Ạsuor 81
81
Ạḍuor ẹyaal
1Ịlo ḍịolho iboh ẹghiom ạnyu ẹngo Ẹnaan ọpo rueenaan ghan bọ iyira;
ịmoor eeseenyom Ẹnaan ạJekob.
2Imiigh ephegh phọ etiighi rạkama phọ;
ipeghom egey ephegh ạagba phọ rꞌọne phọ.
3 #
Igb 10.10
Ipulanaan ẹyaal phọ
mem lọ ụnwanyu pụruku aghon rꞌamem lọ aaghiraan.
4Ọphon kụ ologh phọ ẹphen Ịzirel,
ịto dị ẹḍua kꞌẸnaan ạJekob kụ eru.
5Ọdi ạloghonaan we phọ Ịzirel
mem mọ ọdi azuom bọ de phọ Ijipt.
Mị ạnaghan ẹḍogh dị elegh ụ́logh dị rẹḅem ghan mọ,
6“Mị ụsighe dool ẹemor sịphe rụpha phọ anyina;
mị aḍighi ịdi nyina esereghian sidool abiriki phọ anyina.
7 #
Ẹḍua 17.7; Igb 20.13 Mem dị nyina ẹrol esi ịiḅaghami, nyina ịmagh ịmi kụ mị ịphel inyina.
Sịphe igbo oghim mọ, mị ịnaghanan ni inyina.
Mị ịdegh inyina aphogh sịphe okol ạmuum mọ aMeriba.
8Ịnaghan, we ạmi, ọphur ạruru phọ ạmi:
Weye Ịzirel, ẹnighe dị ọbo nyina mịnaghanan ịmi.
9 #
Ẹḍua 20.2, 3; Dut 5.6, 7 Kéeseeny ẹnon ẹmugh.
Kẹ́eḅereghi eeruen ẹmugh.
10Mị kụ Ọmoogh-we Ẹnaan phọ anyina
ọpo ịsighe bọ inyina amitiom sịphe eelhe phọ Ijipt.
Ipoghoghomi ịnhu anyina mị kịngo inyina eḍien.
11“Kụ ọlo awe phọ ạmi ịmi ụ́naghanan;
bụo Ịzirel ịmi ụ́naghanan.
12Kụ iḍighi kụ mị ạwile bịdi ọghi reten ọḅaar ẹmhu phọ ạbidi
kụ oḍighi ịlo ẹḅeeraan bịdi.
13Pọ eeghe oboom ọto dị mị ameelom loor ẹmhu awe phọ ạmi.
Ẹnighe dị ọbo nyina mịnaghanan ịmi.
14Ọbo mị mụnuun ni ạka bụmulogh-ḍien phọ ạbidi,
ạkpar apu oomo phọ ạbidi.
15Ọbo mị mụliom bụphe ụlogh bọ ịmi ḍien kꞌagee-pọ,
bịdi mutu okpuḍughian risigh ạmi.
16Kụ ọlo mị ạsighe ọkaraghi igey ịbiakpa kụ iikonomom inyina,
ạḅile ạsighe ẹnuum aḍiowo dị ụ́pueri ịpheremiom inyina.”
Currently Selected:
Ạsuor 81: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
