Lịvitikos 19
19
Iilogh dị egbolomaam dọl aruukuan rꞌelhiom ọoruen
1Ọmoogh-we phọ ạḅeni Mozis mọ, 2#Lịv 11.44, 45; 1 Pit 1.16“Kạaph ạḅeni oomo ookpomoghan phọ ạnmuny Ịzirel mọ ịtol dọl iigbia, ịdi eḍighi bọ mị Ọmoogh-we Ẹnaan phọ anyina oye iigbia. 3#Ẹḍua 20.12; Dut 5.16; Ẹḍua 20.8; Dut 5.12Tọrobo ọnyo anyina aghueni ghan onhiin ọdi rꞌọde ọdi; aako ghan ḍio ophooghian phọ. Mị kụ Ọmoogh-we Ẹnaan phọ anyina.
4 #
Lịv 26.1;
Ẹḍua 20.23; 34.17; Dut 17.2-5 “Kị́wile ịmi ẹ́eḅereghi ruru; ḅịle kẹn, kẹ́ka ghan rụmugh esereghian siloor anyina. Mị kụ Ọmoogh-we Ẹnaan phọ anyina.
5“Mem lọ nyina reḍighi ịyaar aghuḍum ẹboroph kẹngo Ọmoogh-we phọ, ịdaph ịinua phọ ịpe mị mịngo bọ inyina kụ mị kạsighe ni ịyaar aghuḍum mọ. 6Ịba ghan ẹnam mọ oḍighinom bọ ịyaar aghuḍum mọ, ḍio phọ ạḍiphe oghiigh bọ mꞌạḍieri phọ aḍio phọ. Tọrobo ẹnam dị ọwile ẹteeny ḍio phọ eḍighi bọ ịraar aḍughul-otu, pọ ịsighe eguom nịan. 7Kụ eru mạar dị nyina ạa ịpe esugha bọ ẹman ịraar aḍughul-otu, pọ ạḅaphanya; ịyaar aghuḍum mọ ẹpe ụ́sighe. 8Kụ iḍighi, tọrobo oye lọ ạa ịpe phọ, pọ ịkaraph odi ẹmhu ọdi; ịdi eḍighi bọ ọdi mạapu ịyaar aghuḍum iigbia Ọmoogh-we phọ; kotoph nyọdi ogbeph omutonaan nyọdi esi awe phọ ọdi.
9 #
Lịv 27.15; Dut 24.19-22 “Mem lọ nạ ạghi ibugha ozo ạna, úbugha ghan oomo ịiku phọ ụ́madan; ḅịle kẹn úukoroghi ghan iikoma phọ ụ́sighiogh ụ́madan. 10Ụ́ukpanion ghan ikpo iimuma ozo phọ ạna ụ́madan; ḅịle kẹn, ụ́son ghan lọ ạgharaghu ude sịphe ozo ịghol phọ ạna; bịlenaan ịpe phọ rukulom mọ rꞌaruuruen phọ. Mị kụ Ọmoogh-we Ẹnaan phọ anyina.
11 #
Ẹḍua 20.15; Dut 5.19;
Ẹḍua 20.16; Dut 5.20 “Kémiighi ghan, kéegbegheḍiom ghan oye, kẹ́gbaam ghan ọkpe oye. 12#Ẹḍua 20.7; Dut 5.11; Mat 5.33Ị́sighe ghan ḍien phọ ạmi ekunyaam iikunya ọkpe, ẹphue ḍien phọ ạmi. Mị kụ Ọmoogh-we Ẹnaan phọ anyina.
13 #
Dut 24.14, 15 “Ụ́gbiphoghom ghan matuman ạna, úmi ghan nyọdi. Ụ́pam ghan ikpoki oye lọ nạ aphir oḍighinaan ạna oḍighi ẹmina ẹḅaal. 14#Dut 27.18Úutonyon ghan oye lọ ạḅaaghaph, mọ kẹn ụ́dianaan ghan ịka oye dị eten rạ́miin ghan. Kiilaan ghan Ẹnaan phọ ạna. Mị kụ Ọmoogh-we phọ.
15 #
Ẹḍua 23.6-8; Dut 16.19 “Ụ́sighe ghan akeel útene apum, mem lọ nạ rasoph ọoruen; ụ́sighe ghan akeel uwekulom ụngo ọdaam, kụ sophonaan ghan elhiom ọoruen matuman ạna. 16Kẹ́tol dọl ụḅemo. Úgbororian ghan asophoghom ghuḍum amatuman ạna. Mị kụ Ọmoogh-we phọ.
17 #
Mat 18.15
“Kạ́mooghom umor ạna ologhi ẹḍim. Amatuman ạna rꞌạna ịmoogh ọḅoph ọnhu, ẹḅoph ghan ruupuruan, ọbo nạ katool ghan bọ ịkaraph ọnon oye ẹmhu ạna. 18#Mat 5.43; 19.19; 22.39; Mạk 12.31; Luk 10.27; Rom 13.9; Gal 5.14; Jems 2.8Ụ́wa ghan oḍighi oḅulemian, ụ́mooghom ghan ẹguuny ologhi nmụny awe phọ ạna. Pọmoghian ọnon oye ịdipho aloor phọ ạna. Mị kụ Ọmoogh-we phọ.
19 #
Dut 22.9-11
“Kooko ghan iilogh phọ ạmi. Úmeera ghan ẹnam otu phọ ạna ẹdaar ẹnon ọdo ẹnam. Úḅeph ghan ịyal ạkiro ọdo ịizupha sịphe oniin phọ ozo phọ ạna; ḅịle kẹn ụ́kpologhian ghan ạsuoma ạko kịrokiro.
20“Mem dị oye abiighi ẹbene-ọnyani dị motebeeny ḍịkala kụ ikpoki kọ̋to ḅịle kọ̋tagharan, pọ kọgurogh bịn kọ́ze, ịdi eḍighi bọ ọnyani phọ kọtagharan. 21Ọdi ạsighe ịyaar aghuḍum ọkpe-oḅulemi phọ ạsighe ạghi elhor Ọmoogh-we phọ, sịphe ọnhu-aḍibuo Ogbogo Ạdol phọ ạmi, oniin odughuna ọlo ịyaar aghuḍum ọkpe-oḅulemi phọ. 22Oyil ạrikia phọ ạsighe odughuna phọ koḍighinom bọ ịyaar aghuḍum apum mọ ọdi risigh Ọmoogh-we phọ, awoph nyọdi ạsighe esi ịkaraph phọ ọdi, ịpe ọdi aḍighi bọ, kụ Ẹnaan ẹsar ịkaraph phọ ọdi ẹbilenaan nyọdi.
23“Mem dị nyina ẹghi esi ẹpe ade phọ aKenan kụ ẹzuphogh kịrokiro ịizupha, ẹteeny mem mọ ịpe remuum ghan bọ iimuma phọ ịpe role ghan bọ; igbi, kéle iimuma phọ ạbidi esi ịraar ạsia. Eḍighi ni iigbia esi anyina, íle ghan iimuma ạbidi. 24Kụ rẹman inya ạsia oomo phọ iimuma phọ ạbidi meseleman ẹnighe ọsighe oḍighinom ịyaar aghuḍum oboom Ọmoogh-we phọ. 25Kụ rẹman oogh ạsia kụ egbi olhe iimuma phọ ạbidi, kụ bịdi emuum emuzeḍi. Mị kụ Ọmoogh-we Ẹnaan phọ anyina.
26 #
Emi 9.4; Lịv 7.26, 27; 17.10-14; Dut 12.16, 23; 15.23;
Dut 18.10
“Ị́ba ghan tọrobo ẹnam dị emughom ịḅaal. Ị́tuugha ghan ọmiin ịmiin, ḅịle kẹn, ị́gbe ghan ghạma. 27#Lịv 21.5; Dut 14.1Ị́sama sịlaal ẹmhu anyina, ḅịle kẹn, íkula ghan ọleem anyina. 28Ị́tuan ghan ọto mọ oye mamugh égbooghian rẹlem loor anyina, ẹḅile ẹ́kiripha siloor anyina. Mị kụ Ọmoogh-we phọ.
29 #
Dut 23.17
“Úkpor ghan ọnyani ạna ụ́ngo, ọbo ọdi kaḍighi ghan bọ oliom-ẹmha, ọbo ade phọ keḍighi ghan bọ de abulhiom ẹmha, bịn ẹmha phọ eḍighi ẹmha ạsipioghom. 30#Lịv 26.2Iiko ḍio ophooghian phọ ạmi, eghueni dọl iigbia phọ ạmi. Mị kụ Ọmoogh-we phọ.
31 #
Dut 18.11; 1 Sạm 28.3; 2 Ạbud 23.4; Azay 8.19 “Kẹ́ki ọwa oroma esi ạbuphe ropuru ghan bọ ruwaloor ạbulo úlho, ị́daph ghan rụḅaghama, ọbo bịdi kịphue ghan bọ inyina. Mị kụ Ọmoogh-we Ẹnaan phọ anyina.
32“Isooromi ghan loor ẹngo oye ạsuol, eghueni ghan okumoor oye, eghiilaan ghan Ẹnaan phọ anyina. Mị kụ Ọmoogh-we phọ.
33 #
Ẹḍua 22.21; Dut 24.17, 18; 27.19 “Íḍighi ghan ooruen lọ arugh sịphe ẹmha phọ anyina ịkaraph. 34Ịloghoma ghan ooruen lọ arugh sịphe ẹmha phọ anyina, ẹloghomaam nyọdi ịdipho oniin ọnyo anyina, ịdi eḍighi bọ nyina ịrol li iiruen ẹpe Ijipt. Mị kụ Ọmoogh-we Ẹnaan phọ anyina.
35 #
Dut 25.13-16; Asid 20.10; Izik 45.10 “Ụ́pioghom ghan mem lọ roogbo ịiruen, úpogh ghan nyoniin ạbughe, apogh nyoniin asooromi. 36-37Kéegbegheḍiom rꞌoniin oye esi ọsighe ọtoom dị úmunughan ḍịdoony, ẹemor mꞌạḍibugh. Mị kụ Ọmoogh-we Ẹnaan phọ anyina ịsighe bọ inyina ẹpe Ijipt amitiom. Kụ iḍighi, ịsighe ghan igey ịtoom kụ elegheriom ọkaraghi aḍiphoogh, ọkaraghi ẹemor, rꞌọkaraghi ọtooghiom. Iiko oomo iilogh rꞌịtooghi phọ ạmi. Mị kụ Ọmoogh-we phọ.”
Currently Selected:
Lịvitikos 19: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
