Ạsuor 83
83
Ịiḅereghi ọkpar opu ạbumulogh-ḍien Ịzirel
1Ẹnaan, káḅoorian,
kạ́meera eniin esi bịn, kákpomori ọnhu.
2Mịin. Ạbumulogh-ḍien ạna mọnya ịkaraph,
ḅịle bụphe ọlogh bọ nyịna ḍien phọ rọḅaar ẹmhu.
3Bịdi romiteghunaan ịkaraph aruzue we phọ ạna;
bịdi roopuruan oḍighi ịkaraph we phọ nạ aakpereghi bọ.
4Bịdi ọḅem bọ, “Itu oḍighi ịdi yira kopiemi eelhe ạbidi,
ọbo owula Ịzirel kꞌagee-pọ.”
5Bịdi mọḅoph ọnhu ọḅoph ologhi ozuan ạna:
6awe Idom rꞌawe Ịsmael;
awe ạMoab rꞌawe aHegar;
7awe aGebal rꞌAmon rꞌẠmalek;
rꞌạbuo aFilistia rꞌaTaya.
8Bụo Asiria mọdaphan bịdi;
bịdi oḍighan agey weye Amon rꞌạMoab, nmụny ạnmuny phọ ạLot.
9 #
Ịir 7.1-23;
Ịir 4.6-22
Ḍighi bịdi ịdipho nạ aḍighi bọ we ạMidian phọ,
ḅịle rꞌịpe nạ aḍighi bọ Sisera rꞌaJabin sịphe Ọphiiny ạKison.
10Nạ ụkpar apu bịdi ẹpe En Dor,
kụ aḍizu ạbidi ẹḅoroghu sịphe ade phọ.
11 #
Ịir 7.25;
Ịir 8.12
Ḍighi buḍiemiom mọ ạbidi ịdipho nạ aḍighi bọ Oreb rꞌaZeeb;
binighiom oomo awe phọ ạbidi ọdaaghi bọ ịdipho nạ aḍighi bọ Zeba rꞌaZalmuna,
12bụphe ọḅem bọ mọ, “Yoor kọsighenaan siloor ayoor
de phọ eḍighi bọ de Ẹnaan.”
13Wạawalami bịdi ịdipho ophugh, Ẹnaan,
ịdipho ịpherepher dị ookuugh aphula aroḅologhi.
14Ịdipho ạnian reemor ghan bọ eḍum,
ịdipho anem ạnian rẹsu ghan bọ rạaḅaraph phọ,
15poroghom bịdi ookuugh phọ ạna ạsighe,
kụ ạsighe oghim mọ ạna aḍighinom ịlo aḍiigu kesiph bịdi.
16Kpereghiom sighisigh ạbidi umugholoor, Ọmoogh-we,
ạḅile aḍighi ịdi bịdi kologhoma ịikpo phọ ạna.
17Owinighiom bịdi kụ aḍiigu esiph bịdi kꞌagee-pọ!
Bịdi omughom rꞌaroofola dị eekuna ílho!
18Bịdi olegheri mọ nạ bịn kụ Ọmoogh-we phọ,
ọkar oye ịtooghi oomo ịsien ade phọ!
Currently Selected:
Ạsuor 83: ẠḌI
Highlight
Share
Copy

Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS