Lịvitikos 6
6
1 #
Igb 5.5-8
Ọmoogh-we phọ ạngo Mozis ịinua mọ, 2“Ọdo awe phọ ạbuen ọphighoronaan ghan ẹkia ọkpe-oḅulemi, ịdi eḍighi bọ bịdi mọpioman oḍighi ịkaraph risigh Ọmoogh-we phọ: oye lọ úḅulemi matuman ọdi ịlo aruphua dị ọngo nyọdi mọ ạmaar aseere, oye lọ ạsighe ekpeḍien kụ ạsighenom ịyaar ọnon oye, mụghumo aagbegheḍiom matuman ọdi, mụghumo ami rạraar ọdi, 3mụghumo aḅom ịyaar ọnon oye lọ ephe kụ ạpharanaan, bịn apu akunya yogh. 4Mem lọ oye aḍighi ịkaraph dị ephum ni nyọdi, pọ ọdi aḅulemi ghan ịyaar phọ ẹpe ọdi ạsighe bọ reten imi kụ ạsighenom ạkpe, mụghumo ẹlo ọdi ạsighe ekpeḍien kụ ạsighenom, mụghumo ẹlo ọngo nyọdi oseenaan, mụghumo ẹlo ephe kụ aḅom. 5Esi oomo phọ ịpe ọdi ạtu bọ kụ aghunya yogh, iikunya ọkpe phọ ọdi, loor ạraraar phọ ịpe ọdi ạsighe bọ, pọ ọdi aḅulemi oomo phọ ịdi ạlogh ọḅar bin oogh abin ạḅaram ạngo uwo ạraraar phọ. 6Ọdi ạsighe odughuna mꞌạtu-ọga lọ kọ̋opuan loor, ạsighe aru ạphighironom ẹkia ọkpe-oḅulemi phọ ọdi ạngo Ọmoogh-we phọ; ạtomaam ọlo ạman ḍighi ịkaraph apum mọ. 7Kụ oyil ạrikia phọ awoph nyọdi egbodo Ọmoogh-we phọ, pụruku mọsar ịkaraph phọ ọdi ọwilenaan esi oomo ạraraar iigbegheḍiom mọ ọdi aḍighi yogh bọ.”
Ạrikia dị ọphinyonom ịnam dị ọphophoghi ikpom
8Ọmoogh-we phọ ạghaaph ạḅeni Mozis 9mọ ạḅeni Eeron rꞌạnmuny phọ ọdi mọ, “Ịphen phọ kụ iilogh ịlo ẹkia oguom ạnian phọ. Ịdi eḍighi bọ ẹdi phọ ẹkia oguom ạnian, ẹrol sịphe enmeny phọ oomo aḍughul phọ kụ ẹemor ghan tụtu ẹḅaal. 10Oyil ạrikia phọ ạkpologhian ogudaguda ạsuoma phọ ọdi, ạlogha ọyegheyeghe ekulha anika phọ ọdi, kụ ạsighe ọoru phọ ọpo ạnian phọ mẹmoogh bọ ẹkia oguom ạnian phọ edi bọ ạnyu enmeny phọ, aseere ịigaany enmeny phọ. 11Oyil ạrikia phọ ạkporonaan ạsuoma phọ ọdi anme ibura kụ ạsighe ọoru phọ ạḍuanam arugbogo phọ ạghimom esi ịisua phọ. 12Kụ ạwile nịan phọ edi bọ sịphe ạnyu enmeny phọ eemor ghan ni kíḍim. Kụ oyil ạrikia phọ atumughi ghan ịpe tọrobo ạḍiroor, kụ ạsighe ghan ẹkia oguom ạnian phọ ạmaar ghan asereghi sịphe ạnyu enmeny phọ, kụ ạsighe ẹnuum ẹkia ẹboroph phọ aguom nịan. 13Ạnian phọ kíḍim ghan rꞌamem, ẹemor ghan bịn ạnyu enmeny phọ.”
Ạrikia ịbiakpa
14“Ịphen phọ kụ ịinua ọlo ịyaar aghuḍum ịbiakpa phọ. Oyil ạrikia kꞌạnmuny phọ Eeron ạphighironaan ghan ẹkia phọ ẹphen phọ egbodo Ọmoogh-we phọ sịphe elhor enmeny phọ. 15Ọdi akpoph ẹezua ạḍighaagh ịgbieneen ịbiakpa phọ rꞌạmunum mọ rꞌịnsens phọ edi bọ sịphe aloor ịinua ẹkia ịbiakpa phọ, ạsighe ạkpooniom nịan sịphe enmeny phọ epur eeḅi eḍu, eḍighi ịyaar ọsighe ghan kụ ọotughianam esi Ọmoogh-we phọ. 16Eeron rꞌạnmuny phọ ọdi ọsighe ịpe esugha bọ olhe, ọḅaram rꞌạbred dị yist ụ́logh; ọrol sịphe esi iigbia, sịphe oghoony Ogbogo Ạdol Ọmoogh-we phọ, kụ ole. 17Kụ́ḅaram ịlo ọlogh yist kụ ọgbaghaḍiom. Mụphe phọ abin ẹkia ịkpuy dị mị ạngo bịdi. Ịyaar aghuḍum mọ ẹphen rꞌẹlo ịkaraph phọ rꞌẹlo ọkpe-oḅulemi phọ, eḍighi ni iigbia ni iboom. 18Oomo alephiri ạnmuny phọ Eeron kụ olhe ni. Eḍighi eḍighinom ịyaar kꞌagee-pọ, oghiil atum oghiil phọ kꞌanyina, ịlo ẹkia ọngo Ọmoogh-we phọ. Ọlo ạḅogh, pọ aako ghan loor ọdi ạrol dọl iigbia.”
19Ọmoogh-we phọ ạghaaph ạḅeni Mozis mọ, 20“Ẹphen phọ ẹkia ẹlo Eeron rꞌạnmuny phọ ọdi, dị ọdi ạpighironaan Ọmoogh-we phọ ḍio phọ ạḍiphe kodeneghi bọ nyọdi otene oyil ạrikia phọ. Ọdi ạsighe ghan oniin ogbogh ọtoom ịgbieneen ịbiakpa phọ ạphighironom ẹkia ẹlo oselemian aloor rꞌẹboroph. Adi ạsighe ạpakiri abin aḍighinom ḍịroor, ạsighe pạkiri aḍighinom ḍughul. 21Ạlogh ni ologhi ọnyoki ạsighe mụnum ạlogh kụ ạgbaghaḍi, kụ ạsighe aru. Ạkiriph aḍighi ịpherepe ạsighe, ịlo ẹkia ịbiakpa phọ dị kạpighironaan dị kepur eeḅi eḍu esi Ọmoogh-we phọ. 22Oyil abiil lọ ạḍua ọkuruḅaka ạnmuny phọ Eeron kụ amite lọ modeneghi mọ ạsighe esi phọ ọdi, kụ kạpighiron ghan ẹkia phọ ẹphen ạngo Ọmoogh-we phọ. Ịphen phọ iigbia dị kẹtol kꞌagee-pọ. Oomo phọ ịdi oguom ghan nịan. 23Tọrobo ịyaar aghuḍum ẹlo ịbiakpa dị oyil ạrikia phọ kụ aḍighi, koguom ni nịan oomo phọ ẹdi.”
Ạrikia oselemian aloor
24Ọmoogh-we phọ ạghaaph ạḅeni Mozis mọ ịphen kụ ịinua dị Eeron rꞌạnmuny phọ ọdi kooko ghan ịlo ẹkia ịkaraph mọ, 25“Nyina keḍighi ghan ịyaar aghuḍum mọ sịphe ạga ephunom enmeny phọ ẹphen sịphe rọze ghan bọ ịnam mọ koguom bọ nịan phọ. Eḍighi ni igbogh iigbia. 26Oyil ạrikia phọ kạpighiron bọ ẹkia phọ ẹphen alhe ni, ạrol sịphe esi iigbia kụ alhe, sịphe erugh Ogbogo Ạdol Ọmoogh-we phọ. 27Oye mꞌịyaar lọ kạḅogh ịinua ẹkia phọ pọ aako loor ọdi ạrol dọl iigbia. Mem lọ rọsaraghi ịḅaal phọ kụ ẹteeny ạsuoma oye, pọ oye phọ ạsighe ạsuoma phọ ọdi ạghi aatol esi lọ eḍighi iigbia. 28Ịnyoki phọ ọsaam bọ ịnam mọ oḅomoghi; kụ eru mạar dị ọsaam ogeny aguugh, pọ oghorogh ootol ọkuami. 29Oomo alephiri ạnmuny phọ Eeron kụ olhe ghan. Eḍighi ni igbogh iigbia. 30Tọrobo ẹkia dị ọpighiron oselemian aloor kụ mọsighe ịḅaal phọ oḍighom ologhi Ogbogo phọ kụ ọrol sịphe Ạdol Iigbia phọ kụ owoph oye, pọ oye kúlhe ọsighe oguom nịan.”
Currently Selected:
Lịvitikos 6: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
