ẹbugh iboom.
14Ọmar phọ ạna odimom ruukuan rꞌigey ịiruen;
oomo ịlo nạ aḍighi reḍeenaan ghan ẹphomoghian rꞌébi ghan oguan.
15Pọ eeghe ọḅaal ologhi dị odianaan we phọ rooseenyom ghan bọ nyịna rꞌạsuor,
bụphe odimom bọ ḍịḅaal ọnma ighirigiir phọ ạna.
16Loor ẹmhu ạna, bịdi rọmoogh ghan iboh oomo aḍio,
ḅịle bịdi ooseeny nyịna esi ẹnighe phọ ạna.
17Nạ kụ ụkparami iyoor;
esi ẹphomoghian ạna kụ nạ ụngo iyoor ọkpar opu.
18Nạ kụ ụsaḅar ọpelia ayoor, Ọmoogh-we;
nạ kụ ụngo iyoor ọdaam, Oye Aghuḍuul phọ Ịzirel.
Oguanaan Ẹnaan esi aDevid
19Esi uḍien mem dị eten nạ ụḅeni butelhedom mọ ạna ọmoogh bọ omeeraam mọ:
“Mị mạlhoghonaan ḍịghaagh okakara ọnyo ẹgham;
mị mạsaḅar nyoniin sịphe aḍita awe phọ ạtolomi ạgada ọdaam ẹmha.
20 #
1 Sạm 13.14; Iiḍ 13.22;
1 Sạm 16.12
Mị maḍighi otelhedom mọ ạmi Devid ọdaam
kụ ạsagharan ẹmhu ọdi mụnum iigbia.
21Ịnyaam ạmi kẹtolan ni nyọdi oomo amem,
ịnyaam mọ ạmi kẹngo nyọdi ịikpo.
22Ạbumulogh-ḍien ọdi kótue ọkpar opu nyọdi;
ạbukaraph awe kóbinighiom nyọdi.
23Mị kạze bụmulogh-ḍien ọdi,
kụ akiigh tọrobo oye lọ ạlogh nyọdi ḍien.
24Mị kạpomoghian nyọdi kụ aḍighi ịpe mị aguanaan bọ nyọdi;
mị kạngo nyọdi ọkpar opu oomo amem.
25Mị kạteghe ni eelhe phọ ọdi
emiigh kꞌỌphiiny Meditarenian kụ esi Ọphiiny aYufratis.
26Ọdi kụḅeni ịmi:
‘Nạ kụ ọde ạmi rꞌẸnaan ạmi.
Nạ kụ eekpereghiom ạmi rꞌọpelia ạmi.’
27 #
Ogon 1.5
Mị kaḍighi nyọdi ọkpana ọony ạmi,
ọkar ogbogh esi oomo ạraalha.
28Mị kaḍighi ghan oguanaan lọ mị ạmoogh rꞌọdi amitiom,
kụ ịyo phọ ạmi rꞌọdi kẹtol kꞌagee-pọ.
29Ẹemara ẹemara phọ ọdi kẹtol bịn ịdipho okuaḍio;
ọnyo ẹemara ẹemara ọdi kụ kaḍighi ghan ọdaam eelhe.
30“Kụ ọlo eḍighi ịyaar dị ọony ọony ọdi kụ ụ́naghanan iilogh phọ ạmi
ḅịle ụ́tolan ọdaphan ịto phọ ạmi,
31Eḍighi ịyaar dị bịdi ọḅitonaan oromoghiom mọ ạmi
ḅịle ụ́daph ịtooghi phọ ạmi,
32pọ mị kạliom bịdi loor ịkaraph phọ ạbidi;
mị kaḍighi ịdi bịdi kọmiinom esi ạsipioghom mọ ạbidi.
33Kụ ọlo mị kạ́bile ọphomoghian aDevid;
kạ́bile oḍighi ịpe mị aguanaan bọ nyọdi.
34Mị káagbonyon ịyo phọ mị aghiran bọ rꞌọdi;
mụghumo ọoḅemion oniin sịphe aruguanaan phọ ạmi esi ọdi.
35“Amem bịn kụ ẹdi mị maguanaan ghan rꞌaḍien iigbia phọ ạmi:
mị kạ́gbaam ọkpe Devid.
36Ọdi kạmoogh ghan nmụny nmụny,
ḅịle mị kạmaar ri apogh eelhe phọ ọdi ịduon phọ erumuḍio rẹmu bọ ni.
37Kẹtol bịn ịdipho ụnwanyu,
ogey ọgbaanaan phọ ọpo odi bọ kꞌạke.”
Ọkunuma loor emeel ọdaam mọ
38Kụ ọlo nạ rapinom ologhi ọdaam mọ nạ ạsaḅar bọ;
nạ masuma kụ akel nyọdi.
39Nạ maagbonyon ịyo phọ nạ aghiran bọ rꞌotelhedom mọ ạna
kụ atoph eghoony ọdaam ẹmha phọ ọdi ologhi ọgbudu.
40Nạ malhereghi iikpe ẹmha phọ ọdi,
ạḅile ạpueghi oghoony phọ.
41Oomo abuteneneen romiighi ruphua phọ ọdi;
oomo amatuman rọnughe ghan nyọdi ẹka.
42Nạ mạngo ọkpar opu phọ bụmulogh-ḍien ọdi;
nạ maḍighi ịdi ologhi ạbidi mạḅaal.
43Nạ madughe reenema ẹgham mọ ọdi bịn ị́moogh mun ịyaar oḍighinom
ạḅile aḍighi ịdi mọkpar opu nyọdi risigh ẹgham.
44Nạ mạar nyọdi ḍughule ịikpo phọ ọdi,
ạḅile agboton ạgada ọdaam ẹmha phọ ọdi alher ude.
45Nạ maḍighi ịdi ọdi mạkpo eloogh
ạḅile aakpereghiom nyọdi umugholoor.
Ịiḅereghi ọtagharan
46Ọmoogh-we, nạ kạbooghi loor ạna kꞌagee-pọ ḍụghum?
Ophin ologhi phọ kạtol ghan oomor ịdipho ạnian ḍụghum?
47Tụutughian ekulha amem mọ aghuḍum mọ ạmi kạtol bọ;
tụutughian mọ nạ ạlemom we iphulupul dị kemugh ni.
48Ọghen oye kụ odi dị kámugh?
Ika kụ ẹdi oye kaseere loor kụ akpetenaan ḍuugh rꞌoḍi?
49Ọmoogh-we, edi ẹghen ẹḅel eḍeenaan ẹphomoghian phọ ạna?
Edi ẹghen aruguanaan phọ nạ aguanaan bọ Devid?
50Kábula ịpe mụgilaam bọ ịmi otelhedom mọ ạna,
ịpe mị ạkparagham bọ itonyonaan ạbuphe Ẹnaan úlegheri bọ.
51Ạbumulogh-ḍien ạna mọsinoghom ọdaam mọ nạ ạsaḅar bọ ịghor, Ọmoogh-we;
bịdi ọsinoghom nyọdi ịghor tọrobo ekpisi lọ ọdi ạghi.
52Iboom Ọmoogh-we phọ kꞌagee-pọ.
Ẹrol li ịdipho! Ẹrol li ịdipho!
Currently Selected:
Ạsuor 89: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
