Ạsuor 71
71
Ịiḅereghi okumoor oye
1Ọmoogh-we, mị maru esi ạna ọmoogh eekpereghiom;
kámeera ọkpar upu ịmi.
2Ịdi eḍighi bọ nạ oye aruukuan, ụphel ịmi ạḅile ụtagharan ịmi;
ụnaghanan ịmi ạḅile ụphel ịmi.
3Ḍighi ḍighiigh dị kemoonomi marugh ạmi;
ḅịle rꞌịgbagara iikpe dị ikpeki ịmi;
nạ kụ esi ịbooghian rꞌọsuaram ạmi.
4Ẹnaan ạmi, ụtagharan ịmi esi ạbukaraph awe;
ụphel ịmi esi ịikpo awe ạsipioghom rꞌịpaaraghan.
5Ọmoogh-we, nạ kụ azin oḍuom-ologhi ạmi;
mị ạkpasi oḍuom-ologhi ạmi esi ạna kꞌẹghoroghor.
6Mị mạbedenom nyịna kꞌamem mọ ụmar bọ ịmi;
nạ muuko ịmi kꞌaḍio phọ ọpo ụmar bọ ịmi.
Mị kạseph ni nyịna oomo amem.
7Aghuḍum ạmi maḍighi ni eḍeenaan ạngo ịbadi awe,
loor esi dị nạ maḍighi ọgbagara ọsuaram ạmi.
8Oomo aḍio phọ mị ạseph ghan nyịna
ạḅile agbeelom eegu phọ ạna.
9Kúghel ịmi nyịidipho mị mạkpo bọ;
kụ́ḅitonaan ịmi nyịidipho mị madugh bọ.
10Ạbumulogh-ḍien ạmi rọwa ghan oghiigh ạmi;
bịdi ọkaaph kụ omite ezue oḍighi ạmi ịkaraph.
11Bịdi ọḅem: “Ẹnaan mẹḅitonaan nyọdi.
Ophorogh osiph nyọdi!
Oye ólho dị kạtagharan nyọdi.”
12Kạ́kelan, Ẹnaan.
Ẹnaan ạmi, gboogborion aru uḅegh ịmi.
13Ḍighi ịdi awe kọkpar opu bụphe uzuom bọ ịmi.
Ḍighi ịdi umugholoor kasiph bụphe ọwa bọ oḍighi ạmi ịyaar.
14Mị kaseere oḍuom-ologhi ạmi esi ạna oomo amem.
Mị kạseph ghan nyịna ạḅile ạseph.
15Mị kạkaaph ni ịlo aruukuan phọ ạna;
oomo phọ aḍio phọ mị kạkaaph ni ịlo iiḍighi ạpeleeny phọ ạna,
ghạlamo mị úlegheri ọnhu ịlo bịdi ọman.
16Mị kaboom ni ịikpo phọ ạna, Ogbogh Ọmoogh-we;
mị kagbeelom ni ruukuan phọ ạna, ịpe ạna bịn.
17Nạ mụtughemi ni ịmi kꞌẹghoroghor,
kụ ẹteeny kꞌarodon mị rạkaaph ni ịlo ịiḍaany phọ ạna.
18Kụ ghạlamo mị mạkpo ni asi sụol,
kụ́ḅitonaan ịmi, Ẹnaan.
Tọlan rꞌạmi mem lọ mị agbeelom ịikpo rꞌigbogh phọ ạna
ạḅeni bụo oghiil dị ratu.
19Aruukuan phọ ạna, Ẹnaan, ẹteeny okuaḍio phọ.
Nạ maḍighi igbogh ạraraar;
oye lọ ạghigh nyịna ólho.
20Nạ muruomaan ịmi ịiḅaghami rꞌọmiinom,
kụ ọlo nạ kaḅulemi ni ịnyaam mọ ạmi,
nạ kụgbole ni ịmi sịphe oḍi phọ.
21Nạ kụbughe ịmi apuemi ḍigbaany ạdol phọ;
kụ ạḅile ụudereghi ịmi.
22Mị kati ọne ạsephom nyịna;
mị kaboom ni nyịna, Ẹnaan ạmi,
loor esi dị nạ raḍighi ghan ni ịpe nạ maguanaan bọ.
Mị kati ọne ạmooraan nyịna sụor, Oye Aghuḍuul Ịzirel.
23Mị kạlo ḍịolho iboh mem lọ mị rạmooraan nyịna;
rꞌoomo aloor ạmi kụ mị ạmoorom,
loor esi dị nạ mụphel ịmi.
24Mị kạkaaph ni ịlo ạdol aruukuan phọ ạna ạḅeni we oomo aḍio
loor esi dị mọkpar opu bụphe ọwa bọ oḍighi ạmi ịyaar
kụ umugholoor masiph bịdi.
Currently Selected:
Ạsuor 71: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
