Nehemaya 1
1
1Phọn kụ ọghaaph arukumuan dị aNehemaya ọony phọ aHakalia akumuan.
Ịitughian aNehemaya ịlo aJeruselem
Ụnwanyu aKislev, lhạ phọ ạḍiphe emuneniom bọ ịyaldi phọ kꞌamem mọ Atazakzis aḍighi bọ ogbogh ọdaam eelhe aPasia, mị aNehemaya ụrol li ẹpe Sụsa, ẹkpana ẹmha phọ ọdi. 2AHanani, oniin umor ạmi, rꞌaḍita awe ụḍua ni ẹpe Juda oru kụ mị apuru bịdi ịlo aJeruselem rꞌịlo ạbunon awe aJu phọ ọḍua bọ dọl ịminimiin ẹpe Bạbilonia kụ origheel. 3Ụḅeni ịmi mọ ạbuphe ọkparam bọ morigheel ẹpe Jeruselem kụ odi ni esi igbogh ịiḅaghami; kụ mọ aruuruen phọ ạbuphe orugh bọ etuman bịdi rọgilaam ni bịdi. Bịdi ụḅile ụḅeni ịmi mọ iikpe ẹmha phọ rꞌarughuugh ạrunhu-aḍibuo phọ molhereghi bọ kọ̋meremi edi ni nịiniin ịdipho ẹrol bọ mem mọ ọsu bọ nịan ẹmha phọ. 4Mem dị mị ạnaghan bọ ịphen phọ, mị ụrol ude kụ ạgharaghi izin.
Esi ịbadi asuḍughul-otu mị ụrolom rꞌọto, eḍien mị úle. Mị ụuḅereghi Ẹnaan. 5“Ọmoogh-we Ẹnaan kꞌạke, nạ ạbugh ni kụ yoor ọmeera esi oghiilaan ạna. Nạ raako ghan ni ịyo lọ nạ aghiran rꞌawe phọ ạbuphe ọphomoghian bọ nyịna kụ roḍighi ghan bọ ịlo nạ ạḅem. 6Uphogh ịmi, Ọmoogh-we, kụ ạnaghanan ịiḅereghi phọ ạmi, ịduon mị rạaḅereghi ghan bọ ḍughul rꞌootaany ịlo abutelhedom mọ ạna, we phọ Ịzirel. Mị ạgba ni ramitiom mọ yoor, awe phọ Ịzirel, moḍighi ịkaraph. Oghiil ạburude phọ ạmi rꞌạmi mọpioman. 7Yoor mọpioman, yoor úḍighi ịpe nạ ụḅeni bọ iyoor mọ oḍighi. Yoor úuko iilogh phọ nạ ụngo bọ iyoor ḍịghaagh aMozis otelhedom mọ ạna. 8#Lịv 26.33Tụutughian nyịidipho ịpe nạ ạḅeni bọ Mozis mọ ‘Eḍighi ịyaar dị nyina awe phọ Ịzirel ịmi ị́naghanan, pọ mị kịiwalami ni inyina adoghoḍi ịpheri phọ areelhe phọ. 9#Dut 30.1-5Kụ eḍighi ịyaar dị nyina eeghiraan iphogh ịmi kụ emiigh oḍighi ịlo mị ịḅeni inyina oḍighi, pọ mị kịsighe ni inyina aḅulemi sịphe mị mạsaḅar bọ ọoḅereghi ghan ạmi. Ghạlamo nyina ịwalala kụ eleeny oomo ạrughulukul aḅirini phọ, pọ mị kiḅulemi ni inyina.’
10“Ọmoogh-we, bụen phọ abutelhedom rꞌawe phọ ạna. Nạ ụtagharan bịdi esi igbogh ịikpo rꞌịnyaam ạna. 11Nạghanan nyịidipho ịiḅereghi phọ ạmi rꞌịlo oomo ạbueri phọ abutelhedom mọ ạna, bụphe rọwa bọ ọngo ạna rughuenian. Ụngo ịmi ọkpar opu rodon, kụ aḍighi ịdi ọdaam mọ kụnma ịmi ighirigiir.”
Siḍughul phọ ịpe phọ, mị uḍighi otelhedom dị ạngo ghan ọdaam mọ miim.
Currently Selected:
Nehemaya 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
