Jona 3
3
AJona ạnaghanan Ọmoogh-we phọ
1Ọmoogh-we phọ ạḅile ni ạḅaanaan Jona. 2Kụ ạḅem mọ, “Kịa Nineve ẹpe egbogh ẹmha phọ, kụ ạghaaph alheenye dom mọ mị arom bọ nyịna.” 3Kụ aJona ạnaghanan Ọmoogh-we phọ, kụ ạghi ẹpe Nineve, ẹmha dị ẹbugh ḍịbugh dị kẹsighe ịraar aḍughul-otu kụ orelhe ọḅeeny. 4#Mat 12.41; Luk 11.32AJona amiigh orelhe ẹmha phọ, kụ ọdi arelhe ẹmhu aḍio kụ ạghaaph ghan mọ, “Esi inyadi asiḍughul-otu, kopiemi ni Nineve!”
5Awe phọ aNineve umeeraam ni dom mọ Ẹnaan erom bọ. Kụ bịdi omeeraam mọ tọrobo oye kạkaagh ẹḍogh, kụ oomo awe phọ, emiigh ọbam kụ ẹteeny ogbogh, ọkpologhian ịparapara iinmenan oḍeenaan mọ bụno mokiton esi ịkaraph phọ ạbuno.
6Mem dị ọdaam mọ aNineve ạnaghan bọ ọghaaph phọ, ọdi ạḍua ni ạgada ọdaam mọ ọdi asoor, ạkporonaan ạsuoma ọdi, kụ ạrol ude loor ọoru. 7Ọdi ạlogh ologh ạḅeni weye aNineve mọ, “Ọdaam mọ rꞌạbuphe oḅegh bọ nyọdi mọlhogh ologh mọ oomo awe, iyool-ịga rꞌịnon ịnam, eḍien kúle, mụum kụ́pughol. 8Oomo awe rꞌịnam iinmenan ịparapara iinmenan. Tọrobo oye ạkar ạaḅereghi Ẹnaan kụ ạwileghi ẹkaraph ẹzo rꞌeḍighinom ịyaar ọdi. 9Ịduon sịen Ẹnaan kenme ni ologhi ọdi; ịduon sịen, ọdi kạbile ni ịghagh iloghi phọ ọdi kụ ameera yira kúmugh!”
10Ẹnaan ịmiin ni ịpe bịdi oḍighi bọ; ọdi ạmiin ni mọ bịdi monme ịkaraph ạraaghara phọ ạbidi. Esi ịduon phọ ọdi anme ologhi ọdi, kụ bịdi ọ́lhiom mun ịdipho ọdi ạḅem bọ oḍighi phọ.
Currently Selected:
Jona 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
