Lịvitikos 17
17
Ịdi ịḅaal eḍighi iigbia
1Ọmoogh-we phọ ạghaaph ạḅeni Mozis 2mọ ạḅeni Eeron rꞌạnmuny phọ ọdi rꞌoomo awe phọ Ịzirel mọ ịphen kụ ịdi Ọmoogh-we phọ ạto. 3“Tọrobo ọlo ịsiphe ọkuruḅaka phọ Ịzirel kụ aghiigh nạm mꞌoyool-ọga mꞌạtu-ọga sịphe arugbogo phọ, mụghumo ạḍuanam ni sịphe arugbogo phọ kụ aghiigh, 4dị ụ́sighe útu sịphe ọnhu-aḍibuo Ogbogo Ạdol Ọmoogh-we phọ oḍighinom ịyaar aghuḍum ọngo Ọmoogh-we phọ, pọ kọsighe ni apum ozu ịḅaal ọḅam ẹmhu oye phọ ọpo, pọ awe phọ ọdi oroph nyọdi ogbeph omutonaan nyọdi. 5Ẹmhu ịto phọ ịphen eḍighi ịdi awe phọ Ịzirel nyịidipho kọsighe ghan ịnam mọ bịdi ọze ghan bọ ẹpe erugh otuom oyil ạrikia phọ sịphe ọnhu-aḍibuo Ogbogo phọ kụ okiigh ịdipho ịyaar aghuḍum ẹboroph ọngo Ọmoogh-we phọ. 6Oyil ạrikia phọ kạsighe ịḅaal phọ ạsaraghi ạnyu enmeny ạrikia phọ, sịphe ọnhu-aḍibuo Ogbogo phọ, kụ ạsighe ẹnuum mọ aguom nịan ịdi ephur eeḅi eḍu esi Ọmoogh-we phọ. 7Bịdi kúkel mun Ọmoogh-we phọ, kụ́pinyonaan ghan mun rịkia phọ ạbidi ụ́ngo ruru. Ịphen phọ eḍighi iigbia esi anyina kꞌagee-pọ, oghiil atum oghiil.
8“Tọrobo ọnyo Ịzirel rꞌooruen lọ rꞌanyina erughan kụ ạphighiron ẹkia oguom ạnian mụghumo ẹnon ẹkia, 9kụ ụ́sighe útu sịphe ọnhu-aḍibuo Ogbogo phọ ụ́pighironaan ụ́ngo Ọmoogh-we phọ, pọ itoph ogbeph oye phọ ọpo emutonaan nyọdi.
10 #
Emi 9.4; Lịv 7.26, 27; 19.26; Dut 12.16, 23; 15.23 “Tọrobo ọnyo Ịzirel rꞌooruen lọ rꞌanyina erughan kụ ạa ẹnam rꞌịḅaal dị edimom, pọ mị kakananaam ni apogh oye phọ ạa bọ ịḅaal phọ. Mị katoph ni nyọdi ogbeph, ạgbatan nyọdi ạsighe esi awe phọ ọdi. 11#Hib 9.22Aghuḍum ạtorobo ịyaar dị repooghu edi sịphe ologhi ịḅaal phọ. Kụ iḍighi, kụ mị ạlogh bọ ologh ịngo bọ inyina mọ nyina kẹki ghan sịphe enmeny phọ kụ ewopha yogh siloor anyina, ịdi eḍighi bọ ịḅaal kụ ịdi rowophaam ghan bọ ọwaam aghuḍum. 12Kụ iḍighi, kụ mị rạḅeni bọ oomo phọ anyina awe Ịzirel mọ kẹ́ba ghan tọrobo ẹnam dị ịḅaal phọ edimom. Ghạlamo ooruen lọ rꞌanyina erughan, kụ́ba ghan.
13“Tọrobo ọnyo Ịzirel rꞌooruen lọ rꞌanyina erughan kụ aru ọtayaam ịtaya kụ aghiigh ẹnam mꞌẹnun lọ ẹḅaal ọkoom ghan ịko aloor, pọ ạmeegh orum mọ aaku ịḅaal phọ ude, ạsighe ịisaar aakpereghiom, 14ịdi eḍighi bọ ịḅaal kụ aghuḍum oomo ạraraar phọ ịpe repooghu bọ. Ịduon kụ iḍighi kụ mị ạtu bọ ịḅeni inyina awe phọ Ịzirel mọ ị́ba ghan tọrobo ẹnam dị ịḅaal phọ edimom. Kụ iḍighi, kụ tọrobo oye lọ ạa ịḅaal, pọ kotoph nyọdi ogbeph.
15“Tọrobo ọlo ịsiphe ọkuruḅaka phọ Ịzirel rꞌooruen lọ rꞌanyina erughan kụ ạa ịyaar lọ ẹpu bịn emugh, mꞌẹlo elhom ẹnam kụ eghiigh, pọ ọdi aatologh rukpe ọdi, asoor ologhi ạmuum awura, pọ ọdi mạapuan loor ạrol ḍịo ọdi gem kꞌadulhe, pụruku ọdi mạḅaal. 16Kụ eru mạar dị ọdi rukpe phọ ọdi úutologh mụum úbura, pọ ịkaraph ọdi, ẹmhu ọdi.”
Currently Selected:
Lịvitikos 17: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
