Lịvitikos 4
4
Ạrikia élegheri ịkaraph
1Ọmoogh-we phọ ạghaaph ạḅeni Mozis 2mọ ạḅeni we phọ Ịzirel mọ oye lọ ạsighe élegheri kụ asoorom oniin ologh sịphe iilogh Ọmoogh-we phọ, kakoola ghan ịduon.
3Eru mạar dị uwo ẹmhu oyil ạrikia kụ ạpioman aḍighi ịkaraph, dị awe ọmoogh apum; pọ ọdi ạsighe ghan onyugheel aḍilephiri ạnam lọ kọ̋opuan loor aru egbodo Ọmoogh-we phọ aselemian loor ọdi. 4Ạsighe nạm mọ aru sịphe ọnhu-aḍibuo Ogbogo phọ egbodo Ọmoogh-we phọ, ạḅam ḍịghaagh ọdi ẹmhu ạnam mọ kụ aghiigh sịphe egbodo Ọmoogh-we phọ. 5Kụ oyil ạrikia phọ apoor iniin ịḅaal ạnam mọ ạlogh ẹpe Ogbogo phọ. 6Kụ oyil ạrikia phọ ạsighe ghụnugh ọdi atiom ghan ạsaraghi oḍual amem egbodo Ọmoogh-we phọ rꞌịsiphe ukpe phọ ọkpo bọ esomanan Ạdol Iigbia phọ. 7Kụ oyil ạrikia phọ ạsighe iniin ịḅaal phọ ạsanyan ologhi ạraphaal phọ edi bọ sịphe enmeny ịnsens eeḅi eḍu phọ ẹdi bọ egbodo Ọmoogh-we phọ, ẹpe edi bọ sịphe ologhi Ogbogo phọ. Kụ ạsighe oomo phọ ịḅaal ạnam mọ esugha bọ aaku eeḍian enmeny ạrikia oguom ạnian phọ edi bọ sịphe ọnhu-aḍibuo Ogbogo phọ. 8Ạḅaram kẹn oomo phọ ẹnuum ạnam mọ eekpereghiom bọ ịpe ologhi phọ, rꞌoomo ẹnuum mọ edi bọ sịphe ọkuruḅaka phọ, 9ịyal phọ ịkpinyoom mọ rꞌẹnuum mọ edimom bọ loor ạbidi, rꞌẹebogh ẹnuum mọ ẹḅaram bọ sịphe ạni phọ. 10Aguom nịan ạnyu enmeny ạrikia oguom ạnian phọ, ịdipho rọsighe ghan bọ ẹnuum ạnam lọ ọpighironom ẹkia ẹboroph. 11Kụ ọlo oyil ạrikia phọ ạsighe ghan ozu ạnam mọ, rꞌiphulupul phọ, ẹmhu phọ, aruwol phọ rꞌịpe ọkuruḅaka phọ rꞌạriir phọ, 12arool oomo phọ ịdi amitenom sịphe arugbogo phọ ạghimom ẹpe esi ạrusua phọ sịphe rozu ghan bọ ọoru phọ, ạsighe ipe kụ aguom nịan.
13Eru mạar dị oomo phọ aḍita awe phọ Ịzirel kụ ọsighe élegheri kụ ọpioman oḍighi ịkaraph ọka oniin ologh sịphe iilogh Ọmoogh-we phọ, 14mem dị ịkaraph phọ ịpe bịdi oḍighi bọ kụ meganana kụ olegheri, pọ oomo aḍita ookpomoghan phọ ọsighe onyugheel aḍilephiri ạnam oselemian aloor esi ịkaraph phọ ịpe bịdi oḍighi bọ, ọsighe ọghi sịphe aḍibuo Ogbogo Ạdol Ọmoogh-we phọ. 15Kụ ikumoor awe ịsiphe ookpomoghan phọ ọḅam rạghaagh ạbidi ẹmhu ạnam mọ egbodo Ọmoogh-we phọ, kụ oghiigh sịphe egbodo Ọmoogh-we phọ. 16Kụ uwo ẹmhu oyil ạrikia phọ ạsighe iniin ịḅaal phọ ạghi sịphe Ogbogo phọ, 17kụ ạsighe ghụnugh ọdi atiom ghan ịḅaal phọ, ạsaraghi oḍual amem egbodo Ọmoogh-we phọ rꞌịsiphe ukpe phọ ọkpo bọ esomanan Ạdol Iigbia phọ. 18Kụ oyil ạrikia phọ ạsu iniin ịḅaal phọ ạsanyan ologhi ạraphaal phọ enmeny ịnsens eeḅi eḍu phọ edi bọ egbodo Ọmoogh-we phọ, ologhi Ogbogo phọ. Kụ ạsighe ịḅaal ạnam mọ esugha bọ aaku eeḍian enmeny ạrikia oguom ạnian phọ edi bọ ọnhu-aḍibuo Ogbogo phọ. 19Kụ ạsighe oomo phọ ẹnuum mọ aguom nịan ạnyu enmeny phọ. 20Kụ ạtuugh ịdipho ọdi aḍighi bọ nạm oselemian aloor phọ, aḍighi ḍịen phọ kụ awoph bịdi ọwilenaan ịkaraph phọ ạbidi. 21Kụ ọdi arool nạm mọ amitenom sịphe arugbogo phọ, ạsighe ịpe kụ aguom nịan, ịdipho ọdi aguom bọ ḍịḅel ạnam mọ. Ẹphen phọ ẹkia dị aḍita kụ ọphighironaan loor ịkaraph dị bịdi oḍighi.
22Eru mạar dị uwo ẹmhu phọ kụ ạsighe élegheri kụ ạpioman aḍighi ịkaraph ạka oniin ologh sịphe iilogh Ọmoogh-we Ẹnaan phọ ọdi, 23mem dị ọdi aloghoma ịkaraph phọ ọdi, mọ ọno aḍighi ni ịdi ị́nighe, pọ ọdi ạsighe ekpe lọ loor kẹ̋epuan, 24ạḅam ḍịghaagh ọdi ẹmhu ekpe phọ, kụ aghiigh sịphe rọze ghan bọ ịnam ẹkia oselemian aloor phọ egbodo Ọmoogh-we phọ. Ẹphen phọ, ẹkia owophom ịkaraph. 25Kụ oyil ạrikia phọ ạsighe ghụnugh ọdi ạtiom ghan sịphe ologhi ịḅaal phọ, agbul rạphaal phọ edi bọ sịphe enmeny phọ, kụ aaku ịpe esugha bọ eeḍian enmeny phọ. 26Ạsighe oomo phọ ẹnuum mọ aguom nịan ạnyu enmeny phọ ịdipho oguom bọ ịpe ẹkia ẹboroph phọ. Kụ oyil ạrikia phọ awoph nyọdi ạsighe esi ịkaraph, pọ mọsar ri ịkaraph ọdi ọbilenaan.
27 #
Igb 15.27, 28 Eru mạar dị oopho oye sịphe aḍita awe phọ ạsighe élegheri kụ ạpioman aḍighi ịkaraph ạka oniin ologh sịphe iilogh phọ Ọmoogh-we Ẹnaan phọ ọdi, 28mem dị ọdi aloghoma ịkaraph phọ ọdi, mọ ọno aḍighi ni ịdi ị́nighe, pọ ọdi ạsighe ạtu-ọga lọ loor kọ̋opuan, 29ạḅam ḍịghaagh ọdi ẹmhu ạtu-ọga phọ, kụ aghiigh sịphe rọze ghan bọ ẹnam ẹkia oselemian aloor phọ. 30Kụ oyil ạrikia phọ ạsighe ghụnugh ọdi ạtiom sịphe ologhi ịḅaal phọ, agbul rạphaal phọ edi bọ sịphe enmeny phọ, kụ aaku ịpe esugha bọ eeḍian enmeny phọ. 31Kụ ạsighe oomo phọ ẹnuum mọ, ịdipho ọdi ạsighe bọ ẹnuum ẹpe ẹkia ẹboroph phọ, ạsighe aguom nịan ạnyu enmeny phọ, ephur eeḅi eḍu esi Ọmoogh-we phọ; oyil ạrikia phọ awoph nyọdi ạsighe esi ịkaraph phọ ọdi; ịkaraph ọdi mọsar ọbilenaan.
32Eru mạar dị oyool-ọga kụ ẹdi oye phọ ratumom bọ ọphighironom ẹkia, pọ ọdi ạsighe lọ loor kọ̋opuan, 33ạḅam ḍịghaagh ọdi ẹmhu oyool-ọga phọ kọphighironom bọ ịyaar ẹkia ịkaraph phọ ọdi, kụ aghiigh sịphe rọze ghan bọ rịkia oguom ạnian phọ. 34Kụ oyil ạrikia phọ ạsighe ghụnugh ọdi ạtiom ghan ịḅaal phọ, agbul rạphaal phọ edi bọ sịphe enmeny phọ, kụ aaku ịpe esugha bọ eeḍian enmeny phọ. 35Kụ ạsighe oomo phọ ẹnuum mọ, ịdipho ọdi ạsighe bọ ẹnuum mọ nyẹpe ọphighironom bọ ẹkia ẹboroph phọ, aguom nịan sịphe ạnyu enmeny phọ, ạtuugh ịdipho roḍighi ghan bọ ẹkia lọ oguom nịan ọngo Ọmoogh-we phọ. Ịduon kụ ịdi oyil ạrikia phọ mawoph nyọdi ạsighe esi ịkaraph phọ ọdi; ịkaraph phọ ọdi mọsar ọbilenaan.
Currently Selected:
Lịvitikos 4: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
