Ạsuor 88

Ịlom ọloghonaan ạḍighaagh

1Ọmoogh-we Ẹnaan, ọpelia ạmi, mị amoghi amitiom oomo aḍio,

kụ ogbo aḍughul mị atu ghisigh ạna.

2Nạghan ịiḅereghi ạmi;

nạghan emoghi ọloghonaan ạḍighaagh phọ ạmi.

3Ịbadi ịiḅaghami misoorom ịmi

dị mị matuman ḍuugh.

4Mugbiom ịmi ọloghom bụdi úlho;

oomo ịnyaam ạmi memuneen.

5Mughel ịmi ọloghom bụphe momugh bọ;

mị mạghigh bụdi mọze kụ otumeriom iiḍi ạbidi,

bụphe nạ mawula bọ bịn,

bụdi ọloghonaan ạḍighaagh ạna kạ́teeny mun ni bịn.

6Nạ muroph ịmi asumeeny ude oḍi,

sịphe oḍi phọ awil bọ kụ ạḅile ạkel.

7Ạghelhe phọ ạna muwiririom ịmi

ḅịle muugulemi ịmi ọlogh ude oologh.

8Nạ maḍighi ịdi ạrighiri ạmi mụḅitonaan ịmi;

nạ maḍighi ịdi mị rapur esi ạbidi.

Muukpereghiom ịmi kụ mị rákpetenaan.

9Ariḍien ạmi medugh esi ọmiinom.

Ọmoogh-we, ḍio ḍio ḍio mị rạmagh ghan nyịna

kạḅile aphoophe rạghaagh ạnyu esi ịiḅereghi.

10Nạ kaḍighinaan ni ịiḍaany bụphe momugh bọ ḍụghum?

Iḍim keḅerenu ni eboom nyịna ḍụghum?

11Kọkaaph ni ịlo ẹphomoghian phọ ạna ologhi oḍi

mụghumo ịlo ébi ghan oguan phọ ạna ẹpe ọmar iḍim ḍụghum?

12Rọmiin ghan ni ịiḍaany phọ ạna esi ufiri ḍụghum,

mụghumo ịma ẹrolom mọ ạna de ạbulo awe mowula ḍụghum?

13Ọmoogh-we, mị rạmagh ni nyịna ọloghonaan ạmi ḍịghaagh;

tọrobo ạḍiroor mị ạaḅereghi nyịna.

14Eeghe kụ nạ ughel bọ ịmi, Ọmoogh-we?

Uḍighi ika kụ nạ ụgumom bọ ịmi ọman phọ?

15Kꞌamem dị mị aḍighi mọony, mị mạmiinom kụ atuman ḍuugh.

Mị maminenom loor eephina ịminimiin dị ẹḍua ḍịghaagh ạna kụ eru.

16Oboom ophin ologhi phọ ạna ruphiemi ịmi;

ozuom ghan ạmi phọ ạna ruugulemi ịmi.

17Ịiḅaghami phọ ịphen ikoom ịmi oomo aḍio mụdi ạmuum-aḍigho;

iko ịmi ẹlhogh ogbo oomo ịigaany.

18Nạ mạgbarion rịghiri ạmi rꞌiigbo ạmi ạkele esi ạmi

kụ ufiri bịn kụ ogina amatuman ạmi.

Currently Selected:

Ạsuor 88: ẠḌI

Highlight

Copy

Want to have your highlights saved across all your devices? Sign up or sign in

Abuan Language Development and Literacy Society

Ayama-Abua, Rivers State, Nigeria

Published by

NBTT

Nigeria Bible Translation Trust

No. 7 Old Airport Road

P.O. Box 790, Jos Plateau State, Nigeria

ISBN: 978-978-966-354-5

In cooperation with

MIDI BIBLE

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published

in 1978 by The Bible Society of Nigeria with © UBS

Learn More About Ạḍinya Iigbia